Վերջապես քննարկումները հասան ԱԺ: Շատ դանդաղ, բայց այնուամենայնիվ հասան:
Հեռուստատեսային ճիշտ քաղաքականությունը կարող է հերոսներ ծնել, իսկ սխալը՝ ֆաշիստներ ու այլասերվածներ
«Հեռոստատեսությունը համարում եմ ռազմավարական նշանակության ոլորտ և կարծում եմ, որ բոլորս պարտավոր ենք նայել հենց այդ պրիզմայով, որովհետև, ի վերջո, հեռուստատեսության միջոցով կարող ենք դաստիարակել նորմալ քաղաքացի, ֆաշիստներ, այլասերվածներ, քծնողներ, իսկ եթե ցանկանում ենք՝ նորմալ հասարակություն ձևավորել»,- ԱԺ ամբիոնից ասել է «Ժառանգություն» խմբակցության ղեկավար Ռուբեն Հակոբյանը և նշել, որ ինքը դժգոհ է մեր հեռուստատեսային քաղաքականությունից: Պատգամավորը նաև շեշտել է, որ հեռուստատեսության ճիշտ քաղաքականության դեպքում կարող են ծնվել հերոսներ, գիտնականներ, հիանալի քաղաքական գործիչներ, իրական կերպարներ, քանի որ հեռուստատեսությունը մեծ գործիք է, որը պետք է ճիշտ օգտագործել: Ըստ նրա, մեզ մոտ գերիշխողն ու թելադրողը բիզնեսն է, և հեռուստատեսությունն էլ է դարձել ընդամենը բիզնես, որը խժռում է դաստիարակչական եթերը: «Ժառանգություն» խմբակցության ղեկավարը խոսել է նաև կուսակցական եթերից, որ մեր երկրում շատ գումար ունեցողը տնամերձ տարածքում կարող է հեռուստատեսություն հիմնել և սկսել այդ հեռուստատեսությամբ քարոզել իրենց կերպարը կամ արժեքային համակարգը, որովհետև չունենք այնպիսի հեռուստաեթերային քաղաքականություն, որտեղ մարդիկ կարողանան ինքնառեալիզացվեն: Պատգամավորը նաեւ ավելացրել է, որ ինքն էլ եթե հնարավորություն ունենար, թերեւս նույնը կաներ, քանի որ մեր երկրում միայն այդպես կարելի է խոսքը հասանելի դարձնել հանրությանը:
Մելինե Մաթևոսյան
Բռնություն, ագրեսիա, էրոտիկա և այլ դրսևորումներ պարունակող հաղորդումների համար երբեք ոչ ոք չի պատժվել
ԱԺ-ի քառօրյա քննարկումների ժամանակ ԱԺ փոխնախագահ Էդուարդ Շարմազանովն անդրադարձավ հեռուստատեսության ներկայիս եթերի վիճակին և այդ կապակցությամբ ՀՌԱՀ նախագահ Գրիգոր Ամալյանին հարցրեց, թե ի՞նչ գնահատական է տալիս այն եթերին, որտեղ կա ագրեսիա, բռնություն, էրոտիկա, և ՀՌԱՀ-ը՝ որպես վերահսկողական գործառույթ ունեցող հանձնաժողով, քանի՞ անգամ է իրականացրել տույժ, տուգանք կամ պատժամիջոց նմանատիպ հաղորդումների կամ նմանատիպ էթիկայի կանոններին չհամապատասխանող հաղորդում պատրաստելու համար: ՀՌԱՀ-ի նախագահը պատասխանեց, որ բռնություն, ագրեսիա, էրոտիկա և այլ դրսևորումներ պարունակող հաղորդումների համար երբեք տույժեր չեն կիրառվել, քանի որ ժամանակին օրենսդրությամբ չափորոշիչների սահմանման իրավասությունը տրված էր ՀՌԱՀ-ին, սակայն կարճ ժամանակ անց մեկ այլ առաջարկով չափորոշիչների սահմանման իրավասությունը վերապահեց Ազգային ժողովին, այդ դեպքում իրենք ոչինչ անել չէին կարող: Ըստ Ամալյանի՝ այդ մի քանի ամսվա ընթացքում, ըստ էության, էֆեկտիվ են գործել և հույս հայտնեց, որ երբ խորհրդին վերադարձնեն այդ իրավունքը, ապա ամեն ինչ կրկին կսկսի կարգավորվել:
Վերջում ԱԺ փոխնախագահի կողմից առաջարկվեց այդ հարցը կրկին քննարկել և ընդհանուր հայտարարի գալ, քանի որ խնդիրն առկա է և օրեցօր ավելի մտահոգիչ է դառնում:
Մելինե Մաթևոսյան
Մեջբերել
Էջանիշներ