Հայ Ազգային Կոնգրեսի նախընտրական հերթական հանդիպումը կայացավ Մալաթիա-Սեբաստիա համայնքում' Զորավար Անդրանիկի հրապարակում:
ՀԱԿ-ին բնակիչներն ընդունեցին աղուհացով, անգամ ոչխար մորթեցին ընդդիմության առաջնորդների ոտքի տակ: Մինչ հանրահավաքը Տեր-Պետրոսյանը այցելեց այդ համայնքի բնակիչներ, քաղբանտարկյալներ' Սմբատ Այվազյանի եւ Հակոբ Հակոբյանի հարազատներին:
Այս համայնքի բնակիչ էր նաեւ մարտի 1-ի զոհերից Գոռ Քլոյանը:
«Ես այս պահին իմ որդու շիրիմի մոտ պետք է լինեի, սակայն ես իմ մեջ ուժ եմ գտել Ձեր կողքին լինելու համար, քանի որ այս գործը շատ կարեւոր է եւ արդար: Իմ որդին դատարկ ձեռքերով դուրս էր եկել բանակի առաջ եւ խնդրում էր, որ չկրակեն ժողովրդի վրա: Նրա վրա կրակեցին 9-10 մետր հեռավորությունից: Ես եկել եմ այստեղ' Ձեզ բոլորիդ խնդրելու, որ դուք քվեարկեք 10 անմեղ զոհերի արյան համար»,- հավաքվածներին դողացող ձայնով դիմեց Գոռի հայրը' Սարգիս Քլոյանը:
Հանդիպմանը ելույթ ունեցավ բռնցքամարտի Եվրոպայի չեմպիոն Սամսոն Խաչատրյանը.«Ո՞նց կարելի է ազգի վրա կրակել, դա արդարացում չունի աշխարհի ոչ մի տեղում: Ով կեղծիք ունի, նա ազգի դավաճան է: Ես այս երկրում ոչինչ չունեմ' 4 եղբոր գերեզման: Եկեք վերջ տանք կեղծիքներին, թույլ տանք գոնե մի անգամ արդար ընտրություն լինի' հանուն մեր երեխանների»:
Ընդդիմության առաջնորդները խոստացան տեր կանգնել իրենց ձայներին: ՀԺԿ առաջնորդ Ստեփան Դեմիրճյանը ներկաներին վստահեցրեց, որ մայիսի 31-ի հաղթանակը առաջին հերթին կախված է քաղաքացիների մասնակցությունից: Անդրադառնալով ներկաներին հուզող ամենակարեւոր հարցին' քաղբանտարկյալների ազատ արձակմանը Տեր-Պետրոսյանը ասաց. «Նրանց ազատագրումը արդեն շաբաթների հարց է; Եթե ժողովուրդը իրեն ճիշտ պահի, ապա մայիսի 31-ի հաջորդ օրը նրանք ազատված կլինեն' անկախ ընտրությունների ելքից»:
Տեր-Պետրոսյանը նաեւ անդրադարձավ ԵԽԽՎ հաջորդ նստաշրջանին.
«Նախորդ նստաշրջանում խոստացան Քր. Օր փոխելով' քաղբանտարկյալներին ազատ արձակել, չարձակեցին: Ես վստահ եմ, որ հաջորդ նստաշրջանում այս իշխանությունների նկատմամբ խստագույն որոշում է կայացվելու: Այս իշխանությունները գցող իշխանություններ են: Նրանք նույնիսկ իրենց գողական օրենքները չեն հարգում»: Դիմելով իշխանություններին' Տեր-Պետրոսյանն ասաց. «Գոնե մի անգամ տղամարդ եղեք:Էս անգամ մի խանգարեք, միեւնույն է' պատժվելու եք: Այնպես մի արեք, որ արժանաք այս ժողովրդի հավերժական նզովքին»:
Ի դեպ, Տեր-Պետրոսյանի ելույթի ընթացքում իր թիկնապահների ուղեկցությամբ հայտնվեց ԱԺ պատգամավոր Սամվել Ալեքսանյանը: Տեր-Պետրոսյանի ելույթից հետո պատգամավորը իր թիկնապահների հետ հեռացավ: Իսկ ՀԱԿ-ն իր նախընտրական հանդիպումն ավարտեց բազմամարդ երթով:
Մեջբերել
Էջանիշներ