Էջմիածնի թիվ 2 ավագ դպրոցը հայտնվել է ոստիկանության ուշադրության կենտրոնում
[ 2011/02/18 | 12:00 ] Հիմնական թողարկում, հասարակություն
Գրիշա Բալասանյան
Նախարարության թողտվության հետևանքով դպրոցի տնօրենը աշակերտներին հրահրում է ուսուցիչների դեմ
Երեկ առավոտից խաթարվել էր Էջմիածնի թիվ 2 հատուկ դպրոցի ողջ աշխատանքը: Աշակերտները դաս անելու փոխարեն, դպրոցի տնօրեն Սուսաննա Նազարյանի եւ նրա համախոհ ուսուցիչների դրդմամբ, դուրս էին եկել դպրոցի բակ: Իրավիճակն այնքան է սրվել, որ դպրոց են ժամանել նաեւ ոստիկաններ, որպեսզի այնտեղից անվտանգ դուրս հանեն պատմության ուսուցչուհի Բահար Եղիազարյանին:
Ոստիկանություն զանգահարել է դպրոցի աշխատակիցներից մեկը այն բանից հետո, երբ դպրոցի դարպասների մոտ հսկողություն իրականացնող պահակը դուռը չի բացել, որպեսզի Բահար Եղիազարյանը դուրս գա դպրոցի տարածքից, իսկ այդ ընթացքում աշակերտները ցուցանակներով ու տարբեր վանկարկումներով փորձել են վիրավորել ուսուցչուհուն:
Իրավիճակը այս աստիճան չէր սրվի, եթե ՀՀ կրթության եւ գիտության նախարարությունը, որի ենթակայության տակ էլ գործում է ավագ դպրոցը, ժամանակին արձագանքեր ծնողներից մեկի գրավոր բողոքին, ինչը կապված է եղել տնօրեն Սուսաննա Նազարյանի վերաբերմունքի եւ ձեռնարկած գործողությունների հետ:
Բանն այն է, որ դեռեւս 2010թ. հոկտեմբեր-նոյեմբեր ամիսներին թիվ 2 ավագ դպրոցի 9-րդ դասարանի աշակերտ Ալբերտ Հարությունյանը միջանցքում լսել է, թե ինչպես է Սուսաննա Նազարյանը ցածր դասարանում սովորող մի աշակերտուհու ասել, թե ձեռքի բջջային հեռախոսը «կմցնի իրա մամայի համապատասխան տեղը» արտահայտությունը: Դրանից հետո Ալբերտն ասել է, թե «վայ արա, էս ուր ենք ընկել»: Ալբերտի ասածը լսել է տնօրենի որդին` Տիգրանը, որը սովորում է նույն դպրոցի 11-րդ դասարանում: Տիգրանն ու նրա ընկերները անընդհատ կռիվ են փնտրել Ալբերտի հետ, եւ նրանց հարաբերություններն ավելի է սրվել այս տարվա հունվարի 31-ին:
Ճակատագրական վիճաբանությունը տեղի է ունեցել հենց այդ օրը:
Ուսուցչուհի Բահար Եղիազարյանը Ալբերտի տատն է: Նա «Հետքի» հետ զրույցում ասաց, թե ուսուցիչներից մեկն իրեն ասել է, որ Ալբերտը դպրոցի բակում կռիվ է անում: Տատը զարմացել է, որ թոռը կռվի է բռնվել դպրոցում, քանի որ, նրա ասելով, Ալբերտը ընտանիքում այլ դաստիարակություն է ստացել: Երբ Բահար Եղիազարյանը Ալբերտին հարցրել է, թե ինչ կռվի մեջ է հայտնվել, տղան լացել է եւ դուրս եկել դպրոցից, որպեսզի հագուստի վրայի փոշին մաքրի: Այդ ընթացքում տատը նկատել է, որ Ալբերտի հագուստի վրա ոտնահետքեր կան:
Ալբերտը մեզ պատմեց, որ տնօրենի որդու` Տիգրանի գլխավորությամբ իր վրա հարձակվել են մոտ 9 տղաներ եւ, գցելով գետնին, սկսել են հարվածել ու հայհոյել:
Ծեծին մասնակից դպրոցում սովորող 2 տղաներից Բ. Եղիազարյանը հարցրել է կատարվածի պատճառը: Տղաներից մեկն ասել է, թե իբր իր քրոջ ներկայությամբ Ալբերտը հայհոյել է:
Պարզվում է, որ «հայհոյանք լսած» աղջիկը սովորում է Ալբերտի դասարանում, եւ նա Բ. Եղիազարյանի հետ զրույցում ժխտել է, թե Ալբերտը հայհոյել է իր ներկայությամբ: Այդ օրը կրքերը հանդարտվել են, սակայն հաջորդ օրը` փետրվարի 1-ին, տնօրենը Բահար Եղիազարյանին ասել է, թե թոռը դարձյալ կռիվ է արել իր որդու հետ:
Բ. Եղիազարյանի ասելով` մինչեւ ինքը փորձել է առանձին զրուցել Տիգրանի եւ Ալբերտին հետ, ներս է մտել տնօրենը եւ բռունցքով փորձել է հարվածել Ալբերտին, սակայն Ալբերտը բռնել է Սուսաննա Նազարյանի ձեռքը, որպեսզի հարվածը չկպնի նրան: Նույնը կրկնվել է նաեւ երկրորդ անգամ, ինչից հետո Ալբերտի վրա է հարձակվել տնօրենի որդին` Տիգրանը եւ սկսել է հարվածել նրան:
Դրանից հետո Ս. Նազարյանը զանգահարել է ոստիկանություն, եւ դպրոց է ժամանել անչափահասների գծով տեսուչը: Քանի որ տղայի հարազատները գիտեին, որ իրենց տղան խուլիգանական արարք կատարելու ընդունակ չէ, իրենք են առաջարկել տեսուչին, որ Ալբերտին հենց ոստիկանական բաժանմունքում հարցաքննեն:
«Բազմիցս ասել եմ, որ պետք չէ հնչեղություն տալ այս ամենին, քանի որ քաղաքը փոքր է, եւ ավելի մեծ հնչեղություն կստանա: Ասացի, որ` եկենք հարթենք, անցնի գնա: Հերթական անգամ, փորձեցի զրուցել տնօրենի հետ, նա ասաց, թե` դու ով էս, որ մտնես իմ աշխատասենյակ եւ ասաց, որ դպրոցից վերցնենք Ալբերտի աշակերտական գործը, հակառակ դեպքում` ինքը կհեռացնի նրան»,-պատմում է Բ. Եղիազարյանը:
Ալբերտի մայրը վատառողջ է, եւ հարազատները չեն ցանկացել, որ նա իմանա եւ մտահոգվի ստեղծված իրավիճակով, սակայն դպրոցի տնօրենը մնացել է անդրդվելի: Ալբերտի մայրը` Անահիտ Հարությունյանն իմանալով կատարվածի մասին, գնացել է դպրոց, որպեսզի անձամբ խոսի Սուսաննա Նազարյանի հետ, սակայն, վերջինս կրկնել է նախկինում ասածը` կամ տղային տեղափեխեն այլ դպրոց, կամ նրան կհեռացնի դպրոցից:
Անահիտ Հարությունյանը դիմում է գրել եւ վերցրել է տղայի փաստաթղթերը, միեւնույն ժամանակ դիմում է գրել կրթության նախարարին` ներկայացնելով դպրոցում ստեղծված վիճակը: Դիմումը նախարարություն է տարել փետրվարի 3-4-ին, սակայն մինչ օրս պատասխան չի ստացել: ԿԳՆ-ից մեզ հայտնեցին, որ դիմումը մակագրվել է ավագ դպրոցների հարցերով զբաղվող Նարինե Մնացականյանին: Նրանից պարզաբանում ստանալ չհաջողվեց, քանի որ երեկ չէր ներկայացել աշխատանքի:
Այժմ Ալբերտը սովորում է Էջմիածնի թիվ 5 դպրոցում:
Սուսաննա Նազարյանը փետրվարի 2-ին հրավիրել է մանկավարժական խորհրդի նիստ, որպեսզի քննարկեն Ալբերտի պահվածքը: Նիստում չի շոշափվել տնօրենի որդու անունը, եւ ամբողջ մեղքը տնօերնը բարդել է Ալբերտի վրա: Երբ տնօրենը հայտարարել է, թե իբր Ալբերտը ձեռք է բարձրացրել իր վրա, Բահար Եղիազարյանը փորձել է ընդհատել տնօրենին, բայց Սուսաննա Նազարյանը վերջին նախազգուշացումով նկատողություն է հայտարարել Բ. Եղիազարյանին` մանկխորհրդի նիստը խոչընդոտելու պատճառաբանությամբ:
Դպրոցում տիրող քաոսը այլ կերպ ներկայացրեց Սուսաննա Նազարյանը:
Նա շատ հանգիստ տեսք ուներ, կարծես, թե ոչինչ չէր կատարվում: Իսկ այդ ժամանակ աշակերտները դպրոցի բակում պաստառները ձեռքերին մի խումբ ուսուցիչների ուղեկցությամբ, աղմուկ-աղաղակ էին բարձրացնում:
Երբ տնօրենից հետաքրքրվեցինք, թե ինչու է դասապրոցեսը խաթարվել, Սուսաննա Նազարյանն ասաց, թե ոչ մի դասապրոցես էլ չի խաթարվել, պարզապես «մեծ դասամիջոց է»: Տնօրենն ասաց, թե կարողանում է վերահսկել իրավիճակը, եւ երեխաներին ճիշտ ժամանակին բարձրացնել դասի: Մինչդեռ, երբ տնօրենի հետ զրույցից հետո իջանք բակ, դասաժամը վաղուց սկսվել էր, սակայն այդպես էլ երեխաները չէին շտապում բարձրանալ դասարաններ: Ուսուցիչներից մեկը, տեսնելով, որ երկար ենք մնում դպրոցի տարածքում, այդ մասին տեղեկացրեց տնօրենին, ինչից հետո Ս. Նազարյանը նույն հանգիստ տոնով իջավ բակ եւ աշակերտներին հորդորեց գնալ դասի:
Ներկայացնելով ստեղծված իրավիճակի պատճառը` տնօրենն ասաց, թե աշակերտների միջեւ վիճաբանությունը սկսվել է հունվարի 31-ին եւ, ըստ նրա, պատճառը եղել է Ալբերտը:
«Ինքնահաստատվելու պատրվակով սեռական բնույթի հայհոյանքներ է տվել բոլոր նրանց հասցեին, ովքեր կհանդգնեն իրեն որեւէ բան ասել: Միջանցքում նաեւ եղել են աղջիկներ, դպրոցի տղաները մոտեցել եւ նկատողություն են արել Ալբերտին, դրանից հետո Ալբերտը հարվածել է իրեն նկատողություն արած տղաներին եւ սկսել են քաշքշել նրանց»,-ասում է Ս. Նազարյանը:
Նրա ասելով` կռվի ժամանակ ուսուցիչները կանչել են նաեւ իրեն եւ վերջինս երեխաների, նրանց դասղեկի եւ Բահար Եղիազարյանի հետ առանձնացել եւ սկսել են վերլուծել, թե ինչ է կատարվել: Այդ ժամանակ իբր Ալբերտը խոստովանել է, որ նկատողություն արած տղաներին ինքն է խփել: Տնօրենն էլ ասել է, թե նա պիտի ներողություն խնդրի, սակայն Ալբերտը ներողություն չի խնդրել եւ տնօրենին հրել, գցել է նստարանների վրա, ինչպես նաեւ քաշել է նրա ձեռքը:
«Ինձ թվում է, եթե ձեր մորը ձեր աչքի առաջ խփեին, դուք, նաեւ եթե աղջիկ լիներ, պիտի պատիվ պահանջեիք: Իմ որդին ընդամենը պատիվ է պահանջել Ալբերտից»,-ասում է Ս. Նազարյանը` թաքցնելով այն հանգամանքը, որ «պատիվ պահանջելը» եղել է 9 հոգանոց խմբի հարձակում միայնակ աշակերտի վրա:
Թեմային օրերս անդրադարձել է նաեւ թերթերից մեկը, ինչը էլ ավելի է վրդովեցրել Սուսաննա Նազարյանին: Նա երեկ չէ առաջին օրը հավաքել է մանկավարժներին, կարդացել է տպագրված հոդվածը եւ հերթով ստիպել է բոլոր ուսուցիչներին, որպեսզի նրանք վատ խոսքեր ասեն ուսուցչուհի Բահար Եղիազարյանի հասցեին` ասելով, թե հոդվածը նրա ձեռքի գործն է եւ նա խաթարում ու վարկաբեկում է իրենց դպրոցի աշխատանքները:
«Տնօրենը հրահրել եւ ուղղորդել է, թե մանկավարժներից ովքեր ելույթ ունենան: Մի քանի օր առաջ էլ իր կաբինետում էլ ինձ ասաց, թե քեզ շանտաժ կանեմ, թե քո տղան ոստիկանությունում է աշխատում, աղջիկդ էլ հիվանդանոցում ու կաշառք են վերցնում»,-պատմում է Բահար Եղիազարյանը:
Սուսաննա Նազարյանը հերքեց, թե նա ամիսներ առաջ վիրավորել է աշակերտուհուն` ասելով, որ դա իրականությանը չի համապատասխանում: «Աշակերտները գիտեն, որ իրենց տնօրենը չի հայհոյում, իրեն կոռեկտ մանկավարժի պես է պահում»,-ասաց տնօրենը:
Իսկ այսօր լարված մթնոլորտը հասել է իր գագաթնակետին: Առավոտյան Բ. Եղիազարյանը մատյանը ձեռքին մտել է դասարան, մի քանի րոպե անց զանգահարել են նրա բջջային հեռախոսին եւ հրավիրել են ուսուցչանոց: Ուսուցչուհին պատմում է, որ երբ ներս է մտել, նույն ուսուցիչները սկսել են քննադատել նրան:
«Տնօրենը գոռալով ներս մտավ եւ սկսել ուսուցիչներին հերթով հարցնել` դու հանդուրժում ես, դու տանում էս այս ամենը… Հետո էլ այնտեղ ինչ-որ բան էին գրում, թե կոլեկտիվի պատվի հետ եմ խաղացել, իմ դեմ ելույթներ եղան: Նույնիսկ այն ուսուցիչները, ովքեր փետրվարի 2-ի մանկխորհրդի նիստի ժամանակ ինձ ասում էին, թե ինչ լավ արեցիր, որ հակառակվեցիր տնօրենին, երեկ կանգնել էին ու գովում էին տնօրենին ու ինձ քննադատում էին: Մարդն ինձ համար մնաց անհասկանալի, թե ինչ է մարդը: Բա ուր մնաց բարոյականությունն ու խիղճը»,- ասում է Բ. Եղիազարյանը:
Ս. Նազարյանն ասաց, թե Բ. Եղիազարյանն է լքել դասապրոցեսը եւ նրան ոչ ոք դուրս չի արել: «Ի դեպ` ասեմ, որ Բահար Եղիազարյանն ազգությամբ թուրք է եւ աշակերտների մոտ ինքն է զայրույթ առաջացրել: Երբ աշակերտները քարտեզ են բերել, որպեսզի այն տան դասղեկին, նա ասել է, թե` պատռեք քարտեզը: Աշակերտներն ասել են, թե` ինչու պիտի Հայաստանի քարտեզը պատռենք, ասել է, թե` հին է»,- ասում է Ս. Նազարյանը:
Բահար Եղիազարյանը հուզվել եւ իրեն վատ է զգացել, երբ տնօրենն իրեն անվանել է թուրք եւ մեղադրել հայատյացության մեջ: «Բոլորը գիտեն, թե ես ինչ ցավ եմ տանում, որ մարդիկ գնում են Հայաստանից: Բոլորը կասեն, թե ինչ հայրենասիրություն եմ քարոզել երեխաներին: Ես միշտ ասել եմ, որ չմոռանան Ցեղասպանությունը, հայրենասեր լինեն եւ մեծ հույսով լցվեն դեպի ապագան: Տեսեք, թե տնօրենն ուր է հասել: Երեխայի մանկությունը փշրեցին, իմ 35 տարվա մանկավարժական ուղուս հետ տեսեք թե ինչպես վարվեցին իրենք»,-հուզված ասում էր Բ. Եղիազարյանը:
Նշենք, որ ուսուցչուհին արդեն 35 տարի է` հայոց պատմություն է դասավանդում, եւ Էջմիածնում ունի պատմության մասնագետի լավ համբավ: Նրա հայրը Իրանում ապրող թաթ ազգից է եղել, իսկ մայրը` հայուհի է: Բ. Եղիազարյանն իրեն թուրք չի համարում եւ վիրավորվել է տնօրենի ասածից:
Երբ Սուսաննա Նազարյանից հետաքրքրվեցինք, թե առավոտյան ինչու են ոստիկանները ժամանել դպրոց, տնօրենը մի քանի վայրկյան լռելուց հետո ասաց. «Ոստիկանները, լրագրողները, որ գալիս են, մենք չենք իմանում, ու մեկ էլ հայտնվում են պատահական մարդիկ»: Նշենք, որ դպրոցի տարածք պատահական մարդիկ չեն կարող հայտնվել, ինչպես որ տնօրենն է ասում: Բացի կողպեքով փակվող դարպասից, տարածքը հսկվում է նաեւ տեսախցիկներով:
«Դուրս էի ուզում գալ, բայց դարպասը փակել էին, երեխաներին դուրս էին հանել բակ: Աշակերտները պատուհանից դուրս ու ներս էին անում: Երեխաները բաներ էին գրում բերում փակցնում, կեսն էլ չգիտեին, թե ինչ է կատարվում: Դռնապահը դուռը չէր բացում, ասում էր` մինչեւ տնօրենը չասի, չեմ բացի, ոստիկանները եկան, իրենց պահանջից հետո նոր միայն դռները բացել են»-պատմում է Բ. Եղիազարյանը:
Դպրոցի տարածքում հավաքվել էր նաեւ մի քանի ծնող, ովքեր տեղեկանալով տնօրենի կազմակերպած «շոուի» մասին, շտապել էին դպրոց: Ծնողները խոսեցին մեզ հետ, սակայն խնդրեցին իրենց անունները չհրապարակել, քանի որ տնօրենը նույն ձեւով իրենց երեխաների հետ հաշվեհարդար կտեսնի:
Ծնողներից մեկը Ալբերտի դասընկերոջ մայրն էր: Նա ասաց, թե Ալբերտը միշտ էլ աչքի է ընկել լավ վարքով, եւ ոչ ոք չի հավատում, որ նա կարող էր իրեն վատ պահել դպրոցում: «Տնօրենի մասին ամբողջ Էջմիածինը գիտի: Նա դպրոցը դարձրել է իր սեփականությունը եւ իր երեխաների հետ ինչ ուզում անում է»,-ասաց ծնողներից մեկը:
Նշենք, որ ոստիկանության Էջմիածնի բաժանմունքի քննչական բաժնում կատարվածի վերաբերյալ նյութեր են նախապատրաստվում: Երեկ առավոտյան բացատրություն են տվել Ալբերտն ու Բահար Եղիազարյանը:
Մեջբերել
Նաիրուհի-ի խոսքերից
)
Էջանիշներ