ԲԱՑ ԴԱՍԻ ԴՌՆԵՐԸ ՓԱԿ ԵՆ
Արդեն մի քանի քառօրյա է, ինչ տարբեր դպրոցների աշակերտներ առավոտյան 30 րոպե մասնակցում են ԱԺ աշխատանքներին` մոտիկից ծանոթանալով հայ ազգընտիրների գործունեությանը: Երեկ եւս դպրոցականները կոկիկ հագնված նստել էին դահլիճում եւ լսում էին, թե ինչպես են օրենսդիրները քննարկում եւ քվեարկում տարաբնույթ օրինագծեր: Ու հենց քվեարկությունների ավարտին շատախոս պատգամավորների պահվածքից զայրացած, ԱԺ նախագահ Հովիկ Աբրահամյանը խոսափողները մի կողմ բրդեց եւ բարկացավ, թե «արա դե հերիք ա խոսաք, ամոթ ա էլի»: ԱԺ նախագահին թվաց, թե բացի «արա»-ներից որեւէ մեկը չլսեց իր խոսքերը, բայց ավաղ, աշակերտների համար եւս լսելի էր: Սա նշանակում է, որ դպրոցականները Ազգային ժողովի նախագահից սովորեցին, թե ինչպես է կարելի խոսել պատգամավորների հետ:
Բայց սրանից հետո Հովիկ Աբրահամյանը, արդեն ավանդույթի համաձայն, բաց դաս անցկացրեց դպրոցականների հետ 334 սենյակում: Թե ինչ խորհուրդներ տվեց երեխաներին, մենք չլսեցինք, քանի որ «բաց դասը» լրագրողների համար «փակ էր»: «Միայն հեռուստաընկերության լրագրողները կարող են ներս մտնել», ասացին ԱԺ լրատվական ծառայությունից: Իսկ թե որ չափանիշներով էր կատարվել այդ ընտրությունը, անհասկանալի մնաց: Ավելի ուշ ինքը` ԱԺ նախագահ Հովիկ Աբրահամյանը, մեզ հետ զրույցում ասաց, որ դասը բաց է բոլորի համար` տարակուսելով, թե ինչու են արգելել լրագրողների մուտքը: Նա նաեւ խոստացավ, որ հաջորդ բաց դասին նաեւ մամուլի ներկայացուցիչները կարող են հետեւել, բայց մենք հեռու ենք այն մտքից, որ լրատվական ծառայությունն ինքնակամ էր որոշել արգելել «փիս-փիս բաներ գրող» լրագրողների մուտքը: Այդպիսի հարցերը, որպես ավանդույթ, մեր երկրում լուծվում են «վերեւներում»:
Մեջբերել
Էջանիշներ