Հելսինկյան ասոցիացիայի նախագահ Միքայել Դանիելյանը կարծում է, որ առանց քրեակատարողական հիմնարկի աշխատակիցների աջակցության հնարավոր չէ փախուստ կազմակերպել: Հիշեցնենք, որ «Նուբարաշեն» քրեակատարողական հիմնարկից փախուստի են դիմել 2 ցմահ բանտարկյալներ' Սողոմոն Քոչարյանն և Մհեր Ենոքյանը:
«Մեր կազմակերպության աշխատակիցներից մեկը 6 տարի է աշխատում է «Նուբարաշեն» ՔԿՀ-ում եւ վստահեցնում է, որ այդքան հեշտ չէ փախչել բանտից, այդ թվում' զբոսանքի ժամանակ կամ ճաղավանդակը տեղահան անելով»,-ասաց Միքայել Դանիելյանը:
Ձեր կարծիքով' «Նուբարաշեն» ՔԿՀ-ում տեղյակ են եղել նրանց փախուստի մասին' «Ա1+»-ի հարցին' Միքայել Դանիելյանը պատասխանեց. «Կարծում ենք' այո»:
Հայաստանում ցմահ ազատազրկման դատապարտվածների հետ Հելսինկյան ասոցիացիայի ներկայացուցիչները վերջին անգամ հանդիպել են 2 տարի առաջ:
«Այսօր մեր կազմակերպությանը թույլ չեն տալիս այցելել ցմահ ազատազրկվածներին: Նրանցից ոմանք մեզ դիմում են եւ մենք կարող ենք միայն նրանց առանձին գործերով զբաղվել: Հայաստանում մահապատիժը վերացնելուց հետո, մահապատժի դատապարտվածները համար առանձին ակտ պետք է կազմվեր, թե ինչպես նրանց հետ վարվեն, ինչ պայմաններում պահել»,- ասաց իրավապաշտպանը:
Դանիելյանը կարծում է, որ Ռոբերտ Քոչարյանը 2006թ. ՀՀ-ում մահվան դատապարտվածների պատիժը' ցմահ ազատազրկմամբ փոխելով' ավելի խիստ պատիժ է սահմանել նրանց համար: «Դա Քոչարյանի անգրագիտությունն էր: Նա իբր թե մի գրչի հարվածով մարդկանց մահապատժից ազատեց: Իրականում այդ մարդկանց նկատմամբ մահապատիժ չէին կիրառելու, քանի որ նրան նկատմամբ մորատորիում էր հայտարարված: Քոչարյանը պետք է իրավաբանորեն մոտենար այդ հարցին, սակայն չարեց»:
Ի դեպ, Միքայել Դանիելյանին հետաքրքրում էր, թե «Ազատամտություն» թերթի գլխավոր խմբագիրը վերջերս ինչպես էր կարողացել հայտնվել ցմահ ազատազրկվածների խցում եւ տեսակցել նրանց: «Իմ կազմակերպությանը թույլ չեն տալիս այցելել: Ինձ հետաքրքրում է, թե ով է որոշում, թե ում է կարելի այցելել ցմահ ազատազրկվածներից, ում' ոչ»: Այդ այցի վերաբերյալ լուսանկարը մի քանի օր առաջ տպագրվել էր «Հայկական Ժամանակ» օրաթերթում, եւ դրա հիման վրա Արդարադատության նախարարությունը ծառայողական քննություն է անցկացնում:
Ավելացնենք, որ ինտերնետային էջերում հայտնվել են լուսանկարներ, որոնք ներկայացնում են, որ վերջերս «Նուբարաշենում» ցմահ դատապարտյալներին հանդիպել է նաեւ մեկ այլ գլխավոր խմբագիր' Վահան Իշխանյանը' լուսանկարչի հետ: Այդ լուսանկարներում նույնպես «Հոկտեմբերի 27»-ի գործով ցմահ դատապարտված Էդիկ Գրիգորյանն ու Դերենիկ Բեջանյանն են, Դրոյի գործով դատապարտված Արսեն Արծրունին, ինչպես նաեւ Մալաթիայի նախկին թաղապետ Վահան Զատիկյանի որդուն' Սեդրակ Զատիկյանին սպանելու համար դատապարտված Արսեն Առուշանյանը:
Էջանիշներ