Իշխանությունները հարամեցին
մայիսի 9-ի տոնը
Մայիսի 9-ի տոնական օրը «նշանավորվեց» խաղաղ ցուցարարների եւ ոստիկանության բախումով:
Մամուլը մանրամասն անդրադարձել է այդ իրադարձությանը: ԱԱԾ շենքի մոտ հավաքված ցուցարարները եւս մեկ անգամ անգամ համոզվեցին, որ գործ ունեն բռնապետությունը պաշտող իշխանությունների հետ, որոնք պատրաստ են հաշվեհարդար տեսնել ժողովրդի հետ: Ժողովուրդը, սակայն, հասկացրեց, որ մտադիր չէ հնազանդվել եւ պատրաստ է հակահարված տալ իր իրավունքը ոտնահարողներին:
Այն պահին, երբ կրքերը շիկացան, եւ ոստիկանների ու ցուցարարների միջեւ ծեծկռտուք սկսվեց, մարդիկ սկսեցին վրդովված սուլել, վանկարկել՝ «ամոթ», «թուրքեր»: Կանայք սկսեցին անեծքներ ու լուտանքներ տեղալ ղարաբաղցիներին վարկաբեկող զույգի հասցեին, նաեւ՝ կշտամբել ոստիկաններին. «Էդ ո՞ւմ եք պաշտպանում, էդ ո՞ւմ եք ծառայում»: Եղավ մի պահ, երբ թվաց, թե կատաղած ոստիկաններից սպասելի է ամեն ինչ, մանավանդ որ շատ արագ համալրվեցին նրանց շարքերը, իսկ ԱԱԾ-ի մոտ երթով գնացել էին ոչ բոլոր միտինգավորները, եւ օժանդակ ուժեր ցուցարարները չունեին այդ պահին: Վեց-յոթ տարեկան մի երեխա, որը երթի մեջ հայտնվել էր մոր հետ, սկսեց դողալ, ապա լաց լինել: «Գետինը մտնեք,- ոստիկանների ուշադրությունը հրավիրեց մի տարեց կին,- մի մատ երեխաներ կան էստեղ, իսկ դուք հարձակվում եք էդ անմեղ երեխաների ու կանանց վրա»: Ոստիկաններից մեկը պատասխանեց. «Էստեղ երեխաների տեղ չի. ճիշտ կանեք՝ հեռանաք: Ոչ մի լավ բան էստեղ մի սպասեք»: Երեխան սկսեց բարձրաձայն աղերսել. «Մամա ջան, վախենում եմ... Մամա ջան, վախենում եմ»: Մայրը սաստեց. «Մի վախեցիր, վախենալու բան չկա»: Երեխան, սակայն, չէր հանգստանում եւ շարունակ, առանց դադար տալու կրկնում էր. «Մամա ջան, վախենում եմ...»: Տասներեքամյա մի տղա գրկեց փոքրիկի ուսը եւ սրտապնդեց՝ «Մենք ավելի ուժեղ ենք, մի վախեցիր»: Վիճակը իսկապես վտանգավոր էր, եւ մի տղամարդ խնդրեց կնոջը երեխային դուրս բերել ոստիկանների տեսադաշտից եւ տանել տուն: Մայրը կատարեց խնդրանքը, հասկանալով, որ հանուն «ներքաղաքական կայունության»՝ ոստիկանները կարող են ոտնատակ տալ նաեւ կանանց ու երեխաներին:
Իսկ երեկ այս ամենի վերաբերյալ սովետական պոլիտբյուրոյի ոճով ՀՀ ոստիկանությունը տարածեց բացահայտ ցինիզմով հագեցած մի հայտարարություն, որտեղ մեղադրվում են խաղաղ ցուցարարները: Այդ ցինիզմը զուգորդված է խղճահարույց լալկանությամբ՝ իբր, իմացեք, ժողովուրդ, քիչ էր մնացել մի խումբ անձինք «ճեղքեին ոստիկանների շղթան», ծնկի բերեին ոչ միայն քաջարի ոստիկաններին, այլեւ գերմանական ֆաշիզմին հաղթած եւ Շուշին ազատագրած աշխարհի ամենամարտունակ բանակին եւ երկիրը մատնեին քաոսի:
Եզրակացությունը մեկն է. ՀՀ իշխանությունները շատ ավելի են վախենում ՀՀ բնակիչներից, այդ թվում՝ մանկահասակ երեխաներից ու կանանցից, քան նույն այդ երեխաներն ու կանայք գազազած ոստիկաններից:
http://taregir.am/2007/mayis/11/index.htm
Էջանիշներ