ԷԿՀԱՐՏ ԹՈԼԼԵ
ԼՌՈՒԹՅՈՒՆԸ ԽՈՍՈՒՄ Է
Դուք անհրաժեշտ եք Տիեզերքին այն բանի համար,
որպեսզի նա կարողանա իրականացնել
իր աստվածային ծրագիրը:
Սա է ձեր իսկական դերը:
Բ. Պաստեռնակ
* * *
"Մի անգամ, երբ լրացավ իմ քսանինը տարին, ես արթնացա ուշ գիշերը, համակված սահմռկեցուցիչ սարսափով և խորին զզվանքով աշխարհի հանդեպ..." - այսպիսի խոսքերով Էկհարտ Թոլլեն "Ներկա Պահի ուժը" գրքում նկարագրում է իր փոխակերպման սկիզբը. սուիցիդալ դեպրեսիայի մշտական նոպաների հետ մեկտեղ անանցանելի տագնապի վիճակում ապրող մարդուց, - մինչև շատ ու շատ որոնողների հոգևոր ուսուցիչը:
"... Եվ ամենազզվելին այդ աշխարհում իմ սեփական գոյությունն էր: Արժե՞ր արդյոք ապրել անելանելիության այդպիսի ճնշման տակ: Ու՞մ է պետք այդ անվերջանալի պայքարն ինքդ քեզ հետ:
Ես զգում էի, թե ինչպես ինքնաոչնչացման և չը-գոյության հանդեպ ձգտումն իմ մեջ գերիշխում էր ապրելու բնազդական ցանկությանը: “Ես այլևս չեմ կարող ապրել ինքս ինձ հետ”: Այդ միտքն անդադար պտտվում էր գլխումս: Եվ հանկարծ..."
"Ներկա Պահի ուժը" գիրքը` տասնամյա սեմինարների և ուսուցումների արդյունքը, - ընդամենը մոտ մեկ տարվա ընթացքում իսկական բեսթսելեր դարձավ:
Եվ ահա ձեր առջև Էկհարտ Թոլլեի երկրորդ գիրքն է: Ի տարբերություն առաջինի, որը կազմված էր սեմինարների բազմաթիվ մասնակիցների տված հարցերին հանգամանալից պատասխանների տեսքով, սա` իր լակոնիզմով և բառերի ու մտքերի միջև լռությամբ, - մեր օրերում կյանքի է կոչում հին հնդկական սուտրաների ոճը` նրանց նվազագույն անդրադարձումով մտքին և մտածողությանը: "Այն, ինչը նրանք մատնացույց են անում և ինչի մասին լռում են, - գրում է հեղինակը, - շատ ավելի կարևոր է քան այն, ինչի մասին նրանց մեջ խոսվում է":
Այս գրքի ուղերձը նույնպես պարզ և միանշանակ է. Տառապանքներից դեպի լռություն և անդորր տանող ճանապարհ գտնել կարելի է: Եթե սովորես լսել Լռության Ձայնը:
ՀԵՂԻՆԱԿԻ ՄԱՍԻՆ
Էկհարտ Թոլլեն ծնվել է Գերմանիայում, որտեղ էլ անց է կացրել կյանքի առաջին երեսուն տարիները: Ավարտելով Լոնդոնի համալսարանն, ընդունվել է ասպիրանտուրա Քեմբրիջում: Բայց քսանինը տարեկանում հոգևոր փոխակերպումը փաստորեն սրբե՛լ, առանց մնացորդի տարրալուծել է նրա նախկին անձը և արմատապես փոխել է նրա կյանքը:
"Եկավ մի պահ, երբ ֆիզիկական մակարդակի վրա ես ժամանակավորապես զրկվեցի ամեն ինչից: Ես չունեի ոչ մոտիկներ, ոչ աշխատանք, ոչ տուն, ոչ հասարակական կարգավիճակ: Համարյա երկու տարի անց կացրեցի այգիներում ու պուրակներում նստարանների վրա անասելի երջանկության վիճակում:
Բայց նույնիսկ ամենասքանչելի ապրումները երբևիցէ ավարտվում են: Պարզվեց, որ բոլոր այդ ապրումներից շատ ավելի կարևոր է այն խորին հանգստությունը, որն այն ժամանակներից ի վեր կազմում է իմ գոյատևման հիմքը: Երբեմն այնքան է այն զգալի, համարյա տեսանելի, որ նույնիսկ ինձ շրջապատողները զգում են այն: Իսկ երբեմն այն գնում է հետին պլան, ինչպես ինչ-որ տեղ հեռվում լսվող երաժշտություն:
Ավելի ուշ իմ կյանքում սկսեցին հայտնվել մարդիկ, ովքեր ասում էին ինձ. "Ես ցանկանում եմ ձեռք բերել այն, ինչ ունեք դուք: Չե՞ք կարող դուք արդյոք կիսվել ինձ հետ դրանով կամ ցույց տալ, թե ինչպես հասնել դրան": Եվ ես պատասխանում էի. "Դուք արդեն դա ունեք: Դուք ուղղակի չեք զգում դա, որովհետև ձեր միտքը չափազանց մեծ աղմուկ է ստեղծում":
Ավելի ուշ նման պատասխաններից ծնվեց գիրք, որը դուք հիմա բռնել եք ձեռքներիդ: Այդպես, նույնիսկ չհասցնելով հասկանալ, թե ինչն ինչոց է, ես նորից ձեռք բերեցի ներքին անհատականություն` դարձա հոգևոր ուսուցիչ":
Արդեն մոտ քսան տարի Էկհարտ Թոլլեն շրջագայում է ամբողջ աշխարհով, անց է կացնում սեմինարներ և ուսուցումներ: Եվ միշտ, բերելով բոլորին ճշմարտության ըմբռնումն ու իր ներկայության անդորրը, նա համոզում է. կա՛ տառապանքներից դեպի հանգստի աշխարհ տանող ճանապարհը:
Էջանիշներ