Այսօր «Բարոյական հաղթանակների ազգային ծառայություն»-ը յուրահատուկ ակցիա էր կազմակերպել Իտալիայի դեսպանատան մոտ: Ակցիայի մասնակիցները հետաքրքիր ցուցապաստառներ էին պատրաստել՝ «Սոխառած անել Չիպոլինոյին», «Բուֆո՛ն, ձեռքերդ հեռո՛ւ մեր խփած գնդակներից», «Ե՛տ տվեք մեր հողերը», «Ո՛չ այլասերվածությանը», «Մոնիկա Բելուչին սիրուն չի», «Պահանջում ենք Բեռլուսկոնիի հրաժարականը» և այլն:
Ակցիայի մասնակիցների խոսքով՝ Իտալիայի հավաքականը տարավ անբարոյական հաղթանակ, չեն ներելու ու չեն պատրաստվում հանդուրժել նման վերաբերմունք:
Նրանք պահանջում էին անհապաղ ներողություն խնդրել և խոստանալ սրանից հետո միշտ պարտվել հզոր Հայաստանին, հակառակ դեպքում Հայաստանը կխզի դիվանագիտական հարաբերությունները Իտալիայի հետ:
Աշոտ Պղնձաձույլը նշեց, որ ֆուտբոլային բարոյականության մեջ ոչ մի կերպ չէր տեղավորվում Իտալիայի հաղթանակը, որովհետև նայելով խաղին՝ տրամաբանորեն մենք պետք է հաղթանակ տանեինք, բայց անբարոյականորեն նրանք հաղթեցին.
«Սա խոսում է իրենց կողմից ցուցաբերվող եվրոպական կեղծ արժեքների և երկակի մոտեցումների մասին»,- ասաց Աշոտ Պղնձաձույլը՝ ավելացնելով ևս մեկ պահանջ՝ հայտարարում ենք չեղյալ համարել Արտաշատի պայմանագիրը:
Ակցիայի մասնակիցներից Արգիշտի Կիվիրյանը նշեց, որ իրենց պայքարը ուղղված է Իտալիայի ֆուտբոլի ֆեդերացիայի, մասնավորապես` իտալական ղեկավարության դեմ, որը շատ սխալ մոտեցում է ցուցաբերել:
Հարցին, թե ինչու է խաղից տասն օր անց ակցիան կազմակերպվում, Արգիշտի Կիվիրյանը պատասխանեց. «Մենք ի սկզբանե ենք պայքարել, բայց Եվրամիությունը և մութ, դավադիր ուժերը տարբեր ձևերով խոչընդոտում էին մեր պայքարին»:
Ակտիվիստներից մեկն էլ նշեց, որ զանգեր են ստացել նաև իտալական մաֆիայից:
Մեջբերել
Էջանիշներ