Ես՝տարօրինակ,
Տգեղ,
Տղամարդ,
Ես՝ հեքիաթային այլանդակություն քո փայլի դիմաց,
Քո քայլի դիմաց՝ ես մի ամբողջ վազք,
Դու՝ աստվածություն,
Դու՝ համակ հրաշք,
Միամիտ զարմանք՝ ծնված անպատեհ սիրո խոստումից,
Դու՝ արև, դու կյանք,
Դու՝ պերճ թագուհի ողջ մակդիրների,
Գտնողի կարկաչ, կորցնողի հառա՜չ…
Դու՝ իմ հառաչա՜նք…
Թույլ տուր՝ նետել ինձ քո ոտքերի մոտ
Եվ հուզված շնչիդ մոտիկությունից՝
Քեզանով լցնել իմ էությունը:
Թույլ տուր՝ տեսնել քեզ իմ երազներում
Եվ լոկ այդքանով վարձահատուցված՝
Կյանքս խոստանալ հայացքիդ դիմաց…
Եվ ուրախանալ
Այդքան ձեռնտու գործարքի համար…
Ես քեզ սիրում եմ:
Չգիտեմ, երե՞կ, թե մի դար առաջ,
Նկատեցի քեզ իմ ճանապարհին,
Չգիտեմ, մի օ՞ր, թե մի ամբողջ դար
Դեգերում եմ ես քո ճանապարհին…
Դու այդ չգիտես,
Չես տեսել երբեք ինձ, չես ճանաչում,
Քո աստվածային անհասությունից
Չեմ երևում ես՝
Պիղծ մահկանացուս,
Որ ցանկանում եմ հողոտ շուրթերով
Աջդ համբուրել,
Ես, որ սրբապիղծ անպատկառությամբ
Սիրում եմ սրբիդ…
Ներիր ինձ, սեր իմ…
Ներիր ինձ, տեր իմ…
Ես քեզ սիրում եմ:
Ինձ էլ, այս սերն ել դու ես արարել,
Ուրեմն նաև սովորեցրու՝
Ինչպե՞ս ապրեմ ես քեզանից հեռու,
Ինչպե՞ս ծիծաղեմ, ժպտամ… առանց քեզ:
Սովորեցրու և կամ (մեղա՜ քեզ)
Սիրիր ինձ, տեր իմ…
Ներիր ինձ, սեր իմ:
Մեջբերել
Էջանիշներ