Նախկին արտգործնախարար, ՀԱԿ անդամ Ալեքսանդր Արզումանյանը հայ-թուրքական խնդրի շուրջ քննարկումներն անիմաստ է համարում, որովհետեւ որոշումն արդեն կայացված է.
«Հայ-թուրքական քննարկումների իմիտացիան նպատակ ունի պատրանք ստեղծել, թե իբր կա համաժողովրդական քննարկում, իսկ քանի որ արձանագրությունները շատ ավելի սուր ընկալվեցին սփյուռքահայերի կողմից, Սերժ Սարգսյանը որոշեց համահայկական տուռնե իրականացնել' սփյուռքահայությանը համոզելու համար: Այս ամենն արվում է նրա համար, որ ցույց տրվի, թե կա համաժողովրդական քննարկման արդյունքում ձեւավորված տեսակետ, որն ի վերջո աջակցում է իշխանություններին»:
Հիշեցնենք, որ ԱԳ նախարարը հայտարարվել է, որ որեւէ բան անհնար է փոխել այդ փաստաթղթերում, եւ արձանագրությունները ենթակա են ստորագրման. «Արդեն իսկ բոլոր երկրներում բացի Հայաստանից հայտնի է ստորագրման պահը, վայրը, մասնակիցները, բայց հայկական կողմը լռում է դրա մասին: Այնպես որ, լուրջ ընկալել այս քննարկումները իմաստ չունի»:
Արզումանյանի կարծիքով, Սերժ Սարգսյանը հայկական շահերի դեմ ուղղված քայլերի գնում է այն պատճառով, որ «Հայաստանի այսօրվա իշխանությունները չունեն ոչ ներքին, ոչ արտաքին լեգիտիմություն. Սերժ Սարգսյանը իշխանության է եկել բացահայտ կեղծիքների եւ մարտի 1-ի սպանդի միջոցով, եւ իր արտաքին լեգիտիմությունը ինչ-որ կերպ փոխհատուցելու համար գնում է այնպիսի քայլերի, որոնք հնարավորություն կտան ինչ-ինչ շրջանակների հետ շփումներ իրականացնել եւ ապահովել իր պաշտոնավարությունը: Իսկ արտաքին աշխարհը, օգտվելով նրանից, որ Սերժ Սարգսյանի իշխանությունը շատ թույլ է, ճնշումներ բանեցնելով ստիպում է ընդունել այնպիսի որոշումներ, որոնք բխում են ճնշում բանեցնող կառույցի կամ պետության շահերից»:
Ալեքսանդր Արզումանյանը հիշեցրեց, որ հայոց անկախ պետականության ողջ ընթացքում նախորդ որեւէ իշխանություն չի համաձայնվել իրար կապել հայ-թուրքական եւ ԼՂՀ կարգավորման
Ապա մեջբերեց Թուրքիայի եւ Ադրբեջանի բարձրագույն իշխանությունների արած հայտարարությունները, համաձայն որոնց սահմանի բացումը եւ հայ-թուրքական հարաբերությունների բարելավումը հնարավոր է միայն այն դեպքում, եթե շատ արագ ՀՀ -ն գնա խնդրի հանգուցալուծման, «իսկ արագ հանգուցալուծումը չի կարող բխել ոչ Հայաստանի, ոչ Ղարաբաղի շահերից»:
Նա ստեղծված իրավիճակից դուրս գալու միակ ելքը համարում է հրաժարականը. «Միակ հնարավորությունը' կանխելու ոչ հայանպաստ զարգացումները եւ խոսելու թե արձանագրությունների տեքստերում, թե ԼՂՀ խաղաղ կարգավորման բանակցային գործընթացում որեւէ բեկում մտցնելու մասին, մեկն է' Սերժ Սարգսյանի հրաժարականը: Իսկ հետզհետե բարձրացող ալիքը հանգեցնելու է դրան: Թե խոհեմ կգտնվի՞ Սարգսյանը ինքնակամ հրաժարական տալու, թե՞ դա կանի ժողովրդի ճնշման ներքո, ժամանակը ցույց կտա: Կատարյալ լուծումը կլինի, որ այս անընդունելի հանգրվանին հասցրած իշխանությունը, նախագահը հրաժարական տա' թույլ տալով այլ ուժերի' փորձել շտկել իրավիճակը»:
Մեջբերել
Էջանիշներ