Սիրելի ակումբցիներ,
Մեկնարկել է այսպես կոչված «վեբ կայքերի համահայկական մրցանակաբաշխությունը»: Ակումբը ևս որոշեց փորձել իր ուժերն այդ մրցույթում:
Թեև այնքան էլ ճիշտ չէ ինքնագովեստը, բայց ուզում եմ մի քանի բառ ասել ակումբի մասին:
Ակումբը 2006 թվականին ժամանակի պահանջ էր, որը քչերն էին հասկանում: Ես հրաշալի հիշում եմ վեբ ոլորտի տարբեր ներկայացուցիչների հետ իմ խոսակցությունները: Հիմնականում ասում էին, որ հայերեն ու հայատառ ֆորումը ապագա չի կարող ունենալ: Դա ընդվզում առաջացրեց: Մենք՝ բոլոր մյուսներից տարբերվող այբուբեն ունեցող ազգը, ըստ այդ դիտարկումների, ժամանակակից տեխնոլոգիաներին պետք է հարմարվեր այլ լեզվով ու այլ այբուբենով:
Բարեբախտաբար հայերեն ֆորում ստեղծելու միտքը բոլորը չի, որ մերժեցին: Ու ընկերներիս ակտիվ օգնությամբ բացեցի ակումբը, որը սկզբում գործում էր այլ հասցեում: Հենց այդտեղ էլ անմիջապես պարզվեց, որ սին են բոլոր տեսակետները, թե իբր հայատառ շփումը պահանջարկ չունի: Ակումբը շատ արագ կայացավ: Շուտով այն մրցակցում էր հայկական ամենահզոր ֆորումների հետ՝ շարունակելով մնալ միակ հայատառը: Իրականում այլ հայերեն ֆորումներ էլ են եղել, որոնք այս կամ այն պատճառով չեն կայացել, բայց ակումբը, արդեն կարելի է արձանագրել, ծնվեց ճիշտ պահին ու ճիշտ տեղում: Որոշ ժամանակ անց մրցակից ֆորումներից շատերը «ապրեցին իրենց դարը», իսկ ակումբը շարունակեց զարգանալ ու մեծանալ, ու այսօր կարող եմ հանգիստ խղճով, առանց խղճի խայթի ասել, որ այն ամենահզոր հայկական ֆորումներից մեկն է, իսկ հայատառ՝ ամենամեծը:
Ակումբը շարունակում է մեծանալ: Այս կամ այն կերպ ամենքս էլ դժգոհ ենք նրանից, ամենքս էլ ուզում ենք էլ ավելի ակտիվ, էլ ավելի որակյալ, էլ ավելի անաչառ, էլ ավելի ... տեսնել: Բայց այն, ինչին իրար հետ հասել ենք, քիչ չէ:
Ակումբը գոյատևել է մեր հաշվին: Երևի ամենքդ էլ գիտեք, որ այն երբևէ չի եղել շահույթի աղբյուր, նրանում չի եղել վճարովի գովազդ, չի մատուցվել վճարովի ծառայություն: Ակումբը պահվել է մեր ու միայն մեր միջոցներով: Երբեմն փոքրիկ հանգանակություններով, երբեմն ուղղակի մեր անմնացորդ ներդրումներով:
Ակումբից հետո ծնվեց նաև hayeren.am նախագիծը, որը առաջարկում էր թե՛ ակումբում ներդրված գործիքները, թե ֆորումային համակարգի թարգմանությունը, թե այլ գործիքներ: Այս նախագիծը ևս անշահախնդիր աշխատել է ու աշխատում է մինչ օրս: Այսօր այդ նախագծի ծրագրերը կիրառվում են բազում կայքերում, նրա առաջարկած թարգմանության հիման վրա գործում է շուրջ 5 ֆորում, ու այս թիվը գնալով ավելանալու է, հայերեն.ամ-ի տրամադրած ծառայություններն ու գործիքները ընդլայնվելու են:
Երկու նախագծերն էլ մասնակցում են մրցանակաբաշխությանը, ու մեր այցելուների քվեարկությունը մի յուրատիպ գնահատական կլինի մեր գործին, որի համար մենք շատ շնորհակալ կլինենք Ձեզնից: Ձեզնից շատ ժամանակ չի պահանջվում, պարզապես եթե հավանում եք մեր կայքերը ու ուզում եք, որ դրանք էլ ավելի զարգանան, քվեարկեք մեր օգտին:
Ակումբի օգտին կարող եք քվեարկել այս էջում:
Հայերեն.ամ նախագծի օգտին կարող եք քվեարկել այս էջում:
Շնորհակալություն Ձեր ուշադրության ու քվեների համար:
Մեջբերել
)
Lianik-ի խոսքերից
Ինչպես քվեարկել Օպերա բրաուզերով
Էջանիշներ