Ավարտվեց ՀՀ նախագահ Սերժ Սարգսյանի հանդիպումը ԱՄՆ նախագահ Բարաք Օբամայի հետ։ Այն նախատեսվածից մի փոքր ուշ սկսվեց և տևեց 45 րոպե։ Երկու երկրների ղեկավարները քննարկել են հայ-ամերիկյան երկկողմ հարաբերությունների զարգացման հեռանկարները։ Սերժ Սարգսյանը և Բարաք Օբաման անդրադարձել են նաև Հայաստանի և Թուրքիայի միջև հարաբերությունների կարգավորման ընթացքին, մտքեր են փոխանակել տարածաշրջանային զարգացումների և Լեռնային Ղարաբաղի հիմնախնդի խաղաղ կարգավորման գործընթացի ներկա փուլի վերաբերյալ։
Ինչպես հաղորդում է Tert.am-ի թղթակիցը Վաշինգտոնից, նախատեսվում է նաև ՀՀ նախագահի հանդիպումը ԱՄՆ պետքարտուղար Հիլարի Քլինթոնի հետ, որի օրն ու ժամը դեռ ճշտվում են։
Վաշինգտոնում ավարտվեց ՀՀ նախագահ Սերժ Սարգսյանի և Թուրքիայի վարչապետ Ռեջեփ Թայիփ Էրդողանի հանդիպումը։ Ինչպես հաղորդում է Tert.am-ի թղթակիցը Վաշինգտոնից, հանդիպմանը հայկական կողմից մասնակցում էին նախագահը, արտգործնախարար Էդվարդ Նալբանդյանը, նախագահի աշխատակազմի ղեկավարի տեղակալ Վիգեն Սարգսյանն ու թարգմանիչը։ Թուրքական կողմից մասնակցում էին վարչապետը, արտգործանախարար Ահմեթ Դավութօղլուն և փոխարտգործնախարար Ֆրիդուն Սինիրլիօղլուն։ Հիշեցնենք, որ վերջինս օրեր առաջ ժամանել էր Հայաստան և Սերժ Սարգսյանին էր փոխանցել Էրդողանի նամակը՝ հանդիպման խնդրանքով։ Հանդիպման մանրամասների վերաբերյալ տեղեկություն չի հաղորդվում։ Նախապես տեղեկացվել էր, որ հանդիպման արդյունքում հայտարարություն չի արվի։
Հանդիպումն անցել է թափանցիկ դռան ետևում՝ Միջուկային անվտանգության հարցերով համաշխարհային գագաթնաժողովի պաստառի ֆոնին։
Հանդիպումից անմիջապես հետո Սերժ Սարգսյանն այցելելու է Վաշինգտոնի Ազգային տաճար, ծաղկեպսակ է դնելու ԱՄՆ նախկին նախագահ Վուդրո Վիլսոնի շիրիմին։
Թերթ.am
Մեջբերել
Էջանիշներ