Դպրոցները, մանկապարտեզներն ու բուհերն անհապաղ պետք է փակվեն, գրիպը տարածվում է. Արա Ասոյան
Այս պահին Հայաստանում A/H1N1-ով (խոզի գրիպ) վարակվածների թիվը հասել է 30-ի: Panorama.am-ի թղթակցի հետ զրույցում ՀՀ գլխավոր ինֆեկցիոնիստ Արա Ասոյանը ձեռնպահ մնաց գնահատել` ինչպիսին է հանրապետությունում գրիպի հետ կապված համաճարակային իրավիճակը: «Գրիպի համաճարակ է, ամբողջ աշխարհում էլ կա, հիմա էլ մեզ մոտ է», նկատեց ինֆեկցիոնիստը:
Նկատենք, որ մասնագետները բազմիցս են ասել, որ այսպես կոչված խոզի գրիպը սովորական գրիպն է ունի նույն ախտանշանները:
Այն, որ գրիպի համաճարակը շատ արագ է տարածվում, հաստատում են պոլիկլինիկաների տեղամասային թերապևտները: Մեզ հետ զրույցում պոլիկլինիկաներից մեկի մի տեղամասային թերապևտ տեղեկացրեց, որ օրական նրանք ունենում են 20-25 կանչ, ընդ որում` հիվանդների մեծ մասը երեխաներ են:
Ինչ վերաբերում է գրիպի հետևանքով օրերս արձանագրված մահվան երկու դեպքերին, Ասոյանն ասաց, որ նրանք մահացել են «գրիպի բարդություններից, դա եղել է նաև ամբողջ աշխարհում»:
Հաշվի առնելով այն, որ գրիպը տարածվում է արագ տեմպերով, Ասոյանը հանդես է գալիս կոչով` «Դպրոցները, մանկապարտեզները, բուհերը հրատապ պետք է փակվեն, գրիպը տարածվում է» : «Մեր նախարարը դրանով զբաղվում է, շուտով այդ մասին կլսեք», հավելեց նա:
Հիշեցնենք, որ խոզագրիպի հիմնական ախտանիշներն են` բարձր ջերմություն, գլխացավ, մկանային ցավ, հազ, անգինա, հնարավոր է նաև փսխում և ձիարեա (լուծ): Մարդկանց խորհուրդ է տրվում հաճախակի լվացվել օճառով, օգտագործել շատ հեղուկ, չհամբուրվել, չօգտագործել ուրիշի շրթներկը, բջջային հեռախոսը:
Աղբյուր` Panorama.am
Մեջբերել
Էջանիշներ