Artgeo կամ Վինի Թուխի իրական պատմությունը

[Ուլուանա]

Նախօրոք ուզում եմ ձեզ տեղեկացնել, որ ես ու Բարեկամը հարցազրույցը վարել ենք՝ առանց մեկս մյուսինը կարդալու, այնպես որ եթե կրկնվող հարցեր լինեն... հայցում եմ ձեր ներողամտությունը...

Artgeo կամ Վինի Թուխի իրական պատմությունը...


Ուլուանա (01:15 PM) :
Սկզբում դու կտրականապես հրաժարվել էիր հարցազրույցից։ Ո՞րն էր պատճառը։

Artgeo (01:16 PM) :
Դե... «համեստություն» եմ արել։

Ուլուանա (01:17 PM) :
Փորձիր երեք բառով բնութագրել իսկական Արտգեոյին։

Artgeo (01:17 PM) :
Թող ուրիշները բնութագրեն։

Ուլուանա (01:18 PM) :
Գլուխդ ազատեցի՞ր։ Լավ։ Քո կարծիքով, ո՞վ է քեզ ամենալավը ճանաչում որպես մարդու։

Artgeo (01:19 PM) :
Դժվարանում եմ համեմատել. կան մարդիկ, որոնք բավականին լավ են ճանաչում իմ մի մասը, ոմանք՝ մյուս մասը։ 100%-ով ես էլ ինքս ինձ չեմ ճանաչում։

Ուլուանա (01:20 PM) :
Այնուամենայնիվ, եթե ընդհանուր առմամբ նայենք, կա՞ արդյոք այնպիսի մեկը, ով, քո կարծիքով, քեզ ավելի լավ է ճանաչում, քան մյուսները։

Artgeo (01:21 PM) :
Կարծում եմ՝ Chuk-ը, և դա ինձ թուլացնում է։ Չէի ուզենա, որ շատ մարդիկ ճանաչեին։
Ուլուանա (01:21 PM) :
Իսկ դա ի՞նչ հետևանքներ կունենար, ինչի՞ց ես վախենում։
Artgeo (01:23 PM) :
Չեմ ուզում, որ մարդիկ տեսնեն իմ թույլ կողմերը. շատ մարդիկ դրանք վատ նպատակներով կօգտագործեն։

Ուլուանա (01:25 PM) :
Ակումբում դու շատերի համար բարդ ու հակասական մարդու համբավ ունես։ Ի՞նչ ես կարծում, Ակումբում քեզ ավելի շատ համակրու՞մ են, թե՞ հակակրում։

Artgeo (01:26 PM) :
Ճիշտն ասած, չգիտեմ, չեմ հետաքրքրվել։ Ես այն եմ, ինչ կամ, ու փոխվելու մտադրություն չունեմ։

Ուլուանա (01:27 PM) :
Ի՞նչ է քեզ տվել akumb.am-ը։

Artgeo (01:28 PM) :
Որ հարցը մի քանի օր առաջ տային, կասեի՝ ընկերություն, ջերմ մթնոլորտ ու տենց բաներ...

Ուլուանա (01:28 PM) :
Իսկ հիմա՞։

Artgeo (01:29 PM) :
Հիմա՞... հիմա կասեմ՝ մեծ փորձ մարդկային հարաբերություններում... ու զգուշավորության զգացում։

Ուլուանա (01:29 PM) :
Այսինքն՝ համարում ես, որ Ակումբում ընկերներ չունե՞ս։

Artgeo (01:30 PM) :
Ընկեր հասկացությունը մի փոքր փոխել է իր սկզբնական ձևավորված իմաստը։

Ուլուանա (01:30 PM) :
Եվ ինչպիսի՞ն է դարձել։

Artgeo (01:31 PM) :
«[13:28:49] <Artgeo> ու զգուշավորության զգացում։

Ուլուանա (01:31 PM) :
Զգուշավորություն ընկերների՞ց։

Artgeo (01:32 PM) :
Բոլորից անխտիր։

Artgeo (01:33 PM) :
Ինքս ինձնից էլ։

Ուլուանա (01:33 PM) :
Իսկ ինչի՞ց ես ամենաշատը հիասթափվում։

Artgeo (01:34 PM) :
Հիասթափության պատճառը միայն ու միայն մենք ենք։ Այսինքն՝ ամեն մեկն ինքն է մեղավոր իր հիասթափության մեջ, երբ ստեղծում է որոշակի պատրանք, որն իրականւմ գոյություն չունի։

Ուլուանա (01:44 PM) :
Ո՞րն ես համարում քո ամենամեծ ձեռքբերումը։

Artgeo (01:42 PM) :
Այն, որ կամ։

Ուլուանա (01:43 PM) :
Բայց չե՞ս կարծում, որ դա ոչ թե ձեռքբերում է, այլ պարզապես հանգամանքներով պայմանավորված իրողություն։ Ուրիշ բան, եթե խոսքը կոնկրետ ձևով գոյություն ունենալու մասին է։

Artgeo (01:44 PM) :
Հաշվի առնելով որոշ հանգամանքներ, որոնցով անցել եմ, կարծում եմ՝ ձեռքբերում է։

Ուլուանա (01:45 PM) :
Քո առաջին՝ առայժմ միակ պատմվածքի գլխավոր հերոսը՝ Գագոն, որը վերջում ինքնասպան է լինում, շատերին հիշեցնում է հենց քեզ։ Երբևէ լրջորեն մտածե՞լ ես ինքնասպան լինելու մասին։

Artgeo (01:46 PM) :
Ավելի քան լրջորեն մտածել եմ, բայց, ինչպես տեսնում եք, չեմ փորձել։

Ուլուանա (01:47 PM) :
Ինչպիսի՞ն պետք է լինի քո ընկերը։ Այսինքն՝ ինչ արժանիքներ պիտի ունենա, որ դու կարողանաս նրան, այսպես ասած, քո մտերիմների շարքն ընդունել։

Artgeo (01:49 PM) :
Իմ ընկերները տարբեր խառնվածքի, բնավորության ու տարիքի տեր մարդիկ են։ Փորձում եմ գտնել որոշակի ընդհանրություն, բայց չի ստացվում։

Ուլուանա (01:50 PM) :
Քեզ քիչ թե շատ ծանոթ մարդիկ գիտեն, որ անհանգիստ խառնվածքի տեր մարդ ես։ Քեզ համար ավելի հեշտ է խառնվածքով քեզ նմա՞ն թե՞ ավելի հանդարտ մարդկանց հետ շփվելը։

Artgeo (01:51 PM) :
«Քնած» մարդկանց չեմ սիրում։

Ուլուանա (01:52 PM) :
Այսինքն՝ «քնած» և «հանգիստ» բառերը քեզ համար հոմանիշնե՞ր են։

Artgeo (01:53 PM) :
Չէ, ուղղակի հանգիստ մարդկանցից հաճախ նյարդայնանում եմ։ Բայց երևի դա էլ է պետք։

Ուլուանա (01:55 PM) :
Ակումբի անդամներից ու՞մ կցանկանայիր ավելի մոտիկից ճանաչել, ավելի մտերիմ հարաբերություններ ունենալ։

Artgeo (01:55 PM) :
Շատ են այդպիսի մարդիկ. Եթե սկսեմ թվարկել, մինչև վաղը չեմ վերջացնի։

Ուլուանա (01:56 PM) :
Եթե դժվար չէ, նշիր նրանցից մի քանիսին։

Artgeo (01:57 PM) :
Ոչ ծանոթ անդամներից՝ Բարեկամ, Taurel։

Ուլուանա (02:00 PM) :
Հաճա՞խ ես մեղավորության զգացում ունենում։

Artgeo (02:04 PM) :
Ունենում եմ։ Բայց ոչ հաճախ։ Ավելի հաճախակի, քան կարող է երևալ, քան ցույց եմ տալիս։

Ուլուանա (02:05 PM) :
Ի՞նչ էր երազում դառնալ փոքրիկ Արթուրը։

Artgeo (02:06 PM) :
Միշտ լրագրող։

Ուլուանա (02:06 PM) :
Դեռ վաղ մանկու՞ց։

Artgeo (02:06 PM) :
Այո։

Ուլուանա (02:06 PM) :
Հետաքրքիր է։ Սովորաբար փոքր երեխաները շատ աղոտ պատկերացում են ունենում լրագրողի մասնագիտության մասին, եթե, իհարկե, ընդհանրապես ունենում են։

Artgeo (02:09 PM) :
Հա, չեմ առարկում, աղոտ էր։ Բայց փոքր ժամանակ լրագրողական բաներ եմ արել։

Ուլուանա (02:09 PM) :
Մի քիչ կպատմե՞ս։ Օրինակ՝ ինչե՞ր ես արել։

Artgeo (02:10 PM) :
Ստեղծել եմ ռադիո, որը «սփռված» էր մեր ու հորեղբորս տան տարածքով։ Ու դիջեյություն էի անում, իմ կարծիքով՝ ավելի լավ, քան այն ժամանակ գոյություն ունեցող ռադիոներում։

Ուլուանա (02:10 PM) :

Artgeo (02:10 PM) :
Նստում էի հեռուստացույցի դիմաց ու լրատվություն կարդում։ Գրում էի բակում կատարվածի մասին։

Ուլուանա (02:11 PM) :
Հետաքրքիր է։ Իսկ ձեր բակում հետաքրքիր բաներ շա՞տ էին կատարվում։ Եվ ի՞նչ դեր ունեիր դու այդ ամենի մեջ։

Artgeo (02:12 PM) :
Բակում շատ փոքր ժամանակ էի ժամանակ անցկացնում։ Հիմնականում ինձնից մեծերի հետ էի, կամաց-կամաց կտրվեցի բակից։ Հետո մոտ ընկերներս գնացին արտերկիր։

Ուլուանա (02:15 PM) :
Փոքր ժամանակ քեզ կարելի՞ էր կռվարար անվանել։

Artgeo (02:15 PM) :
Ո՛չ փոքր ժամանակ, ո՛չ հիմա։

Ուլուանա (02:31 PM) :
Պատմական կամ ժամանակակից գործիչներից ո՞վ է քեզ համար քիչ թե շատ օրինակելի կերպար, եթե չասենք՝ իդեալ։ Կա՞ արդյոք այդպիսի անձ։

Artgeo (02:31 PM) :
Պապ թագավորը։

Ուլուանա (02:32 PM) :
Իսկ ժամանակակիցների մե՞ջ։ Չկա՞ այդպիսին։

Artgeo (02:32 PM) :
Չէ։
Ուլուանա (02:35 PM) :
Ի՞նչ ես կարծում, հնարավո՞ր է կյանքում լրջորեն սիրել մեկից ավելի անգամ։ Թե՞ իսկական սերը մի անգամ է լինում։

Artgeo (02:36 PM) :
Հնարավոր է։

Ուլուանա (02:57 PM) :
Իսկ հիմա՝ իմ սիրած հարցը. ինչի՞ մասին ես մտածում հենց այս պահին։

Artgeo (02:59 PM) :
Մորս, եղբորս։

Ուլուանա (05:51 PM) :
Քեզ ո՞ր հեքիաթի կամ մուլտֆիլմի հերոսին ես նմանեցնում։ Ո՞ր կերպարը կամ կերպարներն են քեզ հոգեհարազատ։

Artgeo (05:51 PM) :
Կառլսոնն ու Վինի Թուխը։

Ուլուանա
Նրանց պես անհո՞գ ես։

Artgeo
Նրանց պես միայնակ։

Ուլուանա
Շնորհակալություն հարցազրույցի համար։

Artgeo
Ձեզ նույնպես շնորհակալություն։ Օգտվելով առիթից՝ ուզում եմ հաջողություն մաղթել բոլորին. լավ եղեք...