Ժամանակի դատը
Ես`, ոչ պանծալի զավակն իմ դարի,
Զավակն այս ամոթ, պիղծ ժամանակի,
Սերունդների մոտ եկած ու եկող
Իմ ,,ժամանակին” կանչում եմ դատի…
Թող դատը լինի ազատ, դռնբաց,
Թող որ մասնակցեն, ովքեր ունեն հարց,
Ովքեր տուժել են այդ ,,ժամանակից”
Եվ ունեն վերքեր առայժմ դեռ թաց:
Ում հրապուրել սակայն չի տիրել,
Գայթակղել է` հետո հեռացել,
Ով բռնկվել է նրա հրայրքից
Բայց հետո ցավոք երազխաբ եղել:
Ովքեր կարծում են, թե իրենք զոհն են
Խաբուսիկ փայլող այդ ,,ժամանակի”,
Ովքեր կարծում են, որ պերճանքն այդ չար
Վարվեց իրենց հետ անարդարացի…
Հրավերք ունեն և ատենակալներն,
Ովքեր լավ գիտեն գործի անունը,
Գիտեն, որ պետք է լինեն անկաշառ
Ու չմոռանան արյունի գույնը:
Ու չեմ կասկածում, որ նրանք երբեք,
Թեկուզ ,,հավերժի” ակնկալիքով,
Կասկած կհայտնեն մածունի գույնին
Կամ էլ ծարավը կառնեն ,,սև” թանով:
Հրավիրել եմ ես նաև դատավոր,
Որից որ ոչինչ ասել չեմ կարող,
Սրանց ուղին միշտ էլ դժվար է եղել,
Ժամանակն այստեղ միշտ է անկարող:
Ինչ խոսք կա նաև պետ մեղադրող,
Ես մեղադրող լինել չեմ կարող,
Ավելի լավ է ես լինեմ պաշտպան
Հիմա մեղադրել շատերն են կարող:
Լրիվ պատրաստ է դատական կազմը,
Եվ գրավեցինք մեր տեղն դահլիճում,
Իսկ դատավորին` տեսանք ոտնկայս,
Ի ցույց թե նրան որքան ենք հարգում:
…Փոքրիկ ծանոթացումն մեզ չէր խանգարի,
Եվ պարտքս է իմ ձեզ տեղեկացնել,
Որ թե անցյալում, թե մեր օրերում
Մարդը հրաշքի սահմանն է անցել:
Փոխակերպումը հեքիաթների մեջ
Մեզ իրականում սուտ է թվացել,
Աղքատ ու տկլոր, մերկ մուրացկանը
Երբեք էլ կախարդ կամ չարք չի դարձել:
Բայց մյուս կողմից երևույթը այս
Հասու է մարդուն շատ հնուց ի վեր,
Ու նա կարող է մի ակնթարթում
Բարի ծառայից դառնալ մի չար տեր…
Հետևություններ չեմ ուզում անել,
Ու չեմ էլ դատի, լա?վ է սա, թե?, վատ,
Բայց որ հրաշքը առկա է կյանքում
Պիտի գրանցենք ոնց հաստատված փաստ:
…Եվ մի թռուցիկ բարևից հետո
Մեր դատավորը անցավ իր գործին…
Ու մինչ այդ կլոր գլուխը նրա
Հանկարծ ու դարձավ մի քառակուսի:
Իսկ մինչ այդ ժպտուն աչքերը նրա
Դարձան ապակե, լրիվ անկենդան,
Ու ձայնն էլ նրա, որ երգեցիկ էր
Խոսեց հեգնանքով և արդեն դաժան:
_ Այսօր լսում ենք չլսված մի գործ,
Պիտի պատժենք մենք մեր ,,ժամանակը”,
Բողոք նրանից շատ ու շատ ունենք
Ու պիտի ճշտենք այսօր այդ ցանկը:
Խոսքը պաշտպանին հիմա ես կտամ,
Թող ներկայացնի ամբաստանյալին.
Խնդրեմ, խոսեցեք, սակայն կարճ կապեք,
Շատերն են սպասում այսօրվա վճռին:
_ Թույլ տվեք հիմա, Ձերդ Ազնվություն,
Ես ներկայացնեմ իմ պաշտպանյալին,
Մեծարգո մեղադրող, ատենակալներ,
Ծանոթացնեմ ձեզ ամբաստանյալին:
_ Ամուրի է նա, նախկինում չդատված,
Ու ոչ ոք չունի հիմա խնամքին,
Գրավիչ է շատ ու հրապուրող,
Դժվար է կանգնել դեմ այդ հրայրքին:
Նպատակները ազնիվ են եղել,
Ցանկացել է նա լինել հաջողված,
Բայց բախտի անիվն չարով է ընկել
Ու տեսել է նա իրեն ձախողված…
Ասում են իբր դաժան է եղել,
Եղել է անխիղճ, եղել անողոք,
Հաշվի չի առել ոչ մի հանգամանք
Ոչ աղերս, ոչ լաց ու ոչ էլ բողոք:
Բայց իբրև պաշտպան ես պիտի ասեմ.
Լավ ժամանակներ չեն եղել երբեք,
Իսկ թե վառվել է թացը չորի հետ
,,Ժամանակի” մեղքն այստեղ մի փնտրեք:
Խնդրում եմ ձեզնից, եղեք անաչառ,
Բայց նաև սրտի ձայնին ունկնդրեք,
Օրենքը երբեմն շատ է անզգա,
Ձեր շնչով այնտեղ քիչ հոգի դրեք:
Հաշվի առնելով վերը նշվածը
Հարգանքով վարվեք մեղադրյալին,
Ինչ էլ, որ լինի, ախար նա մերն է
Ու մեր հետ նրա ողջ անցած ուղին…
շարունակելի
Մեջբերել
Էջանիշներ