Ձեր դատին ու քննարկմանն եմ ներկայացնում ավելի քան կես դար հնության խորհուրդ-նորմեր, թե ինչպես ամուսնու համար լավ կին լինել:
Մեկ էլ տեսար, մեջը դեռ արդիական բաներ էլ լինեն:
Թարգմանությունն իմն է, վերջում կցում եմ նաև օրիգինալի հղումը:
“Housekeeping Monthly“ 13 մայիսի, 1955 թ.
- Ընթրիքը պիտի պատրաստ լինի: Այնպես պլանավորիր, թեկուզ մի գիշեր առաջ, որ համեղ ընթրիքն ամուսնուդ տուն գալու պահին լինի պատրաստ: Սրանով դու ցույց ես տալիս, որ մտածում ես նրա մասին և հոգում նրա կարիքները: Տղամարդիկ սովորաբար սոված են, երբ տուն են գալիս, և լավ ուտելիքը՝ հատկապես իրենց սիրած, ջերմ դիմավորման անհրաժեշտ մասնիկն է:
- Քեզ կարգի բեր: Տասնհինգ րոպե ժամանակ հատկացրու տեսքդ թարմացնելու համար, որպեսզի պատրաստ լինես, երբ նա գա: Ավելացրու դիմահարդարումդ, գլխիդ բանտիկ կապիր և թարմ տեսք ունեցիր: Հիշիր, որ նա քիչ առաջ այնպիսի մարդկանց հետ էր, ում վրայից աշխատանքի հոտ էր փչում:
Անգլերենում g** բառը ուրիշ իմաստ էլ ունի, բայց չփչացնենք ամբողջ էֆեկտը:
- Եղիր մի փոքր գեյ ("be a little gay") և դարձիր նրա համար ավելի հետաքրքիր: Նրա ձանձրալի օրը ոգեշնչման կարիք ունի, և քո գործը պիտի լինի ապահովել այն:
- Տուն-տեղը կարգի բեր: Ամուսնուդ գալուց անմիջապես առաջ մի անգամ ևս անցիր տնով մեկ ու ստուգիր ամեն ինչ:
- Գրքերը, թղթերն ու խաղալիքները հավաքիր և մաքրիր սեղանների փոշին:
- Ցուրտ ամիսներին կրակ վառիր, որ ցուրտը նրան չկպչի: Դրանից ամուսինդ յոթերորդ երկնքում կլինի, իսկ դա քեզ շատ կոգևորի: Նրա բարեկեցության մասին հոգալով՝ դու կհասնես գերագույն բավարարվածության:
- Կարգի բեր երեխաներին: Մի քանի րոպե ժամանակ հատկացրու՝ լվանալու նրանց դեմքերն ու ձեռքերը, և եթե անհրաժեշտ է, նոր շորեր հագցրու: Չէ՞ որ նրանք ամուսնուդ փոքրիկ գանձերն են: Աղմուկը քչացրու: Նրա գալու պահին վերացրու լվացարանի, փոշեկուլի և այլ ձայները, ինչպես նաև հոգ տար, որ երեխաներդ էլ լուռ լինեն:
- Երջանիկ եղիր տեսնելու նրան:
- Ողջունիր ջերմ ժպիտով և ցույց տուր նրան գոհացնելու անկեղծ ցանկությունդ:
- Լսիր նրան: եթե անգամ դու լիքը կարևոր բան ունես նրան ասելու ու պատմելու, լռիր, հիմա դրա ժամանակը չէ: Թող նա առաջինը խոսի: Հիշիր, որ նրա խոսակցության թեմաներն ավելի կարևոր են, քան քոնը:
- Երեկոն թող նրանը լինի: Երբեք մի բողոքիր, որ ուշ է եկել կամ գնացել է զվարճանալու առանց քեզ: Դրա փոխարեն փորձիր հասկանալ նրա կյանքի լարվածությունը և հանգստանալու նրա պահանջը:
- Քո նպատակը պիտի լինի կարգուկանոնով և հանգիստ տուն ունենալ, որտեղ ամուսինդ կվերածնվի հոգով ու մարմնով:
- Մի դիմավորիր նրան բողոքներով ու պրոբլեմներով:
- Մի գանգատվիր, եթե նա ուշացել է կամ անգամ ամբողջ գիշեր տուն չի եկել: Ախր դա ոչինչ է՝ համեմատած նրա ծանր օրվա հետ:
- Այնպես արա, որ նրան հարմարավետ լինի: Նստեցրու հարմարավետ աթոռին կամ պառկեցրու ննջարանում և ձեռքիդ տակ պատրաստ ունեցիր զովացուցիչ կամ տաք ըմպելիք:
- Ուղղիր նրա բարձերը, առաջարկիր հանել կոշիկները: Խոսիր հետը քնքուշ, մեղմ, հանգիստ ձայնով:
- Հարցեր մի տուր նրա արարքների մասին և հարցականի տակ մի դիր նրա որոշումները: Հիշիր, որ նա տան գլխավորն է և միշտ պիտի բանեցնի իր կամքը, դու նրա ազնվությանը կասկածելու իրավունք չունես:
- Լավ կինը միշտ գիտի իր տեղը:
Օրիգինալը
Իմացի'ր քո տեղը, կի'ն:
Մեջբերել
Էջանիշներ