Եկեք այստեղ տեղադրենք մեր կարծիքով հաջողված հայերեն մանկական բանաստեղծություններ: Հիշենք մեր մանկության սիրելի բանաստեղծությունները, ինչպես նաև արդեն հասուն տարիքում կարդացած բանաստեղծություններից մեզ դուր եկածները և դրանցից ընտրանի կազմենք:Գուցե Ակումբ մտնող երիտասարդ մայրիկներ լինեն, որոնց մանկական լավ բանաստեղծություններ պետք կգան իրենց փոքրահասակ երեխաների համար:
Հիշում եմ, երբ փոքր էի, տատիկս ինձ համար կարդում ու սովորեցնում էր Գուրգեն Գաբրիելյանի բանաստեղծությունները:Դրանցից մի քանիսը հիմա տեղադրում եմ: Առաջին երկուսը կատակ-բանաստեղծություններ են.
ԳՈՒՐԳԵՆ ԳԱԲՐԻԵԼՅԱՆ
ՄԵԾԱՆՈՒՄ ԵՄ
Տատիկն ասաց, թե անձրևից
Բոյ է քաշում ծիլը հողից:
Մեծանում է ամեն մի բան,
Նույնիսկ կաղնին հսկայական:
Վահեն լսեց, և, այ կատակ`
Իջավ, կանգնեց անձրևի տակ:
Տատիկը թե`
- Ի՞նչ ես անում:
- Մեծանում եմ,
Բա չես տեսնու՞մ:
ՓՈՔՐԻԿԻ ԽՐԱՏԸ
Այ ժամացույց, ժամացույց,
Դու չե՞ս հոգնում խոսելուց,
Մի բերան հենց`տիկ, հա տիկ...
Բա դու չունե՞ս մի տատիկ,
Որ քեզ ասի.
- Սուս արա,
Գլուխներս դու տարար:
Հերիք խոսես ու շարժես
Սլաքներ ու ճոճանակ,
Քո չափ թե որ ես խոսեմ,
Տատն ինձ կասի.
- Չաչանակ:
ԽՈԶԸ
Խոզը մտավ մի պարզ լիճ,
Մաքրեց մի լավ դունչ ու պինչ,
Հետո ելավ ու ասավ.
- Ախ, ինչ կեղտոտ ջուր է սա:
Մեջբերել
Էջանիշներ