Բելառուսներն առաջնորդվելու են վրացական օրենքներով
Բելառուսի արտաքին գործերի նախարարությունն իր երկրի քաղաքացիներին խորհուրդ է տվել հաշվի առնել վրացական օրենքները՝ Հարավային Օսիա և Աբխազիա այցելելիս:
Ինչպես հաղորդում է Эхо Москвы-ին, Բելառուսի ԱԳՆ-ն իր քաղաքացիներին խորհուրդ է տվել Աբխազիա և Հարավային Օսիա այցելել, համապատասխանաբար, Վրաստանի Զուգդիդիի և Գորիի շրջաններից: Բելառուսի արտաքին գերատեսչության հյուպատոսական վարչության ղեկավար Ալեքսանդր Լուկաշևիչը, պատասխանելով լրագրողների հարցերին, հայտարարել է, որ տվյալ երկրներ այցելելիս հարկավոր է առաջնորդվել Վրաստանի օրենքներով:
Համաձայն Վրաստանի օրենքների՝ Հարավային Օսիա և Աբխազիա հնարավոր է մուտք գործել միայն վրացական շրջաններից: Իսկ ցանկացած այլ ուղղությունից առանց Վրաստանի իշխանությունների հատուկ թույլտվության սահմանն անցնելն արգելվում է և պատժելի է երկրի քրեական օրենսգրքով:
Ւնչպես նշում են դիտորդները, Բելառուսի ԱԳՆ-ի նման տրամադրվածությունը խոսում է այն մասին, որ Մինսկը մտադիր չէ մոտ ապագայում ճանաչել Հարավային Օսիայի և Աբխազիայի անկախությունը:
Հիշեցնենք, որ Բելառուսի նախագահ Ալեքսանդր Լուկաշենկոն դեռևս մարտին Դմիտրի Մեդվեդևին խոստացել էր, որ հանրապետությունների ճանաչման հարցը քննարկվելու է Բելառուսի խորհրդարանի կողմից: Մինչև այժմ, սակայն, դա տեղի չի ունեցել:
Մեջբերել
Էջանիշներ