Եկամուտների հայտարարագրման մասին նախագծի շուրջ աղմուկի հետագիծը փաստորեն սկսվում է Հանրային ռադիոյից (որի ղեկավարն է Լիկա Թումանյանը՝ Տաթևիկ Նալբանդյան N2-ը) ու նրանց թեթև ձեռքով անվանվում «խոպանչիների հարկման մեխանիզմ», որի մասին հանրայինի «Ռադիոլուր»-ին տված հարցազրույցում բացասական կարծիք է հայտնում ոմն տնտեսագետ Գագիկ Վարդանյան, որի վիկիի էջը հուշում է՝ ՀՀԿ-ական, 2002-2006՝ ՀՀ առևտրի և տնտեսական զարգացման նախարարի տեղակալ, 2011-ից՝ Հայաստանի պետական տնտեսագիտական համալսարանի պրոռեկտոր։
Լուրին շտապ արձագանքում է Արփինե Հովհաննիսյանն իր առաջին լայվով։
Էլ չասած, որ ՊԵԿ-ի ղեկավարն էլ «նոր» չի... Ու հանրապետական թելերը կամաց-կամաց սկսում են խտանալ։
Արձագանքում են Արարատ Միրզոյանը, այլ պաշտոնյաներ, փորձում բացատրել, որ հարկային բեռի ավելացում չի լինելու և այլն և այլն...
Ինչը բերում է մի թեմայի, որի մասին ուզում եմ գրել արդեն մի 3 ամիս։
Աննա Հակոբյանը ախրանայով աստղաբաշխական շոփինգ է արել Փարիզում... Իրականում գնել է մի զույգ բոթաս՝ աղջկան։
Աննա Հակոբյանը ինքնաթիռով մեկնել է Արթիկ։ Իրականում չի մեկնել։
Կառավարությունը մերժել է արգելել նույնասեռ ամուսնությունները։ Իրականում՝ դա արդեն կարգավորված է։
Արարատ Միրզոյանի կինը պետության հաշվին ուղեկցել է ամուսնուն։ Իրականում՝ իր հաշվին։
Աննա Հակոբյանի վարսավիրը նշանակվել է վարչապետի խորհրդական։ Իրականում՝ իմիջի հարցերով օգնական (էն, ինչից ունեն բոլոր առաջին դեմքերը)։
Միշիկի եսիմովը Ելքի ավագանու ցուցակում է։ Իրականում՝ միշիկի հետ կապ չունեցող նույնանուն մեկն է։
Արսեն Թորոսյանն ասել է, որ երեխեքը պիտի մեռնեն... Իրականում՝ ըըըըը..... չափ կա ամեն ինչին։
Արսեն Թորոսյանը մեր հաշվին մտավ Բեռլին։ Իրականում՝ Երևանում մի տեղ նստած՝ կատակ արեց։
Ու էսպես ԱՄԵՆ ՕՐ։ ԱՄԵՆ ՕՐ մենք կարդում ենք զառանցանք, զտարյուն հորինվածք, որի հաջորդ օրը համապատասխան հասցեատերը հանդես է գալիս հերքմամբ։
Ու սա այն ֆոնին, որ հեղափոխությունից կարճ ժամանակ անց արդեն պարզ դարձավ, որ Քոչարյանն իր կաշին փրկելու համար գնել է բազմաթիվ լրատվամիջոցներ, իսկ Միշիկի հորը «Սուրբ Գրիգոր Լուսավորիչ» բժշկական կենտրոնից հեռացնելուց ու հսկայական չարաշահումների համար դատի տալուց հետո Միշիկը կեղծլրատվական քունը կորցրել է։ Իսկ ԱԺ-ն արձակվել է, ու դեկտեմբերին ունենք նոր ընտրություններ, որում ՀՀԿ-ն ԱՄԵՆ ԻՆՉ անելու է՝ վերադառնալու համար։
Ու ամեն օր թվում է՝ էս էլ ու պրծ... Մտածեցիք անկման չափը՞։ ՈՉ։ ՀՀԿ-ի ու Ամբաստանյալի ո՛չ անկման չափը, ո՛չ սուտը չի պրծնելու։ Մարդիկ միլիոններ ունեն փրկելու։ Իսկ ձեզ թվում էր՝ քարկտիկ են խաղում։
Ոչ։ Պրծներ պիտի նոր կառավարության էս ոճն ու վաղուց հասկացվեր, որ սուտ-հերքում մոդելը լավագույն փիարը չի... ասադըկ տը աստայոցցա։ Ամեն օրվա ստի թույնով կարելի է կորցնել ժողովրդի ամբողջ հենարանը, ու ոչ մի հերքում այլևս չի փրկի... Որովհետև հեղափոխության դեմ ՊԱՏԵՐԱԶՄ է հայտարարված։ Ու որ լավագույն փիարը թեմաստեղծ փիարն է, ոչ թե ուրիշի փայլուն մանիպուլյացիային ու անսպառ փողով առած անբարոյականների ստին պաշտոնական հերքում տալը։
Ու ապշած սպասում ես, թե նոր կառավարությունը ե՞րբ կհասկանա, որ ո՛չ ԶԼՄ ունի, ո՛չ PR, իսկ համերաշխաբար պահված լիկաներն ու ջաղինյանները, նախկին ռեժիմից սնվող դարչնագույն մամուլը գործող ռումբ են հեղափոխության տակ։
Ու ե՞րբ վերջապես ամենօրյա հիստերիայի թույլ ու անարձագանք հերքման քաղաքականությունը կփոխարինվի սեփական լրատվության ու նախահարձակի դաշտի ստեղծմամբ։
Էջանիշներ