Շուտով մեկնարկելիք արագ և կույր շախմատի «Ամբեր» գերմրցաշարին ընդառաջ մի փոքր նախաբան:
Առաջին «Ամբեր» մրցաշարն անցկացվել է 1992թ.-ին Ֆրանսիայի Ռոքբրյուն քաղաքում՝ ի նշանավորումն հոլանդացի միլիարդատեր ու շախմատային մեկենաս Յոոպ վան Օոստերոմի դստեր Մելոդի Ամբերի ծննդյան: Այն մրցաշարն անցկացվեց միայն արագ շախմատի ուղղվածությամբ ու ավարտվեց Վասիլի Իվանչուկի հաղթանակով (ի դեպ միակ շախմատիստն, ով մասնակցել է «Ամբեր»-ի բոլոր 20 մրցաշարերին): 1993թ.-ին մրցաշարի ընթացակարգն երթարկվեց որոշակի փոփոխությունների՝ նպատակ ունենալով այն դարձնել աշխարհում իր տեսակի մեջ միակը: Այդ տարվանից մրցաշարն անցկացվում է կրկնակի հանդիպման սկզբունքով՝ շախմատիստների զույգը մի օրվա մեջ իրար հետ մրցում են թե՛ արագ և թե՛ կույր շախմատում: 1993թ.-ին «Ամբեր»-ն անցկացվեց Մոնակոյում, որն այնուհետ դարձավ մրցաշարի տունը մինչև 2008թ.-ը, երբ այն անցկացվեց Նիցցայում: 20-րդ հոբելյանական մրցաշարի առիթով պարոն Օոստերոմն ու Մաքս Էյվեի հիմնադրամն որոշել են «Ամբեր 2011»-ը կրկին անցկացնել Մոնակոյում: Ու 2011թ.-ի մարտի 11-24-ը Մոնտե Կարլոյի հանգստյան համալիրը կընդունի պատմության մեջ վերջին «Ամբերի» մասնակիցներին (համաշխարհային վարկանիշային աղյուսակի առաջին տասնյակից բացակայում է միայն 8-րդ համար Մամեդյարովը).
1. Մագնուս Կարսեն (Նորվեգիա) - 2814
«Ամբեր»-ում նրա լավագույն արդյունքը անցյալ տարվա գումարային 1-ին մրցանակն է (կիսելով Իվանչուկի հետ):
2. Վիշվանաթան Անանդ (Հնդկաստան) - 2810
1994, 1997, 2003, 2005, 2006 (Մորոզևիչի հետ)թթ.-ի «Ամբերի» հաղթողն է:
3. Լևոն Արոնյան (Հայաստան) - 2805
«Ամբեր»-ի 2008 և 2009թթ.-ի առաջին մրցանակակիրն է:
4. Վլադիմիր Կրամնիկ (Ռուսաստան) - 2784
«Ամբեր»-ում առաջինն է եղել 1996, 1998 (Շիրովի հետ), 1999, 2001 (Թոփալովի հետ), 2004 (Մորոզևիչի հետ) և 2007թթ-ին:
5. Սերգեյ Կարյակին (Ռուսաստան) - 2776
Նրա լավագույն ցուցանիշն անցյալ տարվա 5-րդ տեղն է:
6. Վեսեին Թոփալով (Բուլղարիա) - 2775
Կիսել է «Ամբեր 2001»-ի առաջին մրցանակը Կրամնիկի հետ:
7. Ալեքսանդր Գրիշչուկ (Ռուսաստան) - 2773
4-րդն է եղել «Ամբեր 2006»-ում:
8. Վասիլի Իվանչուկ (Ուկրաինա) - 2764
«Ամբեր»-ում հաղթել է 1992-ին և 2010-ին (Կարլսենի հետ):
9. Հիկարու Նակամուրա (ԱՄՆ) - 2751
Նրա առաջին մասնակցությունն է գերմրցաշարին:
10. Վուգար Հաշիմով (Ադրբեջան) - 2736
6-րդն է եղել անցյալ տարի:
11. Բորիս Գելֆանդ (Իսրայել) - 2733
Նրա բարձրագույն նվաճումը Մոնակոյում 2001 և 2002թթ.-ի 5-րդ տեղն է:
12. Անիշ Գիրի (Նիդերլանդներ) - 2686
Նրա առաջն մասնակցությունն է «Ամբեր»-ում:
Մրցաշարի բացման արարողությունը մարտի 11-ին է, իսկ խաղերը կմեկնարկեն հաջորդ օրվանից Երևանի ժամանակով 18:30-ին: Հանգստյան օրեր են մարտի 16-ն ու 21-ը: Ամեն պարտիայի համար շախմատիսներից յուրաքանչյուրին կհատկացվի 25-ական րոպե: Արագ շախմատում ամեն քայլին կավելանա 10, իսկ կույր շախմատում 20 վայրկյան:
Ընդհանուր մրցանակային ֆոնդը € 227,000 է:
Աղբյուրը
Հաջողություն մաղթենք մեր առաջատարին: Ու եթե հաշվի առնենք, որ Լևոնն արագ շախմատն ընկալում է իբրև զվարճանք, նաև բարի ժամանց նրան:
Մեջբերել
Էջանիշներ