Պատանեկան մրցույթ․ վավերագրական ժանր

[Արէա]

8․ #Թավշյա։ Ես կուզենայի լինել այս շարժման սցենարիստը

Լավն է մտահղացումը, շատ հետաքրքիր են զուգահեռները, համեմատությունները։
Մի քիչ երկար է, էդ հետաքրքրության, յուրօրինակության էֆֆեկտը, որն էս ստեղծագործության մեխն էր, կեսերից սովորական, նաև ինչ-որ չափով ձանձրալի է դառնում։
Ընդհանուր առմամբ լավն է էս տարբերակը։

[Ուլուանա]

9. «Իռան, մորուքն ու սերը». հեղափոխությունը 3 բառով
Հետաքրքիր մոտեցում էր լրագրողի տեսանկյունից ներկայացնելը: Հետաքրքրությամբ կարդացի: Հեղափոխությունը երեք բառով նկարագրելու մարդկանց փորձերը հետաքրքիր էին:

Ափսոս, որ հեղինակի վերաբերմունքը չերևաց: Ճիշտն ասած` ինձ համար մի քիչ նույնիսկ տարօրինակ է, որ Հայաստանում ապրելով, էդ ամենի մեջ լինելով` մարդը կարող է վերաբերմունք չունենալ էդպիսի մասշտաբի ու կարևորության իրադարձության նկատմամբ: Բայց մյուս կողմից էլ` եթե իսկապես չկա այդ վերաբերմունքը, գնահատելի է, որ մարդը չի փորձում հակառակը ձևացնել:
Մեկ էլ գործը մի քիչ ցաքուցրիվ էր, կարելի էր ավելի համակարգված ներկայացնել:

[Արէա]

9․«Իռան, մորուքն ու սերը». հեղափոխությունը 3 բառով

Հետաքրքիր էր մտահղացումը, ի տարբերություն իրականացման։
Գուցե արժեր ոչ թե նույնությամբ գրի առնել պատասխանները, այլ պատասխանների հերթականությամբ, երեք-երեք բառերով կառուցել սյուժե, պատմություն։
Վերջիվերջո սա պատմվածք պիտի լիներ, թեկուզ և վավերագրական։
Էս տեսքով ձանձրալի ու քիչ հետաքրքիր գործ է դարձել։

[Արէա]

10․ Նիկոլի թիվը

Հեղինակ ջան, անկեղծ ասած դժվարությամբ հաղթահարեցի պատմվածքը։
Եթե վստահ չեք, որ ամեն նախադասությունը, ամեն պարբերությունը մի նոր բան է ասելու, որ մինչ էդ չէր ասվել, կամ գոնե ճանապարհ է բացում, որ մեկ երկու նախադասություն հետո ասվի էդ նոր բանը, ապա մի գրեք էդ նախադասությունները, եթե վեպ չեք գրում, ու եթե նպատակ չունեք ծավալ ապահովելու։

[Արէա]

11․ Հեղափոխության դիտորդները

Տատի ու Վարդանի համեմատությունը տեղին չէր։
Ընդհանրապես, էս մրցույթում շատ են բոլորը ինչ-որ երևույթ համեմատում մեկ այլի հետ, երբ դրա կարիքը բոլորովին չկա, կամ ընդհանրապես համեմատելի եզրեր չունեն։
Հետաքրքիր տեսակետ է, որ փոփոխությունների համար երկրում հեղափոխությունից բացի, նաև մարդկանց ներսում պիտի հեղափոխություն լինի։

[Ուլուանա]

10. Նիկոլի թիվ
Շատ լավն էր, հուզիչ էր ու շատ-շատ անկեղծ: Հեղինակի ինքնավերլուծություններն ահագին հետաքրքիր էին, ինձ հոգեհարազատ: Չնայած երկարությանը` մինչև վերջ էլ մեծ հետաքրքրությամբ, կլանված կարդացել եմ: Մի ամբողջ ինքնակենսագրություն էր` քաղաքականի հետ հաջողությամբ միահյուսված: Մեծ շնորհակալություն հեղինակին :

[Ուլուանա]

11. Հեղափոխության դիտորդները
Ընդհանուր գաղափարը լավն էր, բայց Վարդան ձյաձյայի օրինակը մի քիչ տեղին չէր, համոզիչ չէր:
Վերջին հատվածն էր շատ հաջող.

Վարդաններն ու լիլոներն են մեզ տարիներով ճահիճի մեջ պահել, իրենք էլ դեռ չեն շտապում դուրս գալ, փոխել հագուստն ու մերժել ներսի փտած ռեժիմին: Ես ու Թավշյա հեղափոխությունը «գրազ ենք բռնում»՝ մի քիչ այլ ֆորմատով․ երկուսս էլ հասնելու ենք ամենաիսկական ու «զտարյուն» Հեղափոխությանը՝ առանց վարդանների, լիլոների ու դե՜ աշոտների։ Եթե հաղթեմ, Թավշյա հեղափոխությունն էլ կհաղթի, եթե պարտվեմ, ինքն էլ տանուլ կտա «գրազը», որովհետև երկուսս էլ նույն բանին ենք ձգտում։ Մոտեցումն է տարբեր․ ես ներքևից եմ բարձրանում վեր, ինքը վերևից իջնում է ներքև։ Ինձ համար Հեղափոխությունը ՀՈԳԻՆԵՐԻ հեղափոխությունն է, Թավշյա հեղափոխության համար՝ լիդերների հեղափոխություն։ «Գրազակիցս» իր գործն արդեն արել է ու լավ է արել, բայց ամեն անգամ բախվելով «զոռբայության» հասնող անհանդուրժողականությանը, բուհից, համայնքի բյուջեից, պետությունից ու աշխարհից անվերջ «քերելու» նկրտումներին ու տեղ-տեղ անտանելիորեն կուտակված մշակույթի չգոյությանը, հասկանում եմ, թե ինչքան անելիքներ կան սեփական հոգիներում։
Ու եթե կուզեք՝ ես ու Հեղափոխությունը սեղմում ենք միմյանց ձեռքերը ի նշան խորը ու երկարատև դաշինքի։

[Բարեկամ]

Վավերագրականների մեջ երկու գործ են ինձ համար առանձնանում․ Բացակաների անունից և Նիկոլի թիվ։
Դրանք կշեռքի հակառակ նժարներին են, բայց նժարները պահում են միմյանց նկատմամբ հորիզոնական հավասարակշիռ դիրքում, ու էդ հավասարակշռության առանցքը գրականությունն է։
Գրականություն գնահատելիս պետք է մոռանալ նյութի վերաբերյալ անձնական տեսակետը և գնահատել զուտ գրականությունը։
Էս երկու գործերը լավագույնն էին։

[Smokie]

9. «Իռան, մորուքն ու սերը». հեղափոխությունը 3 բառով

Հեղինակ ջան ու դու փորձառությունդ ու գիտակցությունդ բավարար չէ՞իր համարում կարծիք արտահայտելու համար:
Մի՞թե գտնում ես, որ արդեն մեծ ու կարևոր քայլ չէր դպրոցական աղջկա համար (սեռդ հասկացա` ընկերուհիների փաստը հաշվի առնելով) գնալ ու համարձակորեն բազմաթիվ մարդկանցից հարցազրույց վերցնել էն դեպքում՝ երբ ընկերուհիներդ կարմրում էին: Կամ, որ անկախ ամեն ինչից մի քանի անգամ մասնակցել ես ցույցերին:
Դու իհարկե կարող ես սովորել: Օր-օրի ավելի ու ավելի շատ բան սովորել: Շատ խելացի քայլ է` տարբեր մարդկանց իրենց կարծիքներով հանդերձ ուսումնասիրելը ու դա իհարկե քեզ էլ է օգնելու, որ աճես: Իսկ երբևէ փորձե՞լ ես հարցազրույց վերցնել ինքդ քեզանից:
Դու էլ ես բավականին գրագետ գրում, ունես հետաքրքիր մտածելակերպ ու կարող ես վարպետորեն արտահայտել կարծիքդ: Դու էլ մեր ժողովրդի մյուս ներկայացուցիչների պես մեր բոլորի հպարտությունն ես: Կեցցես:

[Smokie]

10. Նիկոլի թիվ

Տխրությամբ և դառնությամբ համեմված գեղեցիկ ստեղծագործություն մի անձի անհատական պայքարի մասին: Այո՛, անհատական: Եւ հենց դրանով էլ տարբերվում էր մյուսներից ու հետաքրքրությունը մեծացնում: Այստեղ քիչ էր խոսվում ժողովրդի ապստամության, հայերի միասնականության ու հերոսական պայքարի մասին: Փոխարենը մեր տաղանդավոր հեղինակը շատ բաներ ներկայացրել էր մի մարդու աշխարհահայացքով: Հետաքրքիր ձևով ցույց էր տվել անարդարությունը, մարդկանց կարգավիճակների տարբերությունը, ինչպես նաև իր անձնական պայքարը հանուն սեփական կարծիքի և պայքարը ինքն իր դեմ` սեփական անճշտության դեմ: Եւ ինչպես ճնշող մեծամասնությունը` այս ստեղծագործությունն էլ ունեցավ ուրախ վերջաբան:
Ինչպես նաև սա այն ստեղծագործությունն էր, որտեղ ամենաերկարն էր խոսվել մի քանի տարի առաջվա պայքարների մասին և որտեղ ամենաշատն էր հիշվել այդ ամենը: Երբեմն մտածել եմ, թե ինչու՞ է հենց այս վերնագիրը ընտրվել անհատական պայքարը նկարագրող պատմվածքի համար: Գուցե պատճառը հենց այն է, որ այստեղ հիշվել են նաև մյուս երևանյան պայքարները իրենց տարեթվերով ու ցույց է տրվել դրանց թողած ազդեցությունների տարբերությունը այս հեղափոխության հետ:
Ապրես հեղինակ ջան: Հարգանքներս:

[Օլինա]

5․ Փոքրիկ քայլերի արվեստը

Մայրը կարծես նույն բանն էր ասում ինչ տատը, էլ ի՞նչ հակամետ։
Ես երևի խիստ եմ դատում, ու հեղինակը գուցե շատ ավելի փոքր է, քան կարծում եմ, բայց ընդհանուր շատ տրիվիալ մտքեր են, շատ վերամբարձ ոճով ձևակերպված։ Որպես դպրոցական շարադրություն վատը չէ, բայց ավելին էլ չէ, ցավոք սրտի։
Ու Սևակից մեջբերումն էլ, ոչ մի կապ չունի էս հեղափոխության քայլերի հետ. էնտեղ անհույս թափառումներ են, ու բաժանող տարածության պատկերավոր նկարագրություն է, էստեղ՝ դեպի նպատակակետն ուղղված քայլեր։

Հակամետ նշանակում է մի բանին հակված, տրամադիր: Երևի շփոթում եք հակոտնյա (իրարամերժ), հակառակ բառերի հետ: Իսկ Սևակից մեջբերումը պարզապես հարմարեցված էր հեղափոխության գաղափարի հետ: Իհարկե Սևակը լրիվ ուրիշ հեռավորություն նկատի ուներ, բայց տվյալ կոնտեքստում մեջբերմանը կարելի է նայել ուրիշ տեսանկյունից: Տվյալ դեպքում հեռավորությունը ո՛չ թե մարդու և իր սիրած էակի մեջ է, այլ մարդու ու գործող իշխանության միջև, իսկ քայլերն էլ արվում են այդ հեռավորությունը կրճատելու համար, ինչպես ասվում էր գրվածքում:

[Արէա]

Հակամետ նշանակում է մի բանին հակված, տրամադիր: Երևի շփոթում եք հակոտնյա (իրարամերժ), հակառակ բառերի հետ:

Իրոք որ, այ քեզ խայտառակություն
Հակամետը համամիտի հակառակը պիտի լիներ, փաստորեն հակամետը համաձայն է նշանակում

[Օլինա]

Իրոք որ, այ քեզ խայտառակություն
Հակամետը համամիտի հակառակը պիտի լիներ, փաստորեն հակամետը համաձայն է նշանակում

Խայտառակության հարց բնավ չկա: Հայերենը հարուստ ու գեղեցիկ լեզու է: Տվյալ դեպքում ո՛չ թե հակա- նախածանցն է, այլ հակ արմատը «հակում» բառից: Մետ-ն էլ կարծում եմ ինքնին հասկանալի է:
Ամեն դեպքում շնորհակալ եմ Ձեր կարծիքի համար: Այստեղ հնչող յուրաքանչյուր կարծիք ինձ համար շատ կարևոր է՝ անկախ այն բանից, թե հակամետ է իմ կարծիքին, թե հակառակ:

[ivy]

@Օլինա, իսկ ի՞նչ կարծիքի ես մյուս ստեղծագործությունների մասին, ո՞րն ես ամենաշատը հավանել ։)

[Օլինա]

@Օլինա, իսկ ի՞նչ կարծիքի ես մյուս ստեղծագործությունների մասին, ո՞րն ես ամենաշատը հավանել ։)

Շատ հավանել եմ «Բացակաների անունից», «#Թավշյա» գործերը: Առաջինը մեծ հետաքրքությամբ եմ կարդացել, թեև ես ունեմ այլ պատկերացումներ հեղափոխության մասին: Դա էլ գրավեց, որ նա, ունենալով այլ կարծիք կատարվածի մասին, չի վախեցել դրանք բարձրաձայնել: Միայն կոպիտ էր վաղվա օրվա համար պայքարող ցուցարսրին տրված «զոմբի» բնութագրումը: Մյուս գործն էլ հետաքրքիր էր, որովհետև կրեատիվ ձևով էր պատմում հեղափոխության մասին: «Իրականության բացակա կողմը» էլի վատը չէր: Շատ բան չեմ հիշում, տպավորվել էր սուրճի հետ համեմատությունը, թեև կապը հեղափոխության հետ չընկալեցի: Վերջին տողերն էին շատ լավը: Բայց ընդհանուր գործը տպավորվել էր որպես դժգոհության արտահայտություն: