Քանի որ Voter մականվամբ մասնակիցը դեռ հնուց ունի երկար, բարակ, գեղեցիկ ընտրված բառերով, երկար տեքստերով, իբր պատճառահետևանքային կապերով, բայց իրականում դատարկաբանական գրառումներով այլոց մոլորության մեջ գցելու մեծ տաղանդ, իսկ ես երբեմն էմոցիոնալ ու կարճ գրառումներով ոմանց մոտ տպավորություն եմ ստեղծում, թե ասելիք չունեմ ու ակամա Voter-ի դատարկաբանությունը ոմանց աչքին դարձնում եմ ճշմարտանման, փորձեմ այս հնչած բողոքներին հնարավորինս կոնկրետ արձագանքել:
Ամեն ինչ սկսվեց Բիձա մականվամբ մասնակցի թեմայից դուրս ու անհարկի բողոքից, որ իբր ակումբում ԽԾԲ-ով հարցեր են լուծվում, իրենք «բամբեժկեքի» տակ են, բաժին է փակվում, խոսքի ազատություն չկա: Այս ամենը բացարձակ զրպարտություն է: Սկսենք նրանից, որ ակումբում ոչ մեկը «բամբեժկեքի» տակ չեն, ընդամենը կիրառվում են հստակ ու կուռ կանոնները, չի թույլատրվում անցնել չափերը, ինչի արդյունք է ակումբի տարիներ շարունակ գործելն ու բարգավաճելը: Եթե Բիձային թվում է, թե ինքը կարող է կանոն խախտել ու մնալ անպատիժ, ապա ինքը խստորեն սխալվում է. այս տրամաբանությամբ մտածող յուրաքանչյուր մասնակից վաղ թե ուշ արգելափակվելու է, արգելափակվելու է ոչ թե մեր քմահաճույքից ելնելով, այլ իր կատարած խախտումների համար, կանոնադրությունից ելնելով, ակումբի բնականոն ընթացքը, քննարկումների նորմալ հունն ապահովելու համար: Այնպես որ մեր հարգարժան Բիձային խորհուրդ եմ տալիս մանրամասն ծանոթանալ ակումբի կանոնադրությանը և այսուհետ հետևել դրանց: Թեև պետք է խոստովանեմ, որ դեռևս լուրջ խախտումներ նրա մոտ չի արձանագրվել, ստացել է 5 տուգանային միավոր, որոնցից 3-ը թեմայից դուրս գրառումների պատճառով, մեկը անլուրջ գրառման համար, մեկը՝ սմայլերի չարաշահման: Հետևաբար խոսքս վերաբերվում է միայն ու միայն նրա բողոքի տրամաբանությանը. այդ տրամաբանությամբ ակումբում գործելն անընդունելի է, այստեղ մշտապես ղեկավարության կողմից լինելու է վերահսկողություն, որն, ի դեպ, երբևէ չի սահմանափակելու խոսքի ազատությունը: Պարզապես հարկ է, որ հարգելի Բիձան կարողանա տարբերակել խոսքի ազատությունը ամենաթողությունից:
Ինչ վերաբերվում է փակված բաժնին, ապա թերևս հարգելի Բիձան նկատի է ունեցել փակված թեման: Այո՛, ակումբում թեմաներ փակվում են, բայց դա ոչ մի դեպքում չի կարելի համարել խոսքի ազատության սահմանափակում: Ֆորումներում թեմաների փակումն ընդունված պրակտիկա է ողջ աշխարհում, դրա համար կան բազում պատճառներ, ինչպիսիք են թեմայի անլրջությունը, քննարկված հարցի ավարտուն լինելը, նույն մտքի կարուսելային անվերջ պտտումները, նախնական ընթացքից լրիվ շեղումը, վեճի կամ կռվի վերածված լինելը և այլն:
Թեման, որի փակելուց վրդովվել էր Բիձան, փակվել է քաոսի վերածված լինելու պատճառով: Այն ավելին չէր, քան ինչ-որ զրուցարան, որտեղ ինչ-որ հստակ բան չի քննարկվում, այլ ում մտքից ինչ անցնում է, գրում է: Թեման միանշանակ փակման ենթակա էր: Ինչևէ, յուրաքանչյուր ոք իրավունք ունի սրա հետ համաձայնվել կամ չհամաձայնվելու, ավելին, իրավունք ունի բողոքելու. ակումբում, բարեբախտաբար, կա խոսքի ազատություն ու նման բողոքները թույլատրվում են: Սակայն այլ թեմայում թեմայից դուրս գրառման տեսքով բողոքելը հակականոնադրական է. բողոքելու համար տարբեր միջոցներ, որոնք են.
- Տեղեկացման համակարգի միջոցով անհամաձայնության հայտնում ու հիմնավորումը,
- Փակող մոդերատորին նամակագրական համակարգով անհամաձայնության հայտնումն ու հիմնավորումը,
- Փակող մոդերատորի «վերադասին», այն է ավագ մոդերատորներից որևէ մեկին կամ ադմինիստրատորներից որևէ մեկին անհամաձայնության հայտնումն ու հիմնավորումը,
- Համապատասխան բաժնում (Ակումբի անցուդարձ -> Առաջարկություններ և դիտողություններ) ի տես ընդհանուրի անհամաձայնության հայտնումն ու հիմնավորումը:
Նշված տարբերակներից որևէ մեկը չի ընտրվել, ընտրվել է ակումբի կանոնադրության խախտումով անհամապատասխան, այլ թեմայում բողոքելը, ինչը հետո վերածվել է քննարկման, այդ ընդհանուր թեմայից դուրս քննարկման մասնակից է դարձել նաև մոդերատոր Elmon, հարգարժան Voter-ը: Բնական է, որ բոլոր այդ գրառումները պետք է ստանային տուգանային միավորներ ու ջնջվեին կամ տեղափոխվեին համապատասխան բաժին:
Voter-ի պնդումը, որ իբր դրանով ցույց եմ տվել, որ եթե ադմինիստրատիվ ռեսուրս չկիրառվեր, խախտումներով գրառումները կմնային, ծիծաղ է առաջացնում: Իհարկե կմնային, եթե ադմինիստրատիվ ռեսուրս չկիրառվեր: Ադմինիստրատիվ ռեսուրս ասելով հասկանում ենք ղեկավար կազմի ունեցած տեխնիկական հնարավորությունները. տուգանել, ջնջել, տեղափոխել գրառումները և այլն: Բնական է, որ ցանկացած ֆորումում եթե կարգը խախտվում է, ապա այն վերականգնվում է հենց այդ միջոցներով:
Ավելին ասեմ. ես ինքս պատահել է, որ արել եմ կանոնադրությունը խախտող գրառումներ: Ղեկավարության ճկունության ամբողջ հմայքն այն է, որ ղեկավարներից յուրաքանչյուրը մյուսին զսպելու մեխանիզմ ունի: Եվ ահա այդպիսի դեպքերում եղել է, որ նույն Elmo-ն ինձ կարողացել է զսպել մոդերատորական զգուշացում տալով ու գրառումներս հեռացնելով, ճիշտ էնպես, ինչպես այս անգամ ես իրեն զսպեցի ու զսպեցի մյուս երկու կանոն խախտողների (Բիձային ու Voter-ին):
Եթե Voter-ը կարծում է, որ այս գրառումները պետք է մնային «Վաճառվում է Հայաստանը» քննարկման լրիվ այլ նյութ ունեցող թեմայում, ապա ես միայն կարող եմ տարակուսել, եթե ինքը կարծում է, որ կարող է մտնել կարտոֆիլների մասին թեմա ու խոսել համակարգի աքսեսուարներից, իսկ մոդերատորները պարտավոր են առանց պատժելու այդ գրառումները տեղափոխվել համապատասխան թեմա, ապա ինքը պարզապես սխալվում է: Հարգելի Voter-ը հաճախ է սիրում խոսել իր ստորագրության մեջ գրված ֆորումի մասին, գովել այն, ահա, եթե այդ ֆորումում այդպես են վարվում, ապա ես բնավ չեմ ափսոսում, որ ամեն անգամ այդ ֆորումի առաջին էջը բացելուն պես արտաքին տեսքից «վատանալով» փակել եմ այդ ֆորումը, որովհետև նման կանոններով ֆորումում ես տեղ չունեմ: Ով որ կարծում է, որ այդպես է նորմալ, խնդրեմ, ունի այլընտրանք, իսկ ահա ակումբը ունեցել է և ունի կուռ կանոններ ու մշտապես գործելու է այդ կանոններին համապատասխան, ի հեճուկս բոլոր նրան նախանձողների
Ցանկանում եմ անդրադառնալ նաև այլ մտքի, ըստ որի Voter-ը պնդում էր, որ այստեղ ԽԾԲ-ով են մոդերատոր դառնում: Ցանկանում եմ պարզապես ծիծաղել այդ մտքի վրա: Ակումբը ֆորում է, որն ունի իր տերը (դա ես եմ), ու բնական է, որ մոդերատորներ ընտրելիս ես պիտի ընտրեմ վստահելի մարդկանց: Վստահելի մարդ չի նշանակում ԽԾԲ: Ակումբում բազում են եղել թե ընտրովի, թե նշանակովի մոդերատորներ, ում ես պարզապես չեմ ճանաչել, ճանաչել եմ միայն գրառումներից ու ՎՍՏԱՀԵԼ: Մյուս կողմից եթե Պողոսը մտերիմ ընկերս է ու նրան մոդերավորումը չեմ վստահում, համարում եմ որ չի կարող անել, ապա նա երբեք մոդերատոր չի դառնա՝ ոչ ընտրությամբ, ոչ նշանակվելով: Սա հստակ է: Ու արդյունքում սակավ են եղել մոդերատորները, ում գործունեությունը չի արդարացրել:
Անշուշտ բողոքներ միշտ լինելու են:
Լինելու են արդարացի բողոքներ ու լինելու են չարախոսություններ:
Ակումբը մեծ ֆորում է, ակտիվ ֆորում է, շատ ակտիվ է, ու նրանում չի կարող ամեն ինչ անթերի լինել:
Ակումբի դրական կողմերից մեկն այն է, որ ինքը բողոքներից չի վախենում: Բողոքեք, խնդրեմ: Բողոքեք որքան որ կկամենաք: Այստեղ թե ինտերնետի մեկ այլ հարթակում: Մենք պատրաստ ենք այդ բողոքներին մի հասարակ պատճառով. մենք մշտապես ուղղում ենք մեր սխալները ու աշխատում դրանք հասցնել նվազագույնին, իսկ մեր աշխատանքի հիմնական արդյունքը խիստ դրական է:
Շնորհակալություն ուշադրության համար:
Chuk-ի խոսքերից
Էջանիշներ