Ղրղըզստանի մայրաքաղաք Բիշքեկում զանգվածային անկարգությունները կարող են վերաճել հեղափոխության։ Ընդդիմության հազարավոր կողմնակիցներ մոտեցել են նախագահի նստավայրին, սակայն նրանց գրոհը կասեցվել է։ Ոստիկանությունը նրանց հետ է մղել արցունքաբեր գազով, նռնակներով և հրազենով։
Բախումների հետևանքով, տարբեր աղբյուրներով, զոհվել է 3-15 մարդ, զոհվածների մարմինները հեռացնում են հրապարակից։ Ընդդիմադիրները Տալաս քաղաքում գերի են վերցրել երկրի առաջին փոխվարչապետ Աղըկբեկ Ժապարովին և ներքին գործերի նախարար Մոլդոմուս Կոնգանտիևին: Վերջինս, ըստ որոշ տեղեկությունների, ստացած վերքերից մահացել է հիվանդանոցի ճանապարհին:
Զանգվածային ցույցեր են նաև Ղրղըզստանի մյուս շրջաններում, որտեղ մեկը մյուսի հետևից տապալվում են տեղական իշխանությունները։ Մարդկանց բազմությանը, կարելի է ասել, ոչ ոք չի ղեկավարում. գիշերը ձերբակալվել են ընդդիմության գրեթե բոլոր առաջնորդները։
Ընդդիմության ներկայացուցիչները վստահեցնում են, որ Բիշքեկի հրապարակում գործում են դիպուկահարները։
Ըստ որոշ աղբյուրների՝ հրապարակում տեղի ունեցած բախումների հետևանքով տուժել է մոտ 100 մարդ։ Ցուցարարները գրոհել և իրենց հսկողության տակ են վերցրել երկրի Առաջին ազգային հեռուստաալիքը. հեռարձակումը դադարեցվել է։
Բիշքեկի քաղաքապետարանը արտակարգ իրավիճակ է հայտարարել քաղաքում։ Մեկ ամսով՝ ժամը 22-ից մինչև 6-ը, երկրում կգործի պարետային ժամ։ Սակայն այդ որոշումը դեռ չի հաստատվել խորհրդարանի կողմից։ Կառավարության ներկայացուցիչները զերծ են մնում պաշտոնական հայտարարություններից։
«Ճնշումները վաղուց էին սկսվել. չէ՞ որ նախագահ Կուրմանբեկ Բակիևի համար սա կենաց մահու պայքար է»,- նշել է ընդդիմության առաջնորդներից մեկը։
http://tert.am/am/news/2010/04/07/revolution/
Էջանիշներ