Կռունկ-ի տեքստն առաջին անգամ ամբողջությամբ այսօր կարդացի 
Կռունկ, ուստի՞ կու գաս, ծառայ եմ ձայնիդ,
Կռունկ, մեր աշխարհէն խապրիկ մի չունի՞ս,
Մի՛ վազեր երամիդ` շուտով կը հասնիս.
Կռունկ, մեր աշխարհէն խապրիկ մի չունի՞ս,
Թողեր եմ ու եկեր իմ մըլքերս ու այգիս.
Քանի ու ա՛խ կ՚անեմ կու քաղուի հոգիս.
Կռունկ, պահ մի կացի՛ր, ձայնիկդ ի հոգիս.
Կռունկ, մեր աշխարհէն խապրիկ մի չունի՞ս:
Քեզ խապեր հարցնողին չես տանիր տալապ.
Ձայնիկդ անուշ կու գայ քան զջըրի տօլապ,
Կռունկ, Պաղտատ իջնուս կամ թե ի Հալապ,
Կռունկ, մեր աշխարհէն խապրիկ մը չունի՞ս։
Սըրտերնիս կամեցավ, ելանք, գընացանք,
Այս սուտ աստընւորիս տէրտէրն իմացանք,
Աղուհացկեր մարդկանց կարօտ մընացանք:
Կռունկ, մեր աշխարհէն խապրիկ մը չունի՞ս։
Աստընւորիս բաներն կամաց կամաց է.
Միթէ Աստուած լըսե, դըռնակըն բացցէ.
Ղարիպին սիրտն է սուգ, աչերն ի լաց է:
Կռունկ, մեր աշխարհէն խապրիկ մի չունի՞ս:
Աստուած, քեզնէ խնդրեմ մուրվէթ ու քէրէմ.
Ղարիպին սիրտն է խոց, ճիկէրն է վէրէմ.
Կերած հացն է լեղի ու ջուրն է հարամ:
Կռունկ, մեր աշխարհէն խապրիկ մի չունի՞ս:
Ոչ ըզլուր օրըն գիտեմ ոչ ըզկիրակին.
Զարկած է զիս շամփուրն, բըռնած կըրակին.
Այրիլըս չեմ հոգար, ձեզնէ կարօտ եմ.
Կռունկ, մեր աշխարհէն խապրիկ մի չունի՞ս:
Պաղտատու կու գաս, կ՚երթաս ի սէհրատ,
Թըղթիկ մի գըրեմ, տամ քեզ ամանաթ.
Աստուած թող վըկայ լինի քո վըրադ.
Տարեալ հասուսցես զայդ իմ սիրելեաց:
Գըրեր եմ մէջ թըղթիս, թէ հոս մընացի.
Օրիկ մի օրեր զաչերըս չըբացի.
Սիրելիք, ձեզանէ կարօտ մընացի.
Կռունկ, մեր աշխարհէն խապրիկ մի չունի՞ս:
Աշունն է մօտեցեր, գնալու ես թէտպիր,
Երամ ես ժողվեր հազարներ ու բիւր,
Ինձ պատասխան չտուիր, ելար, գնացիր,
Կռունկ, մեր աշխարհէն գնա՛, հեռացի՛ր:
Մեջբերել
Էջանիշներ