257.
Կարող են հարցնել՝ ինչպե՞ս հասկանալ խոչընդոտների օգտակարությունը, եթե հոգևոր էներգիան, ինչպես մագնիս, հավաքում է բոլոր առավելությունները: Ճիշտ է, երբ մեծ նավն արագացնում է ընթացքը, ալիքների հակազդեցությունն ավելանում է: Շատ խոչընդոտներ հրահրվում են մեր նկրտումներով: Միևնույն պրոցեսը դեպի մեզ է ներգրավում հակադիր կամքի անսպասելի մասերը: Եթե նրանք շատ ուժեղ են, ուրեմն մեր հակահարվածն էլ զարգանում է համապատասխանաբար: Գլխավորը, որ հանդիպական ուժերը լինեն շատ ուժեղ, քանզի այդ ժամանակ տեղի է ունենում մեր բռնկումը:
Բռնկումն օգտակար և այրումը վտանգավոր համարեք: Անվանում եմ բռնկում, երբ պահպանվում է կենտրոնի բոցի պատկերի բյուրեղը, այրում, երբ կենտրոնը բոցավառվում է հրդեհի նման: Երբ ասում են, որ ինչ-որ մեկը ճնշված է հանգամանքներով, վստահ եղեք, որ նա ընթացել է առանց բռնկվելու և բախման ժամանակ նրա գիտակցությունը խռովվել է: Երբեմն դժվար է կռահել խռովմունքի պահը, բայց այն թունավորում է բոլոր հաջորդող գործողությունները: Իսկ երբ հաստատուն է ընթացքը, այդ ժամանակ հակազդեցություններն էլ օգտակար են: Նրանք ծնում են կայծակ, և ամպրոպը սասանում է հեռավոր սարերը: Չնչինից չնչինություն կծնվի: Եվ ուրեմն, ընկնելով ճանապարհ, չնչինի հանդեպ զզվանք պատգամեք: Ապագան ձևավորվում է գիտակցության կայծակներով, այդ կայծերի ուժը կախված է հակազդեցությունից: Հետևաբար հաջողությունը տնային տաշտակով ծաղկած լճակում լող տալը չէ:
Երբ Մենք ասում ենք. " Լողացե՛ք", - նշանակում է փորձարկե՛ք օվկիանոսը: Հսկայական ալիքները ձեզ ուրախություն կտան: Ամրության փորձարկելն արդյո՞ք ուղղակի ուժերի աճ չէ: Անհնար բան եք անում, երբ քայլում եք անդունդի վրայով: Բայց դուք արդեն քայլել եք անդունդների վրայով և ժպտացել եք: Տեսնում եք, որ խոսում եմ ոչ թե երազանքների, այլ այն բանի մասին, ինչն արդեն կիրառված է և ինչին կան վկաներ:
Քաջությունն ընդամենը ճանապարհի իմացությունն է, հակառակ դեպքում ամեն փակ դուռ բացողն արդեն հերոս կլիներ: Ի՞նչ է նրան սպասում շեմի այն կողմում: Բայց Հրեղեն յոգն այդ պահին ժպտում է:
Էջանիշներ