«Խոզի գրիպի» համաճարակը կարող է դառնալ մեր օրերի մեծագույն կոռուպցիոն մեքենայություն: Համենայն դեպս, նրանում ահռելի կոմերցիոն բաղադրիչն արդեն իսկ նկատելի է: Նման եզրահանգման են եկել դանիական լրագրողները՝ ուսումնասիրելով Առողջապահության համաշխարհային կազմակերպության կապերը ազդեցիկ դեղագործական ընկերությունների հետ, որոնք հարստանում են այդ հիվանդության դեմ դեղամիջոցներ արտադրելով:
Ինչպես գրում է «Նովիե Իզվեստիա» թերթը, պարզվել է, որ շատ գիտնականներ, որ աշխատում են ԱՀԿ-ում, համառորեն թաքցնում են փաստը, թե գումարներ են ստանում համաշխարհային դեղագործության գրանդներից: Ընդ որում, միջազգային ներդրումային JP Morgan բանկի տվյալներով, միայն այս տարի աշխարհի դեղագործական արդյունաբերությունը A/H1N1 վարակի պատվաստանյութերի վաճառքից 7 մլրդ-ից ավելի գումար է աշխատել:
ԱՀԿ-ն «խոզի գրիպը» համաճարակ է հռչակել այդ կազմակերպությունում խորհրդականների խմբի ճնշման տակ, որոնց ղեկավարում է հոլանդացի դոկտոր Ալբերտ Օստենհաուսը, որ ստացել է «Դոկտոր Ֆլյու» մականունը («Տամիֆլյու» դեղամիջոցի անունից), քանի որ նա ակտիվ քարոզում էր ԱՀԿ-ում եւ արեւմտյան լրատվամիջոցներում բնակչության զագնավածային պատվաստման օգտին:
Նիդեռլանդների կառավարությունը արտակարգ հետաքննություն է սկսել այս բժշկի գործունեության կապակցությամբ, քանի որ հայտնի է դարձել, որ նա աշխատավարձ է ստանում «խոզի գրիպի» դեմ պատվաստանյութ արտադրող մի քանի ընկերություններից: ԱՀԿ մյուս խորհրդականները, որոնք եւս պնդում էին «խոզի գրիպը» համաճարակ հռչակել, նաեւ դեղագործական հսկաներ Roche, RW Johnson, SmithKline եւ Beecham Glaxo Wellcome ընկերությունների վճարովի խորհրդականներ են: Այս ընկերություններն էլ ստացել են պատվաստանյութի արտադրության պատվերների առյուծի բաժինը: Այդ փորձագետների ճնշման արդյունք է ԱՀԿ հուլիսի 7-ի բանաձեւը, որն էլ տվեց զանգվածային պատվաստման մեկնարկը:
""Ժողովուրդը փռշտում եւ ջերմում է, իսկ հաբերի արտադրության գործարաններն աշխատում են չորս հերթափոխով՝ չզգալով տնտեսական ճգնաժամը: Հզորությունը չի բավարարում: Վերջին տարիներին առաջին անգամ համաճարակի խուճապը ջրեց ԵՄ պաշտպանական արգելքները",- նշում է աղբյուրը: Առ այսօր, ԱՀԿ-ի տվյալներով, A/H1N1-ին զոհ են գնացել 6 հազար մարդ, մինչդեռ «ավանդական» գրիպից ամեն տարի մոտ կես միլիոն մարդ է մահանում:
Ինչպես կարծում են դանիական Information թերթի հետ զրուցած փորձագետները, աշխարհի հիպերտրոֆիկ արձագանքի պատճառը ոչ այնքան «խոզի գրիպն» է, որքան ԱՀԿ-ի մասնագետների կողմից հաջող PR-ակցիան:
news
Էջանիշներ