Մեսսի` ռեկորդ մարդը (29/09/2011)
Մեսսին հավասարվեց Կուբալային խփած գոլերի քանակով և դարձավ ակումբի պատմության մեջ 2 - րդ գլխավոր ռմբարկուն: Նա ընդամենը 24 տարեկան է և հասել է նման նվաճման: 2003/2004 մրցաշրջանում, երբ նա իր նորամուտն էր նշում առաջին թիմում, քչերը կարող էին ենթադրել, որ 8 տարի անց նա կհասնի նման արդյունքների:
Իրականում սա Լեոյի համար միայն հերթական ռեկորդն էր: Այժմ առաջարկում ենք ծանոթանալ նրա սահմանած այլ ռեկորդային ցուցանիշներին:
► Ամենաշատ գոլերը 1 մրցաշրջանի ընթացքում` Նախորդ մրցաշրջանում Մեսսին 53 գոլ հեղինակեց, 31 - ը` Լա Լիգայում, 12 - ը` Չեմպիոնների լիգայում, 7 - ը` Կոպա Դել Ռեյում և 3 - ը` Իսպանիայի սուպերգավաթում: Այդպիսով, նա Քրիստիանո Ռոնալդոյի հետ միասին դարձավ 1 մրցաշրջանի ընթացքում ամենաշատ գոլեր հեղինակած ֆուտբոլիստը:
► Ակումբի լավագույն ռմբարկուն Լա Լիգայի 1 մրցաշրջանի ընթացքում` Մեսսին 2009/2010 մրցաշրջանում Լա Լիգայում անցկացրած 35 խաղում խփեց 34 գոլ և հավասարվեց 1996/1997 մրցաշրջանում Ռոնալդոյի ռեկորդին:
► Ակումբի լավագույն ռմբարկուն միջազգային մրցասպարեզում` 42 գոլով Մեսսին ակումբի պատմության մեջ միջազգային մրցասպարեզում լավագույն ռմբարկուն է: Այդ 42 գոլից 39 - ը նա խփել է Չեմպիոնների լիգայում, 2 - ը` Աշխարհի ակումբային գավաթում, 1 - ը` ՈՒԵՖԱ - ի սուպերգավաթում: Լեոն նաև ակումբի պատմության մեջ լավագույն ռմբարկուն է Չեմպիոնների լիգայում:
► Չեմպիոնների լիգայի վերջին 3 մրցաշրջանների լավագույն ռմբարկուն` Մեսսին Չեմպիոնների լիգայի վերջին 3 մրցաշրջանների գլխավոր ռմբարկուն է: Նման ցուցանիշի հասել են միայն Մյուլերն ու Պապինը: Անցած մրցաշրջանում Լեոն 12 գոլ խփեց, ինչը Ռուդ վան Նիստելռոյի 2002/2003 մրցաշրջանի ռեկորդի կրկնությունն է:
► Իսպանիայի սուպերգավաթի գլխավոր ռմբարկու` Այս մրցաշրջանի ամենասկզբում Մեսսին 3 գոլ խփեց Ռեալ Մադրիդին Իսպանիայի սուպերգավաթային 2 խաղերում և դարձավ պատմության մեջ լավագույն ռմբարկուն 8 գոլով:
► Համաշխարհային ռեկորդ` 2009/2010 մրցաշրջանում Մեսսին դարձավ պատմության մեջ միակ խաղացողը, ով 1 մրցաշրջանի ընթացքում դարձավ ներքին առաջնության գլխավոր ռմբարկու, նվաճեց ոսկե խաղակոշիկն ու ճանաչվեց աշխարհի և Եվրոպայի լավագույն խաղացող:
► 2 ոսկե գնդակ իրար հետևից` 2008/2009 և 2009/2010 մրցաշրջանում Մեսսին իրար հետևից արժանացավ աշխարհի լավագույն խաղացողի կոչմանն ու դարձավ ֆուտբոլի պատմության մեջ ամենաերիտասարդ խաղացողը, ով 2 ոսկե գնդակ է նվաճել, այն էլ իրար հետևից:
Barca.am
Մեջբերել
Էջանիշներ