ԱՐՑԱԽԻ ՏԻԳՐԱՆԱԿԵՐՏԸ
Թեեւ ԳԱԱ հնագիտության և ազգագրագիտության ինստիտուտի Արցախի հնագիտական արշավախմբի ղեկավար Համլետ Պետրոսյանը Արցախից մեկ օրով էր վերադարձել, սակայն ժամանակ գտավ Տիգրանակերտում իրականացվող վերջին պեղումների արդյունքները ներկայացնելու:
Նրա խոսքով, այս տարի Տիգրանակերտի տարածքում իրականացվող պեղումները ընթանում են երեք հիմնական հատվածներում` Ամրացված թաղամասում ընթանում է հյուսիսային պարսպապատի բացումը, արդեն 20 մետր առաջացել են: Ուշագրավ այն է, որ ունենք պատեր, որոնց բարձրությունը 4 մետրից ավել է: Երկրորդ հատվածը միջնաբերդի հատվածի պեղումներն են, որտեղ նորից բացվում են ժայռափոր համալիրներ: Երրորդ հիմնական տեղամասը բազիլիկ եկեղեցու պեղումներն են, որտեղ հարավից եկեղեցուն կցված է եղել բաց սյունասրահ, հիմա բացում են սյունասրահի առաջին կամարը և աջ սենյակը, որից հետո բացվելու է սալահատակված սյունասրահը, որտեղ, ըստ բանախոսի, մի քանի ճարտարապետական քանդակներ կան:
Այս ընթացքում շարունակում են հայտնաբերել տարբեր դարաշրջանների իրեր, այդ թվում` պղնձե զարդեր, դրամներ, զանազան կենդանակերպ անոթներ: Մոտավորապես 10 օր առաջ պեղել են մի շատ հզոր անտիկ կարաս` վրան օձապատկերով: Համլետ Պետրոսյանի խոսքով` սա իր տարողությամբ Արցախի ամենամեծ կարասն է, մոտավորապես 600 լիտրից ավելի, և որը պետք է վերականգվի և տեղադրվի թանգարանում: Ըստ նրա` Տիգրանակերտի անտիկ դամբարանադաշտի փնտրտուքները հաջողությամբ են ավարտվում. «Մենք այսօր առնվազն երկու կետ ունեք: Հույս ունենք առաջիկա 10-15 օրերին ավելի ամբողջական ներկայացնել անտիկ դամբարանադաշտը, սա շատ էական է, որովհետև այն ժամանակվա թաղումներում բավականին նյութեր էին դրվում, և մենք հույս ունենք, որ մենք գոնե ինչ-որ դրամներ կգտնենք, որոնք ավելի կհստակեցնեն քաղաքի ժամանակը», նշել է Համլետ Պետրոսյանը:
Ի դեպ, երեք օր առաջ էլ գտել են արդեն երրորդ սկյութական նետասլաքը: Սակայն մինչև այսօր ավելի հին իրեր, քան մ.թ.ա 1 դարինն է, դեռ չեն հայտնաբերել: Տիգրանակերտի տարածքից ,սակայն, մինչև այսօր որևէ արձանագրություն չեն գտել, որտեղ հիշատակված լինի Տիգրանակերտ անունը:
Ի դեպ, արդեն երրորդ տարին է` Տիգրանակերտում իրականացվող պեղումները ֆինանսավորում է ԼՂՀ կառավարությունը:
Աղբյուր
Մեջբերել
Էջանիշներ