Տեղափոխություն ժամանակով

[Lion]

Մարդու ուղևորությունը ժամանակի մեջ և նրա այցելությունը ապագա հնարավոր է, իսկ անցյալ՝ ոչ։ Այս կարծիքին է ժամանակակից ֆիզիկայի խոշորագույն տեսաբաններից բրիտանացի Սթիվեն Հոքինգը։ Լոնդոնյան Sunday Times շաբաթական պարբերականը սենսացիոն հոդված է տպագրել՝ նվիրված նրա նորագույն հետազոտության եզրակացություններին։ Այս մասին հաղորդում է ИТАР-ТАСС-ը։

«Համաշխարհային գիտությունը երկար ժամանակ հերետիկոսություն էր համարում ժամանակի մեջ ուղևորության մասին խոսակցությունները, և ես սովորաբար ձեռնպահ եմ մնում այդ թեմայով խոսելուց, որպեսզի ինձ տարօրինակ չհամարեն։ Այնինչ հիմա ես չեմ ուզում ավելորդ զգուշավոր լինել»,- հայտարարել է Հոքինգը։

Նրա կարծիքով՝ տեսականորեն մարդու՝ ապագա այցելելու ոչ մի խոչընդոտ չկա։ Ըստ գիտնականի՝ դրա համար, իհարկե, անհրաժեշտ է ստեղծել գերարագ տիեզերական սարք, որը կկարողանա հասնել լույսի արագության 98 տոկոսին։ «Երկիր մոլորակից մեկնարկելու պահից այդ սարքին անհրաժեշտ կլինի 6 տարի՝ նման արագություն հավաքելու համար։ Արդյունքում, այդ սարքում ժամանակի ընթացքը կփոխվի՝ դանդաղելով դրանում գտնվող մարդկանց համար. նրանց ապրած մեկ օրվա փոխարեն Երկրում կանցնի մի ամբողջ տարի»,- նշել է գիտնականը։

Նա հավելել է, որ նման տիեզերանավի ստեղծումը շուտով կհայտնվի մարդկության օրակարգում, քանի որ քաղաքակրթության պահպանման համար անհրաժեշտ կլինի դուրս գալ Արեգակնային համակարգի տարածքից։ «Սակայն ուղևորվել անցյալ հնարավոր չէ»,- ընդգծել է Հոքինգը։ Նա նշել է, որ գիտության հիմունքներին հակասում է այն տեսությունը, ըստ որի, ժամանակի մեջ գոյություն ունեն «խոռոչներ», որոնց միջով կարելի է հայտնվել անցյալում։

Tert.am

Փաստորեն ես, չիմանալով այդ մասին, արտահայտեցի միտք, որին համաձայն է ժամանակակից խոշորագույն ֆիզիկոսներից մեկը – հիանալի է… Իսկ նկարագրված "էֆեկտնրեր"-ի մասին ես լսել եմ ու կարծում ե, որ դրանք ահագին խելքին մոտ են...