Եվրատեսիլային օֆֆթոփակույտ

[Kita]

Հաշվի առնելով Եվրատեսիլի հետ կապված մոտակա օրերի կամ նույնիսկ ամսվա հույզերը` բացվում է ժամանակավոր «Եվրատեսիլային բամբասարան»:
Խնդրեմ իրար կերեք, կշտացեք, ուրախացեք:

[Rammer]

ԳՅՈՒՂԱՑԻ ՀԱՄԲՈՅԻ ՏՈՒՆԸ

Եվրատեսիլը Հայաստանում նորից կրքեր է բորբոքել, ու բավական ուժեղ կրքեր: Երեւի ժամանակն է Եվրատեսիլն էլ հռչակել “մասոնական դավադրություն”, որի նպատակը հայության միասնականությունը կոտրելն է: Այս անգամ էլ, ինչպես նախորդ անգամներին, ամեն ինչի պատճառը Եվրատեսիլ երգի մրցույթին Հայաստանի մասնակցի ընտրությունն էր: Ինչպես հայտնի է, փետրվարի 14-ին տեղի ունեցած ընտրությամբ հաղթող հռչակվեց հայ հանդիսատեսին քիչ հայտնի Եվա Ռիվասը` մոր կողմից հայուհի Ռուսաստանից, որը մի քանի ամիս առաջ է եկել Հայաստան, հանդիսատեսին ներկայացել է Սայաթ-Նովայի “Թամամ աշխարհ պտուտ եկա” երգով, հետո հայտ ներկայացրել Եվրատեսիլին մասնակցելու համար եւ “Ծիրանի կորիզ” երգով դարձել հաղթող:

Նրանից բացի, եւ գուցե ավելի, Եվրատեսիլ մրցույթի մասնակցի ընտրական մրցույթի հաղթողի հավակնորդ էին համարվում Էմմի եւ Միհրան զույգը, ինչպես նաեւ Ռազմիկ Ամյանը: Հենց նրանք էլ, հատկապես Էմմի եւ Միհրան զույգը, եւ մասնավորապես զույգի պրոդյուսեր, Էմմիի մայր Նադեժդա Սարգսյանը, դժգոհում են ընտրության արդարությունից, sms քվեարկության մեքենայություններից, կասկածում են, որ հայ հանդիսատեսը կարող էր իր “հարյուր տարվա ծանոթ” երգիչներին ավելի քիչ ձայն տալ, քան նոր ծանոթ մի երգչուհու: Իսկ այդ դժգոհության հիմքերից առանցքայինն էլ համարվում է թերեւս այն, որ Եվա Ռիվասին հովանավորում է Ռուսաստանի հայաստանցի հայտնի գործարար Սամվել Կարապետյանը` Կալուգայի Սամոն, ով մոտ հարաբերություն ունի Հայաստանի երրորդ եւ երկրորդ նախագահների հետ:

Եվրատեսիլի ընտրական փուլի հետ կապված կրքերն ավանդույթ են Հայաստանի “եվրատեսլական” պատմության ընթացքում: Սկսած առաջին մասնակցի ընտրությունից` Անդրեից, մինչեւ մանկական երկու Եվրատեսիլների ընտրությունը (որոնցից մեկում, ի դեպ, հաղթեց հենց Նադեժդա Սարգսյանի հովանավորյալ Լուարա Հայրապետյանը, ու նրա հաղթանակի արդարությանն էլ կասկածողներ գտնվեցին), մինչեւ Եվա Ռիվաս, ու թերեւս Ռիվասից էլ հետո, ընտրության արդարությանը միշտ կասկածելու են, անկախ նրանից, թե իրականում ինչքան է կասկածը հիմնավոր, ինչքան են հիմնավոր կասկածողների փաստարկները: Երբ երկրում տոտալ կեղծիքի մթնոլորտ է, կեղծվում են բոլոր կարգի ու մակարդակի ընտրությունները, կեղծվում են արժեքները, կեղծվում է իրականությունը, Եվրատեսիլի մասնակցի ընտրությունը չի կարող մնալ դրանից անմասն: Համենայն դեպս, հանրային գիտակցությունը չի կարող կեղծիքի համատարած մթնոլորտում ի դեմս Եվրատեսիլի արդարության կղզյակ տեսնել, առավել եւս, որ այդ ոլորտում շոշափվում են մեծ փողեր, շոշափվում են իշխանության հետ մտերիմ մարդկանց անուններ: Իսկ հայաստանյան հասարակության շրջանում իշխանությունն ու կեղծիքը դարձել են հոմանիշներ, ու դա ոչ թե հասարակության սուբյեկտիվ ընկալումների արտահայտումն է, որոնք կարող են առանձին դեպքերում իսկապես լինել, այլ իշխանության երկար տարիների գործունեության օբյեկտիվ հետեւանքը:

Այս դեպքում արդեն ցանկացած խնդրի մասնագիտական կողմ հայտնվում է երկրորդ պլանում, եւ առաջ է գալիս քաղաքական, ու թերեւս ամենից առաջ քաղաքակրթական կողմը: Թերեւս որեւէ մի երկրում, որտեղ որպես պետություն եւ հասարակություն հասել են արժեքային լուրջ ձեռքբերումների, Եվրատեսիլը վաղուց արդեն արժեք չէ, ու այդ պետություններում հասարակությանը նույնիսկ չի էլ հետաքրքրում, թե ով է գնալու Եվրատեսիլ: Պատահական չէ, որ վերջին մի քանի տարիներին Եվրատեսիլում հաղթող են դառնում եւ հաջողությունների են հասնում Արեւելյան Եվրոպայի եւ հետխորհրդային պետությունների ներկայացուցիչները, հատկապես այն պետությունների, որտեղ վերնախավերը իրենց հասարակություններին մատուցելու այլ արժեքներ չեն կարողացել եւ չեն կարողանում ստեղծել, ու մնացել են “ազգային ազատագրական” տեսարանները:

Երբ պետություններում եւ այնտեղ ապրող հասարակությունների մեջ կան ձեւավորված կամ ձեւավորվող արդիական արժեհամակարգեր, նաեւ երգիչ-երգչուհիների համար արդեն Եվրատեսիլը դառնում է բացարձակ ավելորդություն, որովհետեւ դա ոչ այլ ինչ է, քան պարզապես պետության` տվյալ դեպքում Հանրային հեռուստաընկերության հաշվին “ռասկրուտկա” լինելու հնարավորություն: Բայց, մյուս կողմից, քանի որ Հայաստանը “տեսարանների” դարաշրջանում խորը “խցանված” երկիր է, ու այդ երկրում շատ մեծ է Եվրատեսիլի պահանջարկը երգիչ-երգչուհիների մոտ, ապա զարմանալի չի լինի, եթե ասենք պարզվի, որ պահանջարկի այդ մեծության պատճառով մեծանում են նաեւ երգիչ-երգչուհիների առաջարկները Եվրատեսիլի Հայաստանի “փայատեր” հանդիսացող Հանրային հեռուստաընկերությանը: Այդպիսով, տվյալ մասնակցի “ռասկրուտկան” այսպես ասած “ինքնածախսածածկվում” է: Դա ընդամենը մի շատ տեսական ենթադրություն է, որը կարծես թե այդքան էլ անհավանական չէ, նկատի ունենալով այն արժեքներն ու բարքերը, որ տիրում են Հայաստանի գրեթե բոլոր ոլորտներում:

Ընդ որում, պետք չէ բացառել, որ հաղթող մասնակիցը հաղթում է առանց որեւէ զարտուղի ճանապարհի, միանգամայն արդար կերպով, բայց, կրկին նկատի ունենալով Հայաստանում գերակա արժեքներն ու բարքերը, թերեւս շատ հավանական է, կամ անհավանական չէ, որ նույնիսկ արդարության համար Հայաստանում պետք է վճարել, գուցե ավելի շատ վճարել, քան կեղծիքի համար: Ի վերջո, այն հասարակություններում, ուր Եվրատեսիլի բեմն է արժեք կամ խնդիր կամ նպատակ կամ հանրային ուշադրության առարկա, այսինքն ուր տեսարաններն են թագավորում, ամեն բան` արդարություն լինի, թե կեղծիք, ապրանք է, որ իր գինն ունի:

ՀԱԿՈԲ ԲԱԴԱԼՅԱՆ

[Ռուֆուս]

Եթե Նադեժդան էնքան ձիշովկա լինի, որ Եվային դատի տա, աղջկա «կարիերայի» վրա վերջնականապես խաչ կքաշի

[Լուսաբեր]

Մարտավարություն N1

[Միքո]

Եթե Նադեժդան էնքան ձիշովկա լինի, որ Եվային դատի տա, աղջկա «կարիերայի» վրա վերջնականապես խաչ կքաշի

չէ հա, Հայաստանում էնքան երգիչ-երգչուհիներ կան, որ մենակ իրանք իրանց լսեն, եքա հանդիսատես կհավաքեն, մի խոսքով իրանք իրանցով

[BOBO]

Ձեր ձայնյ հաշվարկված չե, քանի որ Դուք սպարել եք տվյալ երգի ոգտին քվեարկուտյան սահմանաչապյ. Հ1-Եվրատեսիլ Հայաստան 2010

Տեսեք Բիլայնից ինչ սմսա եկել, Եվայի օգտին էի քվեարկել հեսա օռանժի քարտը դնեմ տենամ սմս էկելա թե չէ

[ministr]

ՀԱՆՐԱՅԻՆ ՀԵՌՈՒՍՏԱԸՆԿԵՐՈՒԹՅԱՆ ՀԱՂՈՐԴԱԳՐՈՒԹՅՈՒՆԸ

2010 թ. փետրվարի 14-ին կայացավ 'Եվրատեսիլ-2010' հայաստանյան նախընտրական փուլը, որի իրավատերն է 'Հայաստանի Հանրային հեռուստաընկերություն' ՓԲԸ։ Առաջին ալիքը կարող էր ուղղակի ընտրությամբ որեւէ մեկին ուղարկել Օսլո հիմնական մրցույթին, սակայն որոշում էր կայացրել կազմակերպել մրցույթ՝ իր իրավասության բոլոր հնարավոր լծակները հանձնելով ժյուրիին եւ հեռուստադիտողներին։ Առաջին ալիքը դիմել է ՀՀ Մշակույթի նախարարությանը, որպեսզի այդ գերատեսչությունը ձեւավորի ժյուրիի կազմը, որի քվեարկության արդյունքում մասնակիցները զբաղեցրել են հետեւյալ տեղերը.

1-ին տեղ՝ Էմմի եւ Միհրան 'Hey'
2-րդ տեղ՝ Եվա Րիվաս 'Apricot Stone'
3-րդ տեղ՝ Անի Արզումանյան 'The Mermaid Song'
4-րդ տեղ՝ Ռազմիկ Ամյան 'My Love'
5-րդ տեղ՝ Նիկ Էգիբյան 'Countdown'
6-րդ տեղ՝ Մելինե Բեգլարյան 'We Must Believe'
7-րդ տեղ՝ Մարիա Կիզիրյան 'Little Red Riding Hood'
8-րդ տեղ՝ Another Story 'Այս ձմեռ'
9-րդ տեղ՝ Դավիթ Աշոտյան 'Infected Dreams'

SMS քվեարկությունն իրականացրել է 'Ինտերմոբ' ընկերությունը՝ Vivacell, Beeline եւ Orange բջջային օպերատորների մասնակցությամբ։ Արդարության ապահովման նպատակով Grant Thornton Amyot LLC ընկերության կողմից նշանակվել էր աուդիտոր՝ Վլադիսլավ Մուրադյանը։ Ներկա էին եղել նաեւ գործընթացին հետեւելու ցանկություն հայտնած մրցույթի մասնակիցների ներկայացուցիչները. մասնավորապես՝ Եվա Րիվասի, Ռազմիկ Ամյանի, Էմիի եւ Միհրանի պատվիրակները։ SMS քվեարկության արդյունքները հետեւյալն են.

1-ին տեղ՝ Եվա Րիվաս 'Apricot Stone'
2-րդ տեղ՝ Ռազմիկ Ամյան 'My Love'
3-րդ տեղ՝ Էմմի եւ Միհրան 'Hey'
4-րդ տեղ՝ Another Story 'Այս ձմեռ'
5-րդ տեղ՝ Անի Արզումանյան 'The Mermaid Song'
6-րդ տեղ՝ Դավիթ Աշոտյան 'Infected Dreams'
7-րդ տեղ՝ Մարիա Կիզիրյան 'Little Red Riding Hood'
8-րդ տեղ՝ Մելինե Բեգլարյան 'We Must Believe'
9-րդ տեղ՝ Նիկ Էգիբյան 'Countdown'

'Հայաստանի Հանրային հեռուստաընկերություն' ՓԲԸ բողոքներ է ստացել, որ SMS-քվեարկության ժամանակ եղել են տեխնիկական բարդություններ։ Առաջին ալիքն անմիջապես ուսումնասիրություններ է սկսել բջջային երեք օպերատորների հետ միասին։ 'Հայաստանի Հանրային հեռուստաընկերություն' ՓԲԸ պատրաստ է իր ձեռքի տակ գտնվող քվեարկության բոլոր տվյալները տրամադրել շահագրգիռ բոլոր կողմերին։

Տեսնես "ժյուրին" էդ ինչի էր խոսքը մեկ արել Էմմիի համար? Լավ գոնե մի երկուսն էլ թող Ռազին բարձր միավոր տային: Բայց մի հատ փոքր հանգամանքում վրիպել էին ` մարդկանց գործոնը անտեսելով: Հաշվի առնելով էս փաստը, ակամայից հիշում եմ ժողովրդական հին ասացվածքը, որ գողը գողությունիցա խոսում... և այլն և այլն
Հետաքրքիրա ապագա զոքանչի մտածելակերպը, ասում ա էդ ով էր, որ ոչ մեկ, ոչ երկու եկավ ու մեկ էլ հաղթեց: Հարցադրման հիմքը ճիշտա, բայց մոտեցումնա սխալ, առաջին հերթին մոռանումա, որ մարդիկ ընտրում են երգ, ոչ թե բեմի ստրուկ Եթե որևէ անհայտ մեկը, կարողա գա, մի քանի շաբաթում իր երգով հայտնվի top10-ի առաջին հորիզոնականում, որ իրա վերաբերմունքով, պահվածքով ու իր թիմի ճիշտ կազմակերպած PR-ով հաղթի, ուրեմն ով ես եղել դու, քո Էմմի-Բ կազմակերպությունը ու քո աղջիկը, որպես մասնագետներ, որպես պրոդյուսեր, որպես երգչուհի: Կարաս մի հատ մտաբերես աղջիկդ վերջին անգամ երբա հայտնվել top10-ի մեջ? Կարաս մտաբերես երբա միայնակ որևէ խելքը գլխին երգ կատարել? Վերջին քչից շատից հաջողված երգը Սուպեր Սաքոյի հետ էր, էն էլ նույն թեմատիկայով` "արի մոտս որ ես քեզ օ օ օ օ".. նման մի ֆռռիկ էլ Միհրանի հետ էիք ուզում անեիք: Վրաներդ վստահ լինեիք չէիք չամռվի էդ խեղճ տղուն իրա բան ու գործից կտրեիք բերեիք: Էն տղու հեչ մի մրգին էլ չի, ինքը իրանին վաղուցա հասել էս կյանքում, դուք եք որ պատեպատ եք ծեփվում ու չեք գտնում ձեզ: Էսօր մի հատ էլ լսեցի էդ համարը: Խեղճ Միհրանը ինչքան իրան կոտորի իրա խմբոց հանդերձ, որ աղջկադ ագռավի կղկղոցը չլսվեր? Էդ տեսակ ձայն սկի ԱԼՄ-ի ադամանդներից չէի լսել: Էմմի, եթե ուզում ես մի բանի հասնես էս կյանքում, էդ սիգարետդ ռադ արա, քեզ կարգին պրոդյուսեր ընտրի, ՊՐՈՖԵՍԻՈՆԱԼ պրոդյուսեր, մի հատ էդ էգոդ խորը թաքցրա, քիթդ իջացրա ու ԵՐԳԻ, ու նենց երգի, որ մարդկանց համար երգես, ոչ թե մորդ: Այ էն ժամանակ հանդիսատեսը քեզ կսիրի, որովհետև կտեսնի, որ իր համար ես երգում, եթե մի գործ հավեսով ես անում, արդյունքը անպայման կտեսնես` դրական առումով: Իսկ եթե մարդկանց պտի ԱԴԱԼԺԵՆԻ անես, քո երգով, ապա այ սենց չափալախներ կուտես քո սաղ ստեղծագործական կյանքում:

[Նաիրուհի]

Ամոթ է, էլի, գոնե արժանապատվորեն պարտվել իմացեք...

[Ֆոտոն]

Մի անգամ «բախտ է վիճակվել» Էմմիի մայրիկի հետ խոսել, մի քանի տարի առաջ: Ինքն ասաց, թե բոլորն էլ հերթով կգնան (բոլորի հերթն էլ կգա, է՞լի): Շատ հանգիստ էր, որ իր աղջիկը ուղղակի մասնակցում է, հնարավոր է հաղթի: Դա այն տարին էր, որ Էմմին մրցույթին մասնակցեց, բայց կարծես նախապես արդեն հայտնի էր, որ Սիրուշոն պիտի գնա: Ինչ-որ «ներքին ուժեր կան հայ էստրադա-հեռուստատեսային խմբակում», որոնք նախօրոք մասնակցին որոշում են:

Սա իմ ենթադրությունն է, որ այս տարվա նախապայմանավորվածությունը Էմմիի գնալուն էր հակված: Իսկ Ռիվասի հայտնվելը անկանխատեսելի ելևէջներ ավելացրեց: Էմմիից ավելի ուժեղ մասնակցին քվեարկությունն ընտրեց: Ահա և ամբողջ շիլաշփոթը:
Մեկ էլ, որ Էմմին, էլի մասնակիցներ Ռիվասի հետ հանդիպել են սրճարանում, կարծում եմ՝ դա էլ Ռիվասին ճնշելու, մրցույթից դուրս նետելու կամ հոգեպես ընկճելու նպատակ է հետապնդել:

Ընդամենը իմ վարկածն է:

[Ձայնալար]

17 տարեկանում ա տեղափոխվել ու հայերեն չի՞ խոսում

[Տրիբուն]

17 տարեկանում ա տեղափոխվել ու հայերեն չի՞ խոսում

Ապեր, մարդ կա մինչև կյանքի վերջը Հայաստանում ա ապրում, ու տենց էլ ոչ մի լեզվով խոսալ չի սովորում:

[Ձայնալար]

Հա, բայց տենցները չեն գնում Հայաստանից՝ մնում պրիզիձենտ են դառնում կամ առնվազն ԱԺ նախագե:

[Մանուլ]

17 տարեկանում ա տեղափոխվել ու հայերեն չի՞ խոսում

Իսկ մինչև էդ Ռոստովում ա ապրել :

[Kuk]

ԶՈՌՈՎ, ՇԱՌՈՎ - ԵՎՐԱՏԵՍԻԼՈՎ

... ԵՎ-ՆՈՐԻՑ-ՏԵՍԵԼ, ԵՎ-ՆՈՐԻՑ-ՍԻՐԵԼ

Կիրակի «Եվրատեսիլ-2010»-ի հայաստանյան նախընտրական փուլն էր: Եվ ամեն ինչ անցավ այնպես, ինչպես նախատեսել էր Կալուգայի Սամոն` Սամվել Կարապետյանը, բացառությամբ տեխնիկական մի թերության: Խոսքն, իհարկե, այն մասին չէ, որ sms քվեարկության ժամանակ հնարավոր է եղել քվեարկել միայն առաջին 30 վայրկյանի ընթացքում:

Եվ պատկերացնում ե՞ք, այդ ընթացքում Եվա Ռիվասը հասցրել է հավաքել 3000 ձայն (Էմմի-Միհրան զույգի պրոդյուսեր Նադեժդա Սարգսյանի տվյալներով` 6039 ձայն), Էմմի-Միհրան զույգը եւ Ռազմիկ Ամյանը` 1000-ական ձայներ: «Լրագիր» կայքը հայտնում է այն մասին, որ բազմաթիվ ընթերցողներ են զանգել եւ բողոքել, որ տեխնիկական բարդությունների պատճառով չեն կարողացել իրենց ձայնը տալ Եվա Ռիվասին: Բայց փաստն այն է, որ ամեն ինչ անցավ այնպես, ինչպես նախատեսել էր մոսկվացի մեծահարուստ Սամվել Կարապետյանը: Ի դեպ, վերջինս ԲՀԿ նախագահ Գագիկ Ծառուկյանի եւ ԱԺ նախագահ Հովիկ Աբրահամյանի զավակների հարսանիքի քավորն է եւ մտերիմ է նաեւ Ռոբերտ Քոչարյանի հետ: Ու ահա այս խնամիական կապերն էլ առիթ էին, որ Սյուզան Մարգարյանը, հաշվի չառնելով իր եւ Նադեժդա Սարգսյանի հազար տարվա ընկերական հարաբերությունները, մոռանալով Նադեժդա Սարգսյանի արած բազում լավությունները որպես երգչուհի կայանալու հարցում, ակնհայտ զբաղվում էր Եվա Ռիվասի քարոզչությամբ: «Լրագիր» կայքում նշված է, որ առաջին տիկին Ռիտա Սարգսյանը խոստացել էր, որ արդար ընտրություն կլինի: Սակայն Ռիվասի համար այնպիսի գումարներ են շրջանառվել, որ անտեսել ու շրջանցել են ոչ միայն առաջին տիկնոջ խոսքը, այլեւ, փաստորեն, շատ ու շատ բաներ, նաեւ` Մշակույթի նախարարության ընտրությամբ կազմված մասնագետների կարծիքը. ժյուրին ընտրել էր Էմմի-Միհրան զույգի երգը: Բայց ժյուրիի անտեսումը, ինչպես ասում են` օրենքով էր: Այս անգամ հանկարծ որոշեցին, որ երկրիս քաղաքացիների կամքն ու ընտրությունն է հաշվի առնվելու: Ինչպես նաեւ` այս անգամ հանկարծ որոշել էին, որ նախընտրական փուլի մասնակցության հաջորդականությունը որոշելու վիճակահանությունը դհոլ-թմբուկներով է լինելու: Երկար խոսեցին վերջինը ելույթ ունեցողի ճակատագրական, անխուսափելի հաղթանակի մասին, եւ, ո¯վ զարմանք, Եվա Ռիվասը մոտենում է հենց այն դհոլին, որին ամրացված էր 9 թիվը` վերջինը երգելու հնարավորությունը, հաղթելու անխուսափելիության գրավականը:

Իսկ մեզ առավոտյան զանգահարեց քաղաքացի, ով անձամբ ներկա է եղել նախընտրական փուլի համերգին ու պատմեց, թե ինչպես ժամը 21.30-ին դահլիճ են մտել մի խումբ երիտասարդներ եւ զբաղեցնելով դահլիճի մեծ մասը` ամբողջ ընթացքում գոռացել են. «Եվա, Եվա...»: Իսկ քվեարկության պահին դահլիճում աննկարագրելի աժիոտաժ է սկսվել, հեռախոսների փոխանակում, ակնհայտ սադրանքներ եւ այլն: Ընդ որում, վազվզողների մեջ էր նաեւ շոումեն Սամվել Գրիգորյանը, ով «Տաշիր» մրցանակաբաշխության կազմակերպիչների ուշադրության կենտրոնում է եղել` մշտապես լինելով կամ պատվավոր հյուրերի, կամ մասնակիցների, իսկ կոնկրետ այս դեպքում` «պատվավոր տասովչիկի» կարգավիճակում:

Ի դեպ, երգիչ Անդրեն, ով մինչ այդ հանդես է եկել քաղցկեղով հիվանդների եւ նման հուզիչ ակցիաների շրջանակներում, այդ օրը հանդես եկավ «Եվա Ռիվասի» ակցիայի շրջանակներում` երգելով «Եվա Ռիվաս» մակագրությամբ շապիկով: «Դահլիճի ձախ հատվածը Անդրեի ելույթից հետո գոռում էր` «Ամոթ, ամոթ, դու թասիբ չունես, Անդրե», եւ նա հեռացավ հանդիսատեսի սուլոցների ուղեկցությամբ»:

Ի դեպ, մեզ զանգահարած քաղաքացին նկատել էր, որ նոր էին բացել քվեարկության արդյունքն ամփոփող ծրարը եւ դեռ չէին կարդացել հաղթողի անունը` Եվա Ռիվասը անգիտակցաբար մի քայլ առաջ եկավ` պատրաստվելով ընդունել շնորհավորանքները, ծաղիկները, որ բերել էին հատուկ նրա համար: Ահա այս «տեխնիկական թերության» մասին է խոսքը, որ հաշվի չէր առել Սամվել Կարապետյանը. նա պիտի զգուշացներ իր ֆավորիտին չմտածված քայլերով «չվառել» իրենց: Բայց մնացած ամեն ինչը ճիշտ արեց Եվա Ռիվասը` աչքերը լցնելը, հուզվելը եւ այն հայտարարությունը, թե` «Ես չէի սպասում, շնորհակալ եմ հանդիսատեսից»:

Հաղթողի անունը հայտարարելուց անմիջապես հետո Էմմին, Միհրանը, Ռազմիկ Ամյանը, Սոֆի Դեւոյանը եւ դահլիճի մի մասը ցուցադրաբար լքել են դահլիճը` Եվա Ռիվասի` Սայաթ-Նովայի արաբական խաղիկներով մատուցմամբ «Թամամ աշխարհ պտուտ եկա»-ի ներքո:

Եվա Ռիվասը շենքից հեռացել է կարմիր բերետավորների ուղեկցությամբ, իսկ Էմմիի համար մի խումբ խուլիգաններ տհաճ միջադեպ էին պատրաստել. մեքենա նստելիս հրմշտոց, հայհոյանքներ են եղել եւ նման բաներ: Ու ամենացավալին այն է, որ միջադեպի ականատեսները մեզ հետ ունեցած զրույցում վախենում էին պատմել իրենց աչքի տեսածն ու լսածը: Էմմիի մենեջերը մեզ հետ ունեցած զրույցում ասաց, որ մինչեւ կիրակի առավոտյան իրենք sms քվեարկությունը կազմակերպող ուրիշ ընկերության անուն գիտեին` «sigma tv»: Միայն նախընտրական փուլի առավոտյան իմանում են, որ ամեն ինչ փոխվել է, այդ ընկերությունը չէ կազմակերպողը: Իսկ այն հարցին, թե ինչպե±ս եղավ, որ Էմմիի վաղեմի գործընկերները հանկարծ ու այդքան բուռն սկսեցին զբաղվել Մոսկվայից եկած մի նորելուկ աղջկա գովազդով, պատասխանեց. «Եվա Ռիվասի մեջքին կանգնած են օլիգարխներ, իսկ Էմմիի ու Միհրանի մեջքին` ֆանատներ»:

Հիշեցնենք, որ Էմմիի ու Միհրանի երկրպագուները երեկ հավաքվել էին Ալ. Սպենդիարյանի անվան օպերայի եւ բալետի պետական ակադեմիական թատրոնի մոտ ու իրենց բողոքն էին արտահայտում նախօրեին կայացած նախընտրական փուլից: Մինչդեռ Եվա Ռիվասը եւ նրա պրոդյուսերը համերգից հետո կայացած մամուլի ասուլիսում խաղաղության եւ սիրո կոչ են արել... Որ չսիրենք էլ, իրենք, մեկ է, կսիրեն` զոռով լինի թե շառով:

ՄԱՐԻՆԱ ԲԱՂԴԱԳՅՈՒԼՅԱՆ

[ministr]

Էս "Թուք ու մուր" թերթիցա?