ԵԽԽՎ մոնիտորինգի խումբը Հայաստանի համար անբարենպաստ առաջարկություններ է արել
20:21 • 17.12.08
Մոտ 40 րոպե առաջ ավարտվեց ՀՀ արտգործնախարար Էդվարդ Նալբանդյանի կողմից հրավիրված հատուկ մամուլի ասուլիս, որի ընթացքում նա անդրադարձավ ԵԽԽՎ 1609 և 1620 բանաձևերի կատարման ընթացքին։
Էդվարդ Նալբանդյանը նշել է, որ այսօր ԵԽԽՎ մոնիտորինգի խումբը Փարիզում իր նիստն է անցկացրել, և «որոշ առաջարկություններ են արել», որոնք բարենպաստ չեն եղել Հայաստանի համար։ ՀՀ արտգործնախարարը նշել է, որ «ութ տանսյակից ավելի անդամներից այդ նիստին ներկա են եղել մոտ 15 հոգի, և 10 հոգի կողմ են քվեարկել տվյալ առաջարկություններին»։
«Սակայն ասեմ, որ սա աշխատանքային գործընթաց է։ Բուն հարցը քննարկման է դրվելու ԵԽԽՎ–ի հունվարյան նստաշրջանին։ Դրանից առաջ համազեկուցողները՝ պարոնայք Կոլոմբիեն ու Պրեսկոտը, այցելելու են Հայաստան։ Հունվար ամսին, միգուցե, կլինեն այնպիսի զարգացումներ, որոնք հնարավորություն կտան այդ առաջարկը վերանայել և հաստատել, որ Հայաստանն իսկապես, ինչպես ես արդեն ասել էմ իմ վերջին մամուլի ասուլիսի ժամանակ, իրականցրել է 1609 և 1620 բանաձևերի գրեթե բոլոր առաջարկությունները։
Եվ մեր դիրքորոշումը այն է, որ մենք պետք է շարունակենք այդ բարեփոխումները, որովհետև դա համապատասխանում է մեր ժողովրդի շահերին։ Դա մեր գիտակցված որոշումն է, այլ ոչ թե դա կատարվում է այն պատճառով, որ ինչ–որ մեկը մեզ ստիպում է դա անել։ Մենք հարգում ենք այն կառույցները, որոնց մենք անդամակցում ենք, հարգում ենք այդ կազմակերպությունների հանդեպ վերցրած պարտավորությունները։ Կարծում եմ, որ մեր պարտավորությունները մենք իրականացնում ենք և շարունակելու ենք իրականցնել», – ասել է Էդվարդ Նալբանդյանը ճեպազրույցի ժամանակ։
ՀՀ արտգործնախարարը, սակայն, չի պարզաբանել, թե որոնք են եղել վերոնշյալ անբարենպաստ առաջարկությունները։
Էջանիշներ