ՀՀ քաղաքացիները պաշտպանում են իրենց իրավունքները

[Tig]

Ճիշտն ասած սկզբում ուզում էի գրեի՝ «…փորձում են պաշտպանել», բայց հետո որոշեցի հույսով մոտենալ հարցին…
Մեկ էլ չկարողացա կողմնորոշվեմ, թե որ բաժնում բացեմ թեման: Գուցե մոդեռատորները հարմար տեղ գտնեն կամ միացնեն ինչոր թեմայի:
Նպատակս այն է, որ այս թեմայում բարձրաձայնենք ՀՀ քաղաքացիների բողոքների մասին, քննարկումներ վարենք և ընթացքի մասին տեղեկություններ տեղադրենք, որպիսի հասկանանք՝ վերջիվերջո օրենքի ուժով ինչոր բանի հնարավոր է հասնել թե ոչ…

[yerevanci]

մի քիչ զարմանալիա, բայց ճիշտա և տեղին, նման դեպքերի ես ծանոթ եմ, իմ ընկերներիցս Քոբուիլետի ուղևորվելիս նման կարգավիճակում են հայտնվել

[Tig]

[h_jak]

Տիգ ջան ինչ լավ էս արել որ Սերգեյ Դանիելյանի հարցազրույցը քցել էս. Լուրջ եմ ասում սաղ օրը գործընկերներիս Էտ եմ ասում, որ դուք ձեր շահերը չպաշտպանեք ոչ մեկ չի գալու ու ձեզ լավություն անի. Չեն հասկանում, մեռա ասելով, բոլորը ճամպրուկները հավաքած սպասում են հնար լինի փախնեն այստեղից.

[Tig]

[Freeman]

Լավ թեմա ա, բայց, եթե դժվար չի, վիդեոների հետ միքիչ էլ նկարագրություններ դրեք

[Tig]

Մի քանի անգամ վաճառված բնակարանների ու նրանց տերերի մասին:

[Tig]

Թուրքից չեն վախենում, գյուղապետից են վախենում
19:00 - 07.10.2011

Լոռու մարզի Լեռնապատ գյուղում էլ խնդիրները շատ են: Ոտքդ գյուղ չդրած` մարդիկ բողոքում են, բողոքում... Բայց ի տարբերություն այլ գյուղերի, այստեղ բողոքելու համար դատի են տալիս, պատասխան պահանջում ամեն բառի համար:

«Էսօրվա դրությամբ ինձ վրա արդեն վեց հատ դատ կա: Ես գյուղացի, անասնապահ մարդ եմ: Հիասթափվել եմ, որ էսօր ոչ մի կիլո խոտ ենք հնձել, ոչ մի բան չենք արել: Հիմի հավատա, կլիենտի եմ ման գալիս, որ կովերս ծախեմ, տունը վարձով տամ, էրեխանցս վերցնեմ, գնամ»,- ասաց Լեռնապատ գյուղի բնակիչներից Կամսար Թամարյանը:

Այս գյուղում բնակիչների մի զգալի մասն արդեն երկու տարի շարունակ բողոքում է ՀՀԿ-ական գյուղապետ Վանո Եղիազարյանի գործողություններից: Գյուղացիները մեզ հետ զրույցում պատմում են, թե գյուղապետը գազատար խողովակներ անցկացնելու համար իրենցից է գումար հավաքել, մարդկանց հասանելիք նպաստները յուրացրել է, անշարժ գույք է վաճառել եւ այլն:

Լեռնապատի բնակիչ Սարիբեկ Հոռոմսիմյանը պատմում է, որ գյուղապետը առաջարկել է մեկ ամսվա նպաստըՙ 7500 դրամը տալ իրեն, որ մնացած ամիսների նպաստը ստանա: Այս մասին Ս. Հոռոմսիմյանը ցուցմունք է տվել Կամսար Թամարյանի դեմ դատական գործի շրջանականերում: Իսկ դրանից հետո էլ Վ. Եղիազարյանի հայրն ու աները գիշերով գնացել են նրա տուն, 50 հազար դրամ են տվել, որ բողոքը հետ վերցնի, բայց նա հրաժարվել է դա անել:

Մեկ այլ գյուղացիՙ Դեմենտի Թադեւոսյանը, պատմում է, որ ինքը նպաստառու չէ, իր ու կնոջ կենսաթոշակը կազմում է 37 հազար դրամ, բայց պարզել են, որ իր համար որպես սոցիալական օգնություն երկու անգամ 50 հազար դրամ է դուրս գրվել, սակայն ինքը չի ստացել այն. «Ես ոչ դիմում, ոչ պահանջ եմ ներկայացրելՙ ո՞ւր ես տարել էդ փողը: Գայիր ինձ տեղյակ պահեիր: Լավ ա՞, բալա»:

Այստեղ բողոքները շատ են. մեկի հողն է վաճառվել, որտեղ պիտի կառուցեր իր` երկրաշարժից փլված տունը, մեկի հողի կարգն է փոխվել, մյուսի գոմն են ուզում քանդել, որի կառուցման թույլտվությունը տասը տարի առաջ նույն գյուղապետից են ստացել: Բողոքում են, որ հողերը մշակել չեն կարողանում, որովհետեւ գյուղապետը չի լուծում կոմբայնի հարցը, երկրաշարժի զոհերի հիշատակին կառուցված հուշարձանի լույսը անջատել ենՙ ինչ է, թե «բյուջե չկա», գյուղապետը փորձել է վաճառել գյուղի միակ ավտոբուսը, որը նվեր են ստացել պատգամավորից եւ այլն:

Իսկ Վանո Եղիազարյանն, ի պատասխան այս ամենի, դատի է տալիս գյուղացիներին` պատիվն ու արժանապատվությունը ոտնահարելու համար: Ասում են, որ առնվազն տասը հոգի դատական քաշքշուկների մեջ է ընկել` գյուղապետի աշխատանքից բողոքելու համար.

«Հիմի ես իրավունք չունե՞մ ասեմՙ խի՞ չի ավտոբուս աշխատում, խի՞ հուշարձանի լույսը չի վառում: ...Էսօրվա դրությամբ 500-600 հազար դրամ մենակ փաստաբանի ենք տալիս: ...Մեր գյուղը միակ գյուղն է, որ թուրքը չի մտել, մենք թուրքից չենք վախեցել, բայց հիմա վախի մեջ ենք»,- Կամսար Թամարյանն ասում է, որ եթե իրենք կարողանում են բողոքել, ապա շատ գյուղացիներ, որ օրվա հացով են ապրում, վախենում են ձայն հանել, որովհետեւ, Աստված չանի, եթե դատի տա, ծախսերի տակից հազիվ դուրս գան:

Գյուղապետի դեմ էլ արդեն մոտ երկու տարի էՙ քրեական գործ է հարուցված` պաշտոնական դիրքի չարաշահման, կեղծիքներ կատարելու եւ խոշոր չափի դրամ յուրացնելու մեղադրանքով: Սակայն նա շարունակում է պաշտոնավարել ու գյուղացիների վկայությամբ, սպառնալ իրենց, ասելով, թե իր «թիկունքն» ուժեղ է, իր թիկունքին «Արմեն Գարեգինչն» է կանգնած (ՀՀ Գլխավոր դատախազությանի Կոռուպցիայի եւ կազմակերպված հանցագործությունների դեմ պայքարի վարչության պետ Արմեն Աշրաֆյան):

Իսկ գյուղապետ Վանո Եղիազարյանն էլ պնդում է, թե 2500 բնակիչ ունեցող գյուղում միայն հինգն են բողոքում, եւ այդ բողոքավորներն էլ հարկերը չեն վճարում, իսկ ինքը փորձում է 100 տոկոսով հարկահավաքություն անել` մարզպետարանի եւ կառավարության պահանջով. «Բնական է, որ նրանց դուր չի գալու: Հիմա էլ նրանք, զոռով-շառով, զրպարտելով պահանաջում են իմ հրաժարականը: Ես հրաժարական տվողներից չեմ»:

Մինչ գյուղապետն ասում է, թե այս մարդիկ իր ընդդիմությունն են, տասներկու տարվա ընթացքում երբեք իրեն չեն ընտրել, Կամսար Թամարյանը հավատացնում է, որ ինքն ու իր ընտանիքի անդամներն էլ այս Վ. Եղիազարյանին են ընտրել. «Մենք չենք իմացել իրա ով ըլնելը: Ես իրան եմ ընտրել, մենք մոտիկ ենք էղել: Էսօր գյուղն իմ երեսովն ա տալի, թե ասում էիրՙ լավ տղա ա: Ես չեմ իմացել: Բազի հարս է ըլնում, որ քողը շպրտում ա, ասըմ են` վայ էս ի՞նչ էր»:

Գյուղացիները հույս ունեն, որ գոնե այս խնդիրների բարձրաձայնումից հետո նախագահը, կառավարությունը կարձագանքնեն ու իրենց «կազատեն» այդ մարդուց:

Աստղիկ ԿԱՐԱՊԵՏՅԱՆ

Աղբյուր՝ new2.yerkir.am

[Tig]

[Tig]

Ես չգիտեի, որ դպրոցների տնօրեններին ընտրում են...
Այս միջադեպը մեծ առաջընթաց եմ համարում քաղհասարակության ձևավորման գործընթացում:

Բողոքի մասնակիցները, «դավաճան» և «հուդա» վանկարկելով, շրջապատել են գյուղապետի տունը
Լարիսա Փարեմուզյան
00:19, 21 դեկտեմբերի, 2011

Երեկ Լոռու մարզի Աքորի համայնքի միջնակարգ դպրոցի տնօրենի ընտրությունը վերածվեց բողոքի ցույցի: Տնօրենի ընտրության դպրոցական խորհրդի քվեարկության արդյունքներին ժամը 14:00-ից դպրոցի բակում սպասող աշակերտները, ուսուցիչներն ու ծնողները պնդում էին, որ գյուղի դպրոցի տնօրեն պետք է ընտրվի միայն ու միայն աքորեցի: Դպրոցական խորհրդի քվեարկությունը հրապարակելուց հետո, նրանք բողոքի երթ կազմակերպեցին դեպի գյուղապետարան:

Աքորիի միջնակարգ դպրոցի նախկին տնօրեն Ասյա Թոմոյանը 2010թ.-ի դեկտեմբերի 30-ին կենսաթոշակի անցնելու պատճառով ազատվել է տնօրենի պարտականություններից: Այդ ժամանակվանից տնօրենի ժամանակավոր պաշտոնակատար է նշանակվել դպրոցի զինղեկ Կիմիկ Պետրոսյանը:

Դպրոցի տնօրենի ընտրությունը նշանակված էր այսօր` ժամը 14:00-ին: Ընտրությանը մասնակցելու հայտ էին ներկայացրել համայնքի բնակիչ Արմեն Նիազյանը, ով աշխատում է Ալավերդու արհեստագործական ուսումնարանում` որպես ֆիզղեկ, և Ալավերդի քաղաքի բնակիչ, թիվ 2 միջնակարգ դպրոցի պատմության ուսուցչուհի Անահիտ Մուսայելյանը: Երկու թեկնածուներն էլ ունեին հավաստագիր:

Տնօրենի ընտրությունը անցկացնող դպրոցական խորհրդի նախագահը Աքորիի համայնքապետ Կամո Սիմոնյանն էր: Խորհրդի կազմում դեռ երկու տարի առաջ ընտրվել էին 8 անդամներ, այդ թվում` դպրոցի երկու ուսուցիչ, երկու ծնող, Աքորիի գյուղապետ Կամո Սիմոնյանը, գյուղապետի տեղակալը, գյուղապետի կին, մանկապարտեզի տնտեսվարը:

Ընտրության հարցում դպրոցական խորհրդի անդամների վրա նշանակալից էր գյուղապետ Կամո Սիմոնյանի ազդեցությունը, ով էլ, ի հակառակ իր ղեկավարած համայնքի դպրոցի 36 մանկավարժների ու համագյուղացիների, խորհրդի անդամների իր թիմով քվեարկեց տնօրենի թեկնածու Անահիտ Մուսայելյանի օգտին:

Քվեարկության արդյունքներով, Արմեն Նիազյանը ստացել էր խորհրդի անդամների 3, իսկ Անահիտ Մուսայելյանը 5 քվեները: Սա առաջացրեց Աքորիի դպրոցի ուսուցիչների, աշակերտների և ծնողների վրդովմունքը:

Երեխաները վանկարկում էի, որ Անահիտ Մուսայելյանը հեռանա դպրոցից և գյուղից:

Տնօրենի թեկնածու Արմեն Նիազյանը «Հետքին» ասաց, որ արդարացի չի համարում դպրոցական խորհրդի կազմում համայնքի ղեկավարի, նրա կնոջ, նրա տեղակալի և մանկապարտեզի տնտեսվարի ներկայությունը. «Այս բոլոր մարդկանց վրա Կամո Սիմոնյանը ազդելու լծակներ ուներ»,- ասաց թեկնածուն: Արմեն Նիազյանը մասնագիտությամբ ֆիզկուլտուրայի ուսուցիչ է: Ավարտել է Երևանի ֆիզիկական կուլտուրայի պետական ինստիտուտը:

Տնօրենի թեկնածու Անահիտ Մուսայելյանն էլ ասաց, որ ունի 20 տարվա մանկավարժական աշխատանքի փորձ: Նա ասաց, որ դպրոցը ղեկավարելու իր առաջին քայլերը պետք է լինի դպրոցի հիմնախնդիրներին ծանոթանալը: Անահիտ Մուսայելյանը գտնում է, որ դպրոցական խորհրդի որոշումը անբեկանելի է, և ոչ ոք չի կարող ազդել այդ որոշման վրա:

Դպրոցական խորհրդի և Աքորի համայնքի ավագանու անդամ Վեներա Նիազյանը նույնպես հայտնեց իր դժգոհությունը դպրոցական խորհդի կազմի վերաբերյալ. «Ընտրվել է մակավարժական կոլեկտիվից 2 ներկայացուցիչ, սա արդար եմ համարում: Արդար եմ համարում նաև ծնողական կոմիտեի կողմից ընտրված 2 ծնողների ընտրությունը, մնացածները, այդ թվում` համայնքապետը, համայնքապետի տեղակալը, համայնքապետի կինը և մանկապարտեզի տնտեսվարի ընտրությունը ես տեսնում եմ սոսկ լծակների օգտագործում: Եթե պետությունը Արմեն Նիազյանին հավաստագիր է տվել, նշանակում է` նրան պատրաստ է տեսնել տնօրենի պաշտոնում: Արմեն Նիազյանը մեր դպրոցի շրջանավարտն է և մենք նրան ենք ուզում տեսնել մեր դպրոցի տնօրեն»,- ասաց Վեներա Նիազյանը:

Աքորիի համայնքապետ Կամո Սիմոնյանը լրագրողներին ասաց, որ խորհրդի որևէ անդամի չի համոզել Անահիտ Մուսայելյանին ընտրելու հարցում: Աքորրի միջնակարգ դպրոցի ուսուցչուհի Սեդա Թոմոյանն էլ ասում է, որ իրենց հայրենի գյուղի դպրոցը չեն տա օտարին. «Այդպիսի բան չի կարող լինել: Դպրոցի ամբողջ կոլեկտիվը ստորագրել է, որ պահանջում են Արմեն Նիազյանին, պահանջում են մեր գյուղացուն: Այլ դեպքում մենք կպատրաստվենք անժամկետ գործադուլի»:

Կրթության և գիտության նախարարության գլխավոր մասնագետ Վանիկ Միսակյանի կարծիքով, դպրոցական խորհուրդն է տնօրենի ընտրության որոշումը կայացրել, և այդ որոշումը պարտավոր են բոլորը ընդունել. «Այս աղմուկը ես չեմ հասկանում արդեն»,- ասաց նա:

Խորհրդի որոշումից հետո նորընտիր տնօրենին Վանիկ Միսակյանը փորձեց ներկայացնել մանկավարժական կոլեկտիվին: Վերջինս չընդունեց դպրոցական խորհրդի որոշումը և Անահիտ Մուսայելյանի լիազորությունները: Այնուհետև դպրոցի ուսուցիչները, աշակերտները և ծնողները երթով շարժվեցին դեպի գյուղապետարանին հարող հրապարակ: Երթի մասնակիցները, «դավաճան» և «հուդա» վանկարկելով, շրջապատեցին գյուղի հրապարակի հարևանությամբ գտնվող գյուղապետ Կամո Սիմոնյանի տունը:

Աքորիի միջնակարգ դպրոցի ուսմասվար Սեդա Խլոպուզյանը հավաքվածներին հայտարարեց, որ դեկտեմբերի 21-ից դպրոցի մանկավարժական կոլեկտիվը հայտարարում է անժամկետ գործադուլ:

Ժամը 18:00-ի սահմաններում աքորեցիների բողոքի երթը ցրելու համար գյուղի հրապարակում հայտնվեցին Թումանյանի բաժնի ոստիկանները: Նրանք երթի մասնակիցներին հորդորեցին ցրվել, իսկ լրագրողներին արգելեցին լուսանկարել իրենց: Ըստ շրջանառվող լուրերի` այսօր Աքորի գյուղի դպրոցի ուսուցիչների հետ կհանդիպի Լոռու մարզպետ Արթուր Նալբանդյանը:

Աղբյուր՝ hetq.am

[Tig]

Դասադուլը շարունակվում է. Աքորիում «դրսից բերված» տնօրենին չեն ընդունում
Լարիսա Փարեմուզյան

12:10, 23 դեկտեմբերի, 2011
Արդեն երկու օր է՝ Լոռու մարզի Աքորի համայնքի միջնակարգ դպրոցի տնօրենի դեկտեմբերի 20-ին տեղի ունեցած ընտրության արդյունքների պատճառով դադարեցված է դպրոցի ուսումնական պարապմունքները:

Դպրոցի կոլեկտիվի 41 անդամները սովորականի նման ներկայանում են դպրոց, սակայն դասարան չեն մտնում և դաս չեն պարապում: Իսկ դպրոցի մուտքի մոտ հավաքված աշակերտները «Հետքին» ասացին, թե դասի չեն գալու մինչև դպրոցի տնօրեն չնշանակվի իրենց համագյուղացի Արմեն Նիազյանը:

Դպրոցի կառավարման խորհրդի քարտուղար Սեդա Թոմոյանը «Հետքին» հայտնեց, որ առայժմ, բացի լրատվամիջոցներից, ոչ ոք ուշադրություն չի դարձրել իրենց խնդիրներին: Տնօրենի ընտրությունից հետո Աքորիի միջնակարգ դպրոցի մանկավարժական կոլեկտիվի, աշակերտների և նրանց ծնողների դեկտեմբերի 20-ին անցկացրած բողոքի ակցիային դեռևս չի արձագանքել Լոռու մարզպետարանի կրթության վարչությունը, իսկ մարզպետ Արթուր Նալբանդյանը մարզի հեռուստալրատվամիջոցներով, կարևորելով դպրոցների կառավարման խորհուրդների դերը, ասել է, որ Աքորիի կառավարման խորհրդի որոշումն իր համար անբեկանելի է:

Աքորեցիները կարծում են, որ գյուղապետ Կամո Սիմոնյանը կառավարման խորհրդում գյուղի դպրոցի տնօրեն ընտրվելու հարցում Անահիտ Մուսայելյանին աջակցել է հենց Լոռու մարզպետի հանձնարարությամբ: Այս տեսակետից էլ աքորեցիները գյուղապետին մեղադրում են համայնքի բնակիչների հետ միաբան չլինելու համար:

Կառավարման խորհրդի քարտուղար Սեդա Թոմոյանն ասում է, թե հենց սկզբից դպրոցի տնօրենի թափուր տեղի համար մրցույթն անցկացվել է տնավարի: Խորհրդի նախագահը նախօրոք նիստ չի անցկացրել եւ խորհրդի անդամներին չի ծանոթացրել նիստի ընթացակարգին. «Նախօրոք մենք չենք կնքել քվեաթերթիկները. բոլոր աշխատանքները կատարվել են հենց ամսի 20-ին` տնօրենի ընտրության օրը»:

Ըստ Ս. Թոմոյանի՝ կառավարման խորհրդի նիստը ղեկավարել է կրթության և գիտության նախարարության գլխավոր մասնագետ Սահակ Միսակյանը եւ ընտրությանը վերաբերվել տնավարի: Իր ասածները հիմնավորելու համար խորհրդի քարտուղարը փաստարկում է. «Առաջին՝ ավել քվեաթերթիկները չի ոչնչացվել և ասպարեզից չի հանվել: Դրանք մինչև հաջորդ օրը դրված են եղել սեղանին: Երկրորդ՝ քվեարկված քվեաթերթիկները տնօրենի ընտրությունից հետո չի հանձնվել խորհրդի քարտուղարին, որպեսզի փակ ծրարով դրվեր ընտրության մյուս փաստաթղթերի մեջ: Մինչդեռ խորհրդի նախագահ Կամո Սիմոնյանը քվեաթերթիկները դրել է գրպանը և տարել իր հետ»:

Թոմոյանը հավաստիացնում է, որ երեկոյան գյուղապետի աշխատասենյակում, երբ ոստիկանների ներկայությամբ իր գործընկերների հետ գյուղապետից պահանջել է քվեաթերթիկները, վերջինս դրանք հանել է իր գրպանից:

Բացի այդ՝ կառավարման խորհրդի քարտուղարը նաև պարզել է, որ Անահիտ Մուսայելյանի՝ խորհրդին ներկայացրած հավաստագիրը կնքված և ստորագրված չէ, ուստի «չունի իրավական ուժ, որի պատճառով նա անօրինական է մասնակցել տնօրենի ընտրությանը:

Սեդա Թոմոյանն ասում է, որ մանկավարժները եւ աշակերտները դպրոցի կառավարման խորհրդից պահանջում են տնօրենի նոր ընտրություններ. «Այս ընտրությունները լրիվ կեղծ էր: Մենք արդեն գիտենք, որ տնօրենի թեկնածուների ձայների հարաբերությունը 4:4 է եղել»: Թոմոյանը նաեւ թվարկում է խորհրդի այն 4 անդամների անունները, ովքեր քվեարկել են դպրոցի տնօրենի թեկնածու Արմեն Նիազյանի օգտին, սակայն «ձայներից մեկը կեղծվել է»: Թե կոնկրետ ո՞ւմ ձայնն է կեղծվել, տարեց ուսուցչուհին դժվարանում է պատասխանել: «Ըստ երևույթին, քվեաթերթիկ է կեղծվել»,- ենթադրում է նա:

Խորհրդի 4 անդամները ստորագրությամբ հավաստիացրել են, որ իրենց քվեն տվել են Արմեն Նիազյանին: Ըստ կառավարման խորհրդի քարտուղարի՝ իրենց հայտնի է, որ մարզպետարանում սպասել են Անահիտ Մուսայելյանի ոչ թե 5, այլ 6 քվեների:

«Ինչո՞ւ է պարոն մարզպետն իր ելույթներում սիրում կրկնել, որ ինքը սիրում է Ալավերդին: Իսկ մենք իրավունք չունե՞նք ասելու, որ մեր գյուղի շահերից ելնելով` ուզում ենք դպրոցի տնօրեն ընտրել մեր գյուղացուն»,- հարցնում է ուսուցիչներից մեկը:

Պատմության ուսուցիչ Գնել Թաթոյանը դպրոցի տնօրենի ընտրության շուրջ ընթացող զարգացումների մասին ասում է. «Մեր դպրոցի տնօրենի ընտրությունը չի համապատասխանում մեր օրենքների պահանջներին, այդ պատճառով էլ մենք դասապրոցեսը դադարեցնում ենք»: Նա վստահեցնում է, որ դրանից աշակերտները չեն տուժի, քանի որ ուսուցիչները պատրաստ են երեխաների հետ պարապել լրացուցիչ եւ բացը լրացնել:

Ուսուցիչներ Արմենուհի և Վանիկ Սիմոնյաններն ու Արարատ Դալլաքյանը, ի պատասխան այն խոսակցությունների, որ ֆիզկուլտուրայի ուսուցիչ Արմեն Նիազյանը չի կարող լավ տնօրեն լինել, ասում են. «Շատ պատմության և այլ առարկաների մասնագետներ տնօրենի հավաստագիր չեն կարողացել ստանալ, իսկ մեր համագյուղացին ստացել է: Այդ դեպքում ինչո՞ւ պետք է դրսից տնօրեն նշանակվի մեր գյուղում»:

Դպրոցի արհմիության տեղկոմի նախագահ Շուրա Աբգարյանն էլ ասում է, որ ելնելով իրավիճակից՝ դպրոցի արհմիութենական և կոլեկտիվի ընդհանուր ժողովը որոշել է ուսումնական պարապմունքները դադարեցնել մինչև դեկտեմբերի 23-ը. «Եթե դրանից հետո տնօրենի նոր ընտրություն անցկացնելու մեր պահանջին ընթացք չտան, մենք նորից շարունակելու ենք: Նույնը պահանջում են նաև երեխաները:»

Շուրա Աբգարյանը նշում է, որ արհմիութենական կազմակերպության այս որոշման արձանագության օրինակն արդեն ուղարկվել է Լոռու մարզպետարան եւ երկրի նախագահին: Օրինակներ կուղարկեն նաեւ կրթության ու գիտության նախարարին և տարբեր իրավապաշտպան կազմակերպություններին:

Աղբյուր՝ hetq.am

[Tig]

[Tig]