Ինչպես համացանցային այլ համակարգերում, այնպես էլ ակումբում գրանցվելիս ի թիվս այլ տվյալների լրացման կատարվում է այսպես կոչված «անձի ստուգում»: Սրա նպատակն է խոչընդոտել բոտերի (ռոբոտային սփամեր համակարգերի) գրանցումն ակումբում: Մինչ այժմ ստուգումն իրականացվում էր բավական լավ պաշտպանված ReCaptcha համակարգով: Սրա դեպքում երկու աղճատված բառեր էին պատկերվում, որոնք, ենթադրվում էր, որ ունակ է ճանաչել ու հասկանալ թե ինչ է գրված մարդու աչքը, բայց ոչ ռոբոտ համակարգերը: Պատկերված բառերը գրանցվողը արտագրում էր բառերից ներքև բերված դաշտում՝ այդպիսով հավաստելով իր մարդ լինելը:
Վերջին օրերին կտրուկ ավելացել են բոտերի գրանցումները, ոչ միայն ակումբում, այլև բազում այլ համակարգերում, հատկապես ֆորումներում: Ըստ ամենայնի ReCaptcha համակարգի պաշտպանությունը կոտրված է: Կոնկրետ ակումբում վերջին մեկ շաբաթվա ընթացքում օրական տասից ավելի նման գրանցումներ էին կատարվում: Բոտային համակարգերը հիմնականում զբաղվում են SPAM-ով, բայց ոչ միայն: Սրանցից շատերի բուն նպատակը որոշակի տիպի կայքերի (հիմնականում պոռնո բովանդակությամբ) տարածումն է, ինչը իրականացվում է անձնագրային դաշտերում ու ստորագրության մեջ համապատասխան կայքերի հղումների ավտոմատ լրացմամբ: Այդ հղումները տեսանելի են լինում ոչ միայն կայքերի այցելուներին, այլև որոնող համակարգերին:
Սրա դեմն առնելու համար ակումբը, հետևելով vBulletin ստեղծողների խորհրդին, առժամանակ անցել է անձի ստուգման այլ համակարգի: Տրվում է հարց, համապատասխան դաշտում պետք է լրացնել պատասխանը: Հաշվի առնելով հայերենի յուրահատկությունը կարելի է ենթադրել, որ այս համակարգն առնվազն առժամանակ բոտային համակարգերի կողմից չի «կոտրվի»: Բայց սա, թերևս, ժամանակավոր լուծում է և ոչ այնքան հարմար:
Հարցերն ունեն հետևյալ տեսքը.
Հարց. Գրեք 8 թվանշանը տառերով (լրիվ փոքրատառերով):
Պատասխան. ութ
Էջանիշներ