Էնթոնի Դե Մելլո

[Sambitbaba]

ՄՈՑԱՐՏԻ ԽՈՐՀՈՒՐԴԸ

Մի անգամ մի երիտասարդ երգահան եկավ Մոցարտի մոտ։ Նա ցանկանում էր իմանալ, թե ինչպե՞ս զարգացնի իր տաղանդը։
- Կարծում եմ, հարկավոր է սկսել հասարակ կոմպոզիցիաներից, - խորհուրդ տվեց Մոցարտը։ - Օրինակ, երգերից։
- Բայց չէ՞ որ դուք դեռ երեխա ժամանակ արդեն սիմֆոնիաներ եք ստեղծել, - բողոքեց երիտասարդը։
- Այո, դուք ճիշտ եք։ Բայց չէ՞ որ ես ոչ մեկից խորհուրդ չեմ հարցրել, թե ինչպես զարգացնեմ իմ տաղանդը։

[Sambitbaba]

ԱՍՏՎԱԾ ԳՈԼՖ Է ԽԱՂՈՒՄ

Մի անգամ, եկեղեցական ծիսակատարությունից հետո, Աստված և սուրբ Պետրոսը գնացին գոլֆ խաղալու։ Առաջինը հարվածը կատարեց Աստված։ Նա այնպիսի մի հզոր հարված հասցրեց, որ գնդակը թռավ մինչև դաշտի հեռավոր անկյունը։

Չհասցրեց գնդակը դիպնել գետնին, երբ թփերից դուրս թռավ մի նապաստակ, հափշտակեց գնդակն ու փախավ անտառ։ Հանկարծ երկնքից քարի պես ցած ընկավ մի արծիվ, ճանկեց նապաստակին ու նորից երկինք սլացավ։ Որսորդը նշան բռնեց ու հրացանազարկ արեց արծվին։ Արծիվը ճանկերից բաց թողեց նապաստակին։ Վերջինս ընկավ գետնին, նրա բերնից դուրս թռավ գնդակն ու ընկավ ուղիղ գնդափոսիկը։

Սուրբ Պետրոսը շուռ եկավ դեպի Աստված և ջղայնացած ասաց.

- Վերջացրու՛ այդ ծեծկռտոցը։ Դու այստեղ գոլֆ խաղալո՞ւ ես եկել, թե՞ Քեզ ցուցադրելու։


Իսկ դո՞ւք։ Ցանկանո՞ւմ եք արդյոք հասկանալ կյանքի խաղը, թե՞ ուղղակի հիմարի եք տալիս, հավատալով տարբեր հրաշքների։

[Sambitbaba]

ՋՐՄՈՒՂԱԳՈՐԾՆ ՈՒ ՆԻԱԳԱՐԱՅԻ ՋՐՎԵԺԸ

Արհեստավորի ուսումնարանը հենց նոր ավարտած մի երիտասարդ ինքնավստահ ջրմուղագործի՝ մեկ անգամ բերեցին տեսնելու Նիագարայի ջրվեժը։ Մեկ րոպե նայելով ջրվեժին, նա ասաց. “Կարծում եմ, գլուխ կհանեմ”։

[Sambitbaba]

ՏԻԿԻՆ ՊԱՄՖԵՄՓԹՈՆՆ ՍՊԱՍՈՒՄ Է ԸՆԿԵՐՈՋԸ

Տիկին Պամֆեմփթոնը թեյի էր հրավիրել մի ծանոթ պարոնի։ Նա լավ վարձատրեց իր սպասավորուհուն և ասաց.
- Վերցրու սա։ Երբ լսես, որ ես օգնություն եմ կանչում, կարող ես տուն գնալ։

[Sambitbaba]

ՀԱՐԳԱՐԺԱՆ ՀՈԳԵՎՈՐԱԿԱՆԸ ԽՈՍՏՈՎԱՆՈՒՄ Է ՀԱՆՑԱԳՈՐԾՈՒԹՅԱՆ ՄԵՋ

Իննսուներկուամյա հոգևորականին քաղաքում հարգում էին բոլորը։ Փողոցում հանդիպելիս, մարդիկ խորը խոնարհվում էին նրա առջև. նա սուրբ էր և անբասիր համբավ ուներ։
Մի անգամ նա անհետացավ։ Այնպիսի տպավորություն էր, որ նա ուղղակի չքացել է օդում, - քաղաքի բնակիչների կողմից կազմակերպված ինտենսիվ որոնումները ոչինչ չտվեցին։ Բայց մեկ ամիս անց հոգևորականն ինքը հայտնվեց։
- Տե՛ր Աստված, սուրբ հա՜յր, - գոչեցին նրան տեսնողները։ - Ո՞ւր էիք դուք այս ամբողջ ամիս։
- Բանտում, - հանգիստ պատասխանեց հոգևորականը։
- Ինչպե՞ս թե բանտում։ Ախր դուք ճանճի՛ անգամ չէք նեղացնի։
- Դա երկար պատմություն է, - պատասխանեց ծերունին։ Ես գնացքի տոմս էի գնել և սպասում էի կայարանում, երբ շլացուցիչ գեղեցկության մի աղջիկ տեսա, որին ուղեկցում էր ոստիկանը։ Նա չափեց ինձ հայացքով, հետո շուռ եկավ դեպի ոստիկանն ու ասաց. “Ահա՛ նա”։ Եթե ճշմարիտն ասեմ ձեզ, ես այնքան էի շոյված, որ ինձ վրա վերցրեցի մեղքը։

[Sambitbaba]

ԹԵ Ի՞ՆՉԸ ԿԱՐՈՂ Է ԲԱՐՈՆԻ ՏԻՏՂՈՍԻՑ ԱՎԵԼԻ ԼԱՎ ԲԱՆ ԼԻՆԵԼ

Բրիտանական մի ազդեցիկ քաղաքական գործիչ անդադար նեղում էր Դիզրաէլիին, որպեսզի վերջինս իրեն բարոնի տիտղոս տա։ Դիզրաէլին չէր կարող իկատար ածել այդ մարդու խնդրանքը, և վերջիվերջո նրան հաջողվեց մերժել մարդուն այդ հարցում, դրա հետ միասին չվիրավորելով խնդրողի զգացմունքները։ Դիզրաէլին ասաց.

- Ցավում եմ, որ չեմ կարող ձեզ բարոնի տիտղիս տալ, բայց ես կտամ ձեզ առավել արժեքավոր մի բան. կարող եք ասել ձեր մոտիկներին, որ ես ձեզ բարոնի տիտղոս առաջարկեցի, իսկ դուք հրաժարվեցիք այն ընդունել։

[Sambitbaba]

@ @ @

Երբ կոշիկիդ չափսը համապատասխանում է քեզ,
ոտքիդ մասին մոռանում ես;
երբ գոտուդ չափսը համապատասխանում է քեզ,
մեջքիդ մասին մոռանում ես;
երբ ամեն ինչ շուրջդ
ներդաշնակության մեջ է,
դու մոռանում ես
քո էգոյի մասին։
Ուրեմն,
ինչի՞դ է պետք
քո
ճգնավորությունը։