Շենգավիթի ընդհանուր իրավասության դատարանի դահլիճում՝ դատավոր Մնացական Մարտիրոսյանի նախագահությամբ ընթացող, «Հայկական ժամանակ» օրաթերթի գլխավոր խմբագիր Նիկոլ Փաշինյանի դատավարությունը հավակնում է ամենաաբսուրդայինը դառնալ մինչ այս եղած բոլոր դատավարություններից:
Դատավորն այսօր լսել է 3 վկայի, որոնցից երկուսի ցուցմունքները հարուցել են դահլիճի քրքիջը:
Առաջինը ցուցմունք է տվել նախկին ոստիկան, ներկայումս մատուցող աշխատող Հարություն Ֆարիշյանը, որը հայտարարել է, թե 2008թ. մարտի 1-ին եղել է Մյասնիկյանի արձանի մոտ: Ըստ ֆարիշյանի Նիկոլ Փաշինյանը հակաօրինական կոչեր չի արել, միայն հորդորել է հավաքվածներին. «Ինչ գտնում եք, պահեք ձեր մոտ, պաշտպանվելու համար»:
Հաջորդ վկան՝ Էմմա Բեգլարյանը հայտարարել է, թե մարտի 1-ին ժամը 13-ին եղել է Մյասնիկյանի արձանի մոտ, որտեղ Նիկոլ Փաշինյանը ելույթ է ունեցել եւ կոչ արել պաշտպանվել: (Հիշեցնենք, որ Փաշինյանն այդ ժամին Մյասնիկյանի արձանի մոտ ընդհանրապես չի եղել): Վկայի ցուցմունքները կատաղեցրին մեղադրող Կորյուն Փիլոյանին, որ հրապարակեց վկայի նախաքննական ցուցմունքները, ըստ որոնց Նիկոլը հրահանգել է «ջարդել ու փշրել»: Վկան խուճապի է մատնվել եւ սկսել բացատրություններ տալ իր հակասական ցուցմունքներին: Ի դեպ, պաշտպանների հարցերին ի պատասխան վկան նշել է, որ մի քանի անգամ մասնակցել է առաջին նախագահ Լեւոն Տեր-Պետրոսյանի տան մոտ կազմակերպված ակցիաներին, երբ մի խումբ կանայք դագաղ էին դրել տան մոտ: Բեգլարյանը խոստովանել է, որ իրեն դրա համար գումար են խոստացել, սակայն խաբել եւ չեն տվել գումարը:
Հաջորդ վկան՝ Լիգա Գոմիկի Մեսրոպյանը (անձնագրային տվյալներն են-NEWS.am), նախ ստեց, թե ծնվել է 1956թ., թեեւ ծնվել էր 1947թ.: Ըստ այս վկայի՝ ինքը ժամը 13-ի սահմաններում Մյասնիկյանի արձանի մոտ տեսել է Նիկոլ Փաշինյանին, որն ասում էր, թե «ջարդեք-փշրեք», իսկ ժողովուրդն էլ ջարդում ու փշրում էր: Այս վկան էլ խուճապի մատնվեց պաշտպանների հարցերից եւ սկսեց րոպեներ առաջ ասածը հերքել: Հարցին, թե անձամբ տեսե՞լ է Նիկոլին, պատասխանեց, թե լսել է ժողովրդից, տեսել է հավաքվածներին ինչ-որ բան ջարդելիս, կրկին պատասխանեց, թե լսել է: Անձամբ միայն Նիկոլ Փաշինյանից լսել է, թե ինչպես էր նա կոչ անում չվախենալ ոստիկաններից:
Ի դեպ, այսօր դատարան ժամանած 4-րդ վկանան անձնագիր ընդհանրապես չուներ, եւ Մնացական Մարտիրոսյանը նրան հրահանգեց գնալ եւ ինչ-որ մի թուղթ գտնել ու նոր ներկայանալ դատարան:
Դատավորն այնուհետ հետաձգեց նիստը մինչեւ նոյեմբերի 17-ը, ժամը 12-ը:
Մեջբերել
Էջանիշներ