Ամերիկյան 75 կործանիչներ և 6 հազար զինվորներ շարժվում են դեպի Հարավային Կորեա
Ամերիկյան վարչակազմը և Հարավային Կորեայի իշխանությունները որոշում են կայացրել անցկացնել համատեղ զորավարժություններ։ Այս մասին են տեղեկացնում արևմտյան լրատվամիջոցները՝ նշելով, որ այդ որոշումը կայացրել են Միացյալ Նահանգների նախագահ Բարաք Օբաման և Հարավային Կորեայի նախագահ Լի Մյոնգ Բակը։
Լրատվամիջոցները նշում են, որ Միացյալ Նահանգների այդ քայլն ուղղված է զսպելու Հյուսիսային Կորեային, որը երեկ ռմբակոծել էր Հարավային Կորեայի Յենփյոնգ կղզին։ Սակայն Սեուլում ամերիկյան ներկայացուցիչները վստահեցնում են, որ ԱՄՆ–ն ու Հարավային Կորեան վաղուց էին ծրագրել անցկացնել համատեղ զորավարժություն։
Ամերիկյան ներկայացուցիչները հայտարարել են նաև, որ ներկա պահին Տոկիոյից դեպի Հարավային Կորեա է շարժվում USS George Washington ատոմային նավը, որը տանում է 75 ռազմական ինքնաթիռ և մոտ 6 հազար զինվոր։
Համատեղ զորավարժությունը նախատեսվում է անցկացնել այս կիրակի։ Որոշ լրատվամիջոցների գնահատմամբ՝ ռազմական այդ համատեղ զորավարժությունը կարող է լուրջ լարվածություն առաջացնել Միացյալ Նահանգների և Չինաստանի հարաբերություններում, հաշվի առնելով, որ վերջինս հովանավորում է Հյուսիսային Կորեային։
Հիշեցնենք, որ նախօրեին Հյուսիսային Կորեայի զորամիավորումները ծանր հրետանիով ռմբակոծել էին Հրավային Կորեային պատկանող Յենփյոնգ կղզին, ինչի հետևանքով փլուզվել է 70 շինություն։ Զոհվել էր հարավկորեացի 2 զինծառայող, 17 զինվոր վիրավորվել էր, որոնցից երկուսի վիճակը բժիշկները գնահատել են ծանր։ Վնասվածք էր ստացել նաև 3 խաղաղ բնակիչ։
Էջանիշներ