ԳԱԼԱ-ի զրուցակիցն է «Չեք անցկացնի» քաղաքացիական նախաձեռնության անդամ Դավիթ Հովհաննիսյանը:
-Դավիթ, երեկ «Չեք անցկացնի» նախաձեռնության անդամները հանդիպել են «Ժառանգություն» կուսակցության եւ Հիմնադիր խորհրդարանի անդամների հետ: Ովքե՞ր են մասնակցել հանդիպմանը, եւ ի՞նչ հարցեր եք քննարկել:
-Կոնգրեսի եւ Հիմնադիր խորհրդարանից հետո հանդիպել ենք «Ժառանգություն» կուսակցության ներկայացուցիչների հետ: Հանդիպումների քննարկման թեման Սահմանադրական փոփոխությունների դեմ միասնական պայքարի շուրջ համախմբվածության քննարկումներն են: Հանդիպմանը «Ժառանգություն» կուսակցությունից Արմեն Մարտիրոսյանը եւ Զարուհի Փոստանջյանն են մասնակցել, քննարկվել են հնարավոր համագործակցության հարցեր:
-Ի՞նչ դիրքորոշում են որդեգրել այդ կուսակցությունները:
-Ինչպես Հիմնադիր խորհրդարանը եւ Կոնգրեսը, այնպես էլ «Ժառանգությունն» ամբողջությամբ դեմ են արտահայտվում Սերժ Սարգսյանի ծրագրին՝ սահմանադրությունը փոփոխելուն, եւ պատրաստակամություն են հայտնել պայքարելու եւ թույլ չտալու այդ փոփոխություններն իրականացնել: Այս պահին դժվար է ասել միասնական ճակատի ձեւավորման մասին, ինչքան տեղյակ եմ, նման հանդիպումներ նաեւ կուսակցությունների մեջ է տեղի ունենում, բայց մենք մեր խնդիրն ենք համարում ամբողջ դաշտի՝ քաղաքական եւ հանրային սեկտորի համախմբումը: Մենք հանդիպել ենք նաեւ քաղաքացիական սեկտորի ներկայացուցիչների հետ եւ բոլորի հետ քննարկել ենք միասնական կերպով պայքարելու եղանակները, եւ հնարավոր է շուտով՝ սեպտեմբերին, լինի միասնական համաժողով, այս պահին մենք զբաղված ենք դրա նախապատրաստական աշխատանքներով: Ում հետ մենք հանդիպել ենք, բոլորը դեմ են եւ պատրաստակամություն են հայտնել ամբողջ ուժերով պայքարել:
-Իսկ ՀՅԴ-ի եւ «Քաղաքացիական պայմանագիր» կուսակցության հետ հանդիպում լինելո՞ւ է: Հայտնի է, որ ՀՅԴ-ն կողմ է, իսկ ՔՊ-ն այն համարում է կեղծ օրակարգ եւ հայտարարում, որ քննարկումների դաշտ չեն մտնելու:
-Ես այս պահին որեւէ իմաստ չեմ տեսնում հանդիպելու, թե ՀՅԴ-ի, թե ՔՊ-ի հետ: Ըստ էության, նրանք ՀՀԿ-ի հետ միասին այս պահին չեն հայտարարել, որ դեմ են Սահմանադրական փոփոխություններին եւ պայքարելու են դրա դեմ: Սա պարզապես ինչ-որ Սահմանադրության կետերի փոփոխություն չէ, այլ կառավարման համակարգի, որի արդյունքում լուծվում է Սերժ Սարգսյանի վերարտադրվելու հարցը, եւ սա բոլորը գիտեն, եւ պետք է հստակ կողմնորոշվել, թե որ ուժը որ ճամբարում է գործում: Այն ուժերը, որոնք վերահսկողության տակ չեն գտնվում, պետք է իրենց ուժերը ներդնեն:
-Ինչպե՞ս եք պատկերացնում սահմանադրական փոփոխությունների գործընթացը տապալելը: Զանգվածային ի՞նչ միջոցառումներ եք նախատեսում, քննարկվե՞լ է:
-Մենք հասկանում ենք այս հարցի կարեւորությունը, կենսական նշանակությունը, պարզ է, որ սա մի առանձին նախաձեռնության կամ քաղաքական ուժի լուծելիք հարց չէ, մենք այս պահին առավել շատ կարեւորում ենք դաշտի համախմբվածությունը, իհարկե միայն զանգվածային գործողություններով, շուրջօրյա հանրահավաքներով, նստացույցերով, երթերով է հնարավոր կասեցնել այս ծրագիրը, բայց պետք է համախմբվածություն, որը կկարողանա ժողովրդին ոտքի հանել: Մենք գիտենք, որ ժողովուրդը դեմ է, նախ այն պատճառով, որ այն առաջարկել է այս իշխանությունը, որը չունի ոչ մի լեգիտիմություն, եւ հետեւաբար գտնում ենք, որ համախմբվածությամբ հնարավոր է հասնել հաջողության:
-Իսկ ի՞նչ երաշխիքներ կան քաղաքական ուժերից: Նրանք հիմնականում վճռական պահերին ժողովրդին տուն են ուղարկում:
-Նմանատիպ դեպքեր եղել են: Վերջին դեպքը փետրվարյան դեպքերն են, երբ ժողովուրդը պատրաստ էր գալ հրապարակ, խոսքը փետրվարի 20-ի հանրահավաքի մասին էր, որը չկայացավ: Բայց ժողովուրդը հրապարակ առաջնորդների համար չէր գալիս, այլ այն, որ նրանք այս իշխանությանը դեմ են, եւ գտնում ենք, որ նրանք քանդում են ամեն ինչ, այդ ցանկությունը որեւէ տեղ չի կորել, եւ համոզված եմ, որ ճիշտ աշխատելու դեպքում հնարավոր է ժողովրդին բերել հրապարակ: Պետք է լինի բոլորի ակտիվ մասնակցությունը:
Հարցազրույցը՝ Փայլակ Ֆահրադյանի
Chuk-ի խոսքերից
Տակ չտո, ես նորամուծությունների կողմնակից եմ՝ ցանկացած տեսքով:
Մեջբերել
De gustibus et coloribus non est disputandum.
Էջանիշներ