ՄՏՔԻ ԳԻԳԱՆՏԸ ՎԻՐԱՎՈՐՎԵԼ Է
Ուղիղ 10 օր «քցել-բռնելուց» հետո Ռոբերտ Քոչարյանը երեկ վերջապես որոշել էր պատասխանել ՀՀ առաջին նախագահ Լեւոն Տեր-Պետրոսյանի` մայիսի 2-ին Համաժողովրդական շարժման երկրորդ կոնգրեսի ժամանակ հնչած ելույթին, մասնավորապես` մարտի 1-ի դեպքերի եւ դրանց առնչությամբ Ռոբերտ Քոչարյանի ունեցած դերակատարման մասին առաջին նախագահի հայտարարություններին: Ու ծանոթանալով Քոչարյանի մտքերին, որ նա հայտնել է «Մեդիամաքսին» տված հարցազրույցում, ընդամենը ակնհայտ է դառնում, որ 10 օրը նրա համար քիչ էր. «Հայաստանի երկրորդ նախագահը» չպետք է շտապեր Լեւոն Տեր-Պետրոսյանին պատասխանելու գործում, նա պետք է երկար, շատ երկար մտածեր դա անելուց առաջ: Սակայն Ռոբերտ Քոչարյանը չի մտածել, եւ մենք ունենք այն, ինչ ունենք, այսինքն` ունենք խղճահարություն առաջացնելու աստիճան տխուր մի պատասխան: Լեւոն Տեր-Պետրոսյանի` կետ առ կետ, պարբերություն առ պարբերություն հնչեցված գրավոր ու անհերքելի փաստերի վրա հիմնված մեղադրանքներին Ռոբերտ Քոչարյանի հիմնական պատասխանն այսպիսին է. «Չեմ անդրադառնա իրադարձությունների ժամանակագրության մանրամասներին. հետաքննությունը պետք է րոպե առ րոպե վերականգնի մարտի 1-ից 2-ը Երեւանում տեղի ունեցածի պատկերը: Հույս ունեմ, որ դրանով կզբաղվի նաեւ հատուկ հանձնաժողովը, որն առաջարկում է ստեղծել Եվրոպայի խորհուրդը: Հուսով եմ նաեւ, որ բոլոր նյութերը կհրապարակվեն, եւ ցանկացած քաղաքացի կկարողանա ինքնուրույն տարանջատել ճշմարտությունը ստից»: Սրանից դուրս Քոչարյանը պատասխանում է միայն հնչեցված այն հատուկենտ մեղադրանքներին, որոնց որեւէ, թեկուզ մի խղճուկ պատասխան ինքը կարողացել է մտածել այս 10 օրվա ընթացքում: Գայթակղությունը, իհարկե, մեծ է համեմատության մեջ դնել Ռոբերտ Քոչարյանի եւ Լեւոն Տեր-Պետրոսյանի խոսքերը, սակայն ամենամեծ ցանկության դեպքում անգամ հնարավոր չէ դա անել: Եւ այնուամենայնիվ, հիշատակման է արժանի Քոչարյանի բացատրություններից մեկը, թե «ինչու դեռեւս մեղադրանքներ չեն ներկայացվել ոստիկանության նկատմամբ զենք օգտագործելու համար»: «Որովհետեւ դեռեւս բազմաթիվ կարեւոր գործող անձինք թաքնվում են հետաքննությունից»,- ասում է Քոչարյանը: Ընթերցողի հետաքրքրությունը բավարարելու համար` նշենք, որ ՀՀ գլխավոր դատախազության մարտի 19-ի հաղորդագրությամբ մարտի 1-ի գործով հետախուզում է հայտարարվել չորս հոգու նկատմամբ, որոնցից մեկը հայտնաբերվել է, մնացել են երեքը` Խաչատուր Սուքիասյանը, Նիկոլ Փաշինյանը եւ Արմեն Վարդանյանը: Դրանից հետո մարտի 1-ի գործով որեւէ հետախուզման հաղորդագրություն չի եղել: Այսինքն, երբ Քոչարյանն ասում է, որ բազմաթիվ կարեւոր գործող անձինք թաքնվում են, ի նկատի ունի վերոնշյալ երեք հոգուն: Այն, որ Նիկոլ Փաշինյանն ու Խաչատուր Սուքիասյանը կարեւոր անձնավորություններ են, բոլորը գիտեն, բայց որ երեք հոգու մասին խոսելիս կարելի է օգտագործել «բազմաթիվ» բառը, իսկապես նորություն է: Իսկ ընդհանրապես, հետախուզման մեջ գտնվողներին զենքի օգտագործման մեղադրանքի հետ կապելով` Ռոբերտ Քոչարյանը թերեւս միայն հուշել է իրենց հետագա մտադրությունները, այն է` զենք կրելու եւ օգտագործելու մեղադրանքներն ուզում են ներկայացնել այս երեքին կամ միգուցե նրանցից մեկին: Օրինակ` ի՞նչ վատ կլինի, նախաքննությունը կարող է պարզել, որ, ասենք, Նիկոլ Փաշինյանն ու Խաչատուր Սուքիասյանը հարթակից ժամանակ առ ժամանակ վազել են, կրակել զինվորների ուղղությամբ, նռնակներ շպրտել, հետո կրկին վերադարձել հարթակ եւ սկսել խոսել: Ռոբերտ Քոչարյանի եւ Աղվան Հովսեփյանի համատեղ ջանքերով, իհարկե, կարող են գտնվել նաեւ համապատասխան «փաստերե եւ նույնիսկ «ականատեսներ»: Իսկ վերադառնալով Քոչարյանի հարցազրույցին` նշենք, որ «Հայաստանի երկրորդ նախագահը» մի հարցում անգերազանցելի է. դա ցինիզմն է: Եւ երեկվա իր հարցազրույցում նա կրկին փայլել է իր այդ որակով: «Լեւոն Տեր-Պետրոսյանը բարդ հարաբերություններ ունի բարոյականության հետ»,- ասել է Քոչարյանը: Պետք է նկատել, որ սա ցնցող գնահատական է բարոյականության մարմնացում, մտքի գիգանտ Ռոբերտ Քոչարյանի կողմից: Այսպես թե այնպես, «Հայաստանի երկրորդ նախագահն» իսկապես վատ վիճակում է հայտնվել: Պատկերացնո՞ւմ եք, թե պաշտոնանկությունից հետո նա ինչ հաճույքով պիտի տար առաջին հարցազրույցը` նվիրված իր պաշտոնավարման ընթացքում Հայաստանի Հանրապետության վերելքի տասը տարիներին: Բայց արի ու տես, կատարելապես փչացել են Ռոբերտ Քոչարյանի պլանները, եւ նա ստիպված է արդարանալ, արդարանալ եւ կրկին արդարանալ: Ու սա դեռ «ռազմինկան» է, Քոչարյանը, իհարկե, երկար պետք է իր համար արդարացումներ մոգոնի:
Հ.Գ. ՀՀ առաջին նախագահն իր ելույթում Սերժ Սարգսյանի հասցեին մարտի 1-ի արյունահեղության մասով մեղադրանքներ չի հնչեցրել եւ դեռ թափված արյունից մաքրվելու ուղիներ է նախանշել նրա համար: Այս ընթացքում Սերժ Սարգսյանի եւ նրան սատարող ուժերի կողմից որեւէ դժգոհություն Ռոբերտ Քոչարյանի հասցեին արված մեղադրանքների առիթով չի նկատվել, եւ այս վիրավորական անտարբերությունը ստիպել է, որպեսզի Քոչարյանն անձամբ հոգ տանի իրեն պաշտպանելու մասին:
www.hzh.am
Մեջբերել
Dn. Noy-ի խոսքերից
Re. ՀՀ նախագահներ
Էջանիշներ