Հունվարի 19-ի ուշ երեկոյան Երեւանի «Զվարթնոց» օդանավակայանում վայրէջք կատարեց Թբիլիսի-Երեւան չվերթն իրականացնող ինքնաթիռը, որը տեղափոխում էր եվրոպական տարբեր երկրներից արտաքսված հայերին: Նրանք 120 հոգի էին եւ Եվրոպա էին մեկնել տարբեր եղանակներով ու նպատակներով՝ աշխատելու, հիմնական բնակություն հաստատելու, բուժվելու եւ այլն: Նրանցից շատերի համար իրենց արտաքսումը եղել է անակնկալ. տվյալ երկրի ոստիկանության աշխատակիցները մտել են բնակարան, աշխատավայր, նրանց ձերբակալել ու իրենց կամքին հակառակ ուղղակի տարել համապատասխան վայր, այնտեղից էլ՝ օդանավակայան: Ինքնաթիռից իջած միգրանտները պատմում էին, որ իրենց մեջ եղել է մի տարեց կին, որի ինքնազգացողությունը մի քանի անգամ վատացել է ճանապահին: Զարմանալին այն էր, որ արտաքսվածների մեջ կային իսկապես բուժման նպատակով Գերմանիա մեկնած հիվանդներ, սայլակով հաշմանդամ, ով մի քանի վիրահատություն էր տարել եւ պետք է ենթարկվեր վերջին ու վճռորոշ վիրահատությանը, բայց «զայրացած» հումանիտար Գերմանիան նրան էլ չէր խնայել եւ արտաքսել էր իր երկրից:
«Դեպորտացված» միգրանտներն ասում էին, որ իրենցից շատերի համար եվրոպական երկրներ մուտք գործելու չորս տարվա արգելանք է դրվել, ինչը, զրուցակիցներիս կարծիքով, խախտում է իրենց իրավունքները, քանի որ իրենք հանցանք չեն գործել այն երկրում, որտեղ բռնվել են: Իսկ ամբողջ Եվրոպայի դռներն իրենց առջեւ փակելը համարում են իրենց իրավունքների ոտնահարում: Մի ուշագրավ փաստ․ 120 միգրանտին Եվրոպայից մինչեւ Հայաստան ուղեկցել է մոտ 60 եվրոպացի ոստիկան, որոնք մինչեւ «Զվարթնոցի» «դուռը» խիստ հսկողության տակ են պահել արտաքսվածներին, նրանց ուղեկցելով անգամ պետքարաններ գնալիս: Արտաքսվածները դժգոհում էին նաեւ եվրոպական երկրներում աշխատող հայ փաստաբաններից․ «Երբ որեւէ խնդիր ենք ունենում իրավական համակարգի հետ, մտածում ենք՝ թող փաստաբանը հայ լինի, որպեսզի եւ կարողանանք հայերեն հաղորդակցվել, եւ մեր խնդիրները ճիշտ ներկայացնել, եւ կարծում ենք, թե հայն ավելի սրտացավ կլինի: Բայց կան հայ փաստաբաններ, ովքեր ուղղակի թալանում են իրենց հայ վստահորդներին, կրկնակի գումար վերցնելով, արդյունքում ոչինչ չեն անում, նույնիսկ ընդհակառակը՝ մեր դեմ են աշխատում եւ մեզ ուղղակի հանձնում են, որպեսզի արտաքսեն: Դա շատ ցավալի երեւույթ է»: Զրուցակիցներս չցանկացան հրապարակել ոչ այդ փաստաբանների անունները, ոչ էլ իրենց, քանի որ հույս ունեն երբեւէ նորից մեկնել Եվրոպա:
Հարցիս, թե որ ազգի ներգաղթյալների հանդեպ է Եվրոպան խստացրել պահանջները, զրուցակիցներս պատասխանեցին. «Արտոնյալ են հիմնականում սիրիացիները: Խստացրել են հատկապես կովկասցիների հանդեպ: Մենք գոնե այդպես ենք զգում: Պրոցեսը դեռ շարունակվում է, մեզնից հետո դեռ շատ շատերին են դեպորտ անելու»:Նյութի աղբյուրը `
http://hraparak.am/?p=136303&l=am/
Էջանիշներ