Գառնիկի պարը...
Լուսաբացի հետ տարածվեց Գառնիկի մահվան լուրը:
Գյուղն իրեն որբացած զգաց, մեծ ու փոքր գլուխները կախեցին: Լուսաբացն էլ մռայլ բացվեց էդ օրը, ու անձրև սկսեց տեղալ:
Տղամարդիկ արտ գնալու փոխարեն հավաքվեցին գյուղամիջում, աշխատանքի բաժանում արեցին, ու ամեն մեկն իր գործին անցավ` մի մասը գնացին գերեզման փորելու, մյուս մասը սկսեցին պատրաստություն տեսնել` շրջկենտրոնից եկած մարդկանց տեղավորելու համար:
Կանայք հավաքվեցին Գառնիկի հարսների շուրջը, ու սկսեցին տունն ազատել:
Երիտասարդները հավաքվեցին ակումբում` Գառնիկի թոռն էլ հետները: Ակումբը դատարկեցին, մաքրեցին, որ Գառնիկին վերջին հրաժեշտը էդտեղից տան:
Ողջ գյուղը վիրավոր փեթակի նման անօգնական բզզաց....
Երեք օր ու գիշեր անձրը մաղեց: Գյուղը լաց լացեց, երկինքն էլ հետները:
Երեք օր ուգիշեր գյուղի երիտասարդ տղաներն ու աղջիկները մի-մի ծաղիկ ձեռքերին հերթապահեցին ակումբի մոտ: Բոլորի համար մեծություն էր Գառնիկը, բոլորի գլխին խաչ էր պահել ու կնքել: Գյուղի բոլոր երիտասարդների կնքահայրը Գառնիկն էր....
Առավոտյան ամբողջ դպրոցը գնաց դաշտերը ծաղիկ հավաքելու: Ամեն մեկը մի գիրկ ծաղիկ բերեց իրենց աշխարհի վառվող դաշտերից: Բերեցին անձրոտ ծաղիկներն ու Գառնիկի վերջին ճանապարհին փռեցին: Տղամարդիկ գնացին գերեզմանը անձրևաջրից դատարկելու:
Դագաղը դուրս տանելուց առաջ անձրևը կտրվեց, արև դուրս եկավ:
Արևի տակ, մարդկանց ալիքի վրայով Գառնիկի դագաղը նավակի պես լողաց դեպի գերեզման: Ջահելները մի-մի ծաղիկ ձեռքներին պատ կազմեցին ճանապարհի երկու կողմերում:
Երբ Գառնիկին վերջին հրաժեշտը տվեցին, ջահելներից մեկը վեր կացավ ու.
- Ջահելնե՛ր, Գառնիկ ամին մեր գլխին խաչ պահելուց հետո բոլորիս նույնն ասաց. "Մանչը՜ս, թաղմանս պար գուքաս, էղա՞վ....": Դե ելեք մեր ամու խնդրանքը կատարենք,- ու ձեռքերը տարածեց:
Երկու հարյուր երիտասարդ շրջան կազմեցին և ու ուս ուսի տված լալով պար պարեցին, կրունկներով գետին շարժեցին ու պարով` հոգիներ: Գյուղացիք երկրորդ շրջանը կազմեցին ու պարեցին Գառնիկի պարը:
Երբ թաղման թափորը հեռացավ, անձրևը նորից սկսեց մաղել Գառնիկի գերեզմանի վրա.... Էլի երեք օր ու գիշեր.....
Գառնիկն իր պարով իր սանիկներին` գյուղի երիտասարդությանը կապեց իրար:
Դրանից հետո գյուղում ամեն հարասանիքի երիտասարդները դուրս են գալիս դաշտ ու գետինը դղրդացնելով պարում են "Գառնիկի պարը"....
Մեջբերել
Նաիրուհի-ի խոսքերից
(աչքովս տեսածն եմ ասում
Էջանիշներ