Լոնդոնի Էլիզաբեթ թագուհու անվան համերգասրահում անցած շաբաթ օրը ՀՀ անկախության 20–րդ տարեդարձին նվիրված համերգ է տեղի ունեցել, որին մասնակցել են աշխարհահռչակ ջազ երաժիշտ Տիգրան Համասյանը և լեգենդար հնդիկ պերկուսիոնիստ Տրիլոկ Գուրտուն։
Ինչպես տեղեկանում ենք արևմտյան լրատվամիջոցներից, համերգը բացել է երաժիշտ Տիգրան Ալեքսանյանը՝ հայկական անկրկնելի դուդուկով։ Այնուհետև առանձին ելույթներ են ունեցել Գուրտուն և Տիգրան Համասյանը, ապա նաև երկուսը միասին։
Համերգին նվիրված հոդվածում բրիտանական հեղինակավոր Guardian պարբերականը, մասնավորապես, գրում է. «Համասյանի երաժշտական ոճն իր խոր արմատներն ունի հայկական ավանդական երաժշտությունում։ Այսօրվա շոուն բացեց մեկ այլ հայ երիտասարդ՝ հոբոյի նման երաժշտական գործիքով՝ դուդուկով՝ հայկական ֆոլկլորային երգերի կատարմամբ։ Այս սքանչելի մեղեդիների և Տիգրանի մելիզմատիկ մեղեդիների միջև կապն ակնհայտ է։ Սակայն Գուրտուի հարվածային գործիքներով ոգևորված՝ նա սուզվեց նաև Քեյթ Ջարեթի ոճով եկեղեցական, քանթրի, ֆանկ ոճերի մեջ»։
Պարբերականն այս համերգը նկարագրում է որպես «քաոսային, ուժասպառ անող ու անկրկնելի շոու, որը երկու տաղանդավոր երաժիշտներին հասցրեց իրենց կատարելության գագաթնակետին»:
Բազմաթիվ հեղինակավոր մրցույթների դափնեկիր Տիգրան Համասյանը ծնվել է 1987թ. Գյումրիում։ 2003 թ. Տիգրանը Փարիզի ջազային դաշնակահարների միջազգային մրցույթում երկրորդ տեղն է զբաղեցրել, իսկ Jazz a Juan Revelations-2003–ում՝ առաջին մրցանակին արժանացել, առաջին մրցանակին է արժանացել նաև Montreux Jazz Solo Piano Competition-2003 մրցույթում։ 2005թ. Մոսկվայի դաշնակահարների ջազային միջազգային մրցույթում արժանացել է երրորդ մրցանակի, իսկ Մոնակոյի ջազային դաշնակահարների մրցույթում՝ առաջին մրցանակի։
ԱՄՆ–ում նրան ամենամեծ հաղթանակն էր սպասում. 2006թ. դաշնակահարների հեղինակավոր Թելոնիուս Մոնքի (Thelonious Monk) անվան մրցույթում նա առաջին մրցանակին արժանացավ
Հայաստանի Հանրապետության անկախության 20-ամյակի կապակցությամբ օրեր առաջ Ա. Խաչատրյան համերգասրահում տեղի ունեցավ Համասյանի համերգը:
Օրերս լույս է տեսել նրա նոր՝ «Մի առակ» ձայնասկավառակը։
Աղբյուր՝ ԹԵՐԹ.ամ
Մեջբերել
Valentina-ի խոսքերից
Գործեր կան, որտեղ ժողովրդական մեղեդիներն օգտագործվում են, վերափոխվում յուրահատուկ աշխարհի:
Էջանիշներ