Քաղաքական լրահոս

[Chuk]

ՀԱԿ կենտրոնական գրասենյակը տարածել է Հայ ազգային կոնգրեսի՝ իշխանության պատվիրակության հետ բանակցության օրակարգը, որը ներկայացվել է այսօրվա հանդիպմանը: ՀԱԿ-ն այսպիսով համարում է իր առաջարկները ձևակերպված և առաջարկում է այն դարձնել օրակարգի քննարկման առարկա։

«Երկրում ներքաղաքական ճգնաժամի հաղթահարմանն ուղղված՝ Հայ Ազգային Կոնգրես - Իշխանություններ երկխոսության օրակարգում «Հայաստանում լեգիտիմ իշխանության շուտափույթ ձևավորման նպատակով արտահերթ նախագահական և խորհրդարանական ընտրությունների անցկացման և դրանց ազատության, արդարության և օրինականության ապահովման անհրաժեշտ միջոցառումների» քննարկման առաջարկ.

Ստեղծված քաղաքական և սոցիալ-տնտեսական ճգնաժամի նկարագիր

• Բռնություններով և հարյուր հազարավոր ձայներով կեղծված նախագահական ընտրությունները, այդ հիման վրա իշխանության ոչ լեգիտիմության իրողության համընդհանուր ճանաչումը, Մարտի 1-ի սպանդը և երեքուկես տարի անց մեղավորների չբացահատումը հանգեցրել են քաղաքական խորը ճգնաժամի:

• Ընտրական գործընթացի համակարգային արատներից մեկն է դարձել բազմակի քվեարկությամբ ձայների կեղծումը շուրջ 500000 այն մարդկանց անունով, որոնք ընդգրկված լինելով ընտրական ցուցակների մեջ, մշտապես բացակայում են Հայաստանից, ինչը ապահովում է գործող իշխանության հաղթանակը` ոչ մի կապ չունենալով ընտրության իրական արդյունքների հետ:

• Արդյունքում իշխանությունն իր հաղթանակի համար պարտական է մնում ոչ թե ժողովրդի աջակցությանը, այլ իր ապօրինի հաղթանակը ապահովող օլիգարխներին, քրեական տարրերին և իշխանությունը չարաշահող կեղծարար պետական պաշտոնյաներին:

• Որպես հետևանք գործում է ժողովրդի առաջ ոչ հաշվետու և կոռումպացված կառավարություն: Իշխանության բոլոր թևերի և պետական ինստիտուտների նկատմամբ առաջացել է ժողովրդի հավատի կորուստ, խորացել համատարած անվստահությունը։ Առկա է պետական իշխանության լեգիտիմության ճգնաժամ։

• Կառավարման բոլոր բնագավառներում ունենք ձախողում. կառավարությունը հաստատել է ապօրինի հարկային և մաքսային արտոնություններ, սպասարկում է ապօրինի մենաշնորհների տիրացած օլիգարխների շահերը, նպաստում նրանց հարստացմանը, անկարող է կանխել նրանց կամայականությունները, պայքարել մոլեգնող կոռուպցիայի դեմ։ Կառավարության որևէ ծրագրի նկատմամբ բացակայում է ժողովրդի աջակցությունը։ Առկա է կառավարման և տնտեսական ճգնաժամ։

• Հետևանքները. շարունակվում է տնտեսական անկումը, սոցիալական վիճակի վատթարացումը, համատարած դժգոհության աճը, աղետալի չափերի է հասել արտագաղթը։ Չկարգավորված ղարաբաղյան հակամարտության պայմաններում ռազմական բալանսը կայուն փոփոխվում է հօգուտ Ադրբեջանի, սպառնալով մեր ազգային անվտանգությանը:

ԼՈՒԾՈՒՄՆԵՐ

Երկիրն այս վիճակից հանելու և ներքաղաքական ճգնաժամի հաղթահարման միակ միջոցը Հայաստանում լեգիտիմ, ժողովրդի կողմից ընտրված և նրա կողմից վերահսկվող իշխանության ձևավորումն է, որը կվերադարձնի հավատը պետական իշխանության ինստիտուտների նկատմամբ։ Ժողովրդի անվերապահ աջակցությունից օգտվող լեգիտիմ իշխանությունը միայն կկարողանա կազմաքանդել ապօրինի մենաշնորհների և մաքսային/ հարկային ապօրինի արտոնությունների վրա հիմնված արատավոր տնտեսական համակարգը, նպաստել նախաձեռնողականությանը, ստեղծել ազատ և արդար տնտեսական մրցակցության հիման վրա գործող արդյունավետ տնտեսական համակարգ։

Ելնելով վերոնշյալից, որպես քաղաքական և սոցիալ-տնտեսական ճգնաժամի հաղթահարման քայլեր՝ անհրաժեշտ ենք համարում.

1. Հոկտեմբերի կեսերին անցկացնել արտահերթ նախագահական ընտրություններ:

2. Անմիջապես հետո, սահմանված ժամկետների պահպանմամբ, անցկացնել արտահերթ խորհրդարանական ընտրություններ։

3. Նախապես ընդունել ընտրությունների օրինականության ապահովման հետևյալ փաթեթը.

a. Կենտրոնական ընտրական և ստորադաս հանձնաժողովները ձևավորել պետության կողմից, որը ստանձնում է ընտրությունների պատասխանատվությունը` դառնալով ընտրական ողջ գործընթացի օրինականության երաշխավորը:
b. ԱԺ ընտրական համակարգից իսպառ բացառել մեծամասնական ընտրակարգը, և բոլոր 131 տեղերը համալրել համամասնական ընտրակարգով:
c. Առնվազն հնգապատկել Հանրային հեռուստատեսությամբ համապետական ընտրությունների համար նախատեսված անվճար եթերաժամի տևողությունը, հաղորդումները հեռարձակել հիմնականում ժ. 20-24-ին։ Վճարովի եթերի համար վճարը սահմանել ոչ ավելի, քան բիզնես գովազդների համար։
d. Ստորագրված ցուցակները կախել՝ ծանոթանալ ցանկացողների համար մատչելի տեղում, վստահված անձանց և դիտորդներին, ըստ պահանջի, տրամադրել դրանց պատճենները:
e. Ապահովել քաղաքացիական վերահսկողության հնարավորություն զինվորական մասերում կազմվող ընտրողների ցուցակների նկատմամբ: Բազմակի քվեարկումը կանխելու նպատակով զինվորականների ընտրական ցուցակները տրամադրել ԿԸՀ-ին և հնարավորություն ընձեռել այնտեղ գրանցված վստահված անձանց ունենալ այդ ցուցակների ինչպես ամբողջական, այնպես էլ ըստ տեղամասերի տարանջատված թվային տվյալները։
f. Բազմակի քվեարկությունը բացառելու նպատակով քվեարկության մասնակցած անձի ձեռքին թողնել թանաքի կայուն հետք:
g. Բոլոր տեղամասերում և դրանց մուտքի մոտ տեղադրել տեսախցիկներ, որոնք կտեսագրեն քվեարկության, ձայների հաշվարկման և արդյունքների ամփոփման ողջ ընթացքը: Վստահված անձի պահանջով տեսագրության պատճենը պետք է տրամադրվի նրան:
h. Ապահովել ԵԱՀԿ/ԺՀՄԻԳ 2000 դիտորդների հրավեր՝ յուրաքանչյուր տեղամասում մեկ արտասահմանյան դիտորդ։
i. Քարոզչության և իրական բազմակարծության ապահովման նպատակով հեռուստատեսության և ռադիոյի բնագավառում ստեղծել հեռարձակման արտոնագրերի շնորհման այնպիսի համակարգ, որը քաղաքական դաշտի ողջ ներկապնակին, այդ թվում նաև Հայ ազգային կոնգրեսին թույլ կտա ստանալ հեռարձակման արտոնագիր և օգտվել հավասար հնարավորություններից։

Երկխոսության արդյունավետության բարձրացման ուղղված միջոցառումներ

Հիշեցնում ենք Հայ Ազգային կոնգրեսի՝ 19.07.2011 թվականի իր հայտարարության մեջ արձանագրված պահանջները՝ որպես երկխոսության կողմերի հավասարության ու հասարակության լիակատար տեղեկատվություն ստանալու իրավունքի ապահովման անհրաժեշտ պայման.

1. Հանդիպումները կամ պետք է հեռարձակվեն ուղիղ եթերով, կամ էլ կողմերի քարոզչական հավասար հնարավորությունները ապահովելու նպատակով Կոնգրեսի պատվիրակությանը յուրաքանչյուր հանդիպումից հետո պետք է Հանրային հեռուստաընկերությամբ առնվազն կես ժամ ուղիղ եթեր տրամադրվի՝ իր տեսակետները հասարակությանը ներկայացնելու համար։

2. Պետք է վերացնել Հանրային հեռուստաընկերությամբ և մյուս հեռուստաալիքներով Հայ Ազգային Կոնգրեսի հանրահավաքների մասին իրազեկող նյութերի հեռարձակման արգելքը։

3. Պետք է դադարեցնել Կոնգրեսի հանրահավաքներից առաջ իրավապահ մարմինների կողմից բնակչության ահաբեկումը, տարաբնույթ խոչընդոտների հարուցումը, մասնավորապես հանրային և այլ տրանսպորտային միջոցների աշխատանքի կազմալուծումը։

Սրանով համարում ենք մեր առաջարկները ձևակերպված և առաջարկում ենք այն դարձնել օրակարգի քննարկման առարկա։



Շարունակելի

[Chuk]

ՀԱՎԵԼՎԱԾ 1.

ՀԱՅ ԱԶԳԱՅԻՆ ԿՈՆԳՐԵՍԻ ԿՈՂՄԻՑ 01.03.2011Թ. ԿԱԶՄԱԿԵՐՊՎԱԾ ՀԱՆՐԱՀԱՎԱՔԻ ՊԱՀԱՆՋՆԵՐԸ

1. Մինչև ս.թ. մարտի 15-ը, այսինքն՝ մինչև Հայաստանի հարցով ևրոխորհրդի համազեկուցողների երևանյան այցը, ազատ արձակել իրենց քաղաքական հայացքների ու գործունեության համար դատապարտված անխտիր բոլոր բանտարկյալներին՝ Սասուն Միքայելյանին, Նիկոլ Փաշինյանին, Հարություն Ուռուտյանին, Արամ Բարեղամյանին, Սարգիս Հացպանյանին, Մուրադ Բոջոլյանին, Արա Հովհաննիսյանին, Շմավոն Գալստյանին և Ռոման Մնացականյանին.

2. Ստեղծել մարտի 1-ի իրադարձությունների ուսումնասիրման անկախ միջազգային հանձնաժողով կամ վերականգնել Փաստահավաք խումբը՝ նրա կազմը համալրելով միջազգային փորձագետներով և խնդիր դնելով կարճ ժամանակի ընթացքում լիովին բացահայտել ու դատական կարգով պատժի ենթարկել իշխանությունների կողմից կատարված այդ հրեշավոր ոճրագործության բոլոր մեղավորներին.

3. Լիարժեքորեն փոխհատուցել մարտի 1-ի ոճրագործությունից տուժած բոլոր քաղաքացիների նյութական վնասները՝ մասնավորապես սպանվածներից յուրաքանչյուրի ընտանիքին հատկացնելով 1 միլիոն դոլար, իսկ վիրավորներին՝ առնվազն 100,000 դոլար.

4. Դադարեցնել քաղաքացիներին հանրահավաքներից ու ընդհանրապես քաղաքական ակտիվությունից հեռու պահելու նպատակով կիրառվող ոստիկանական զգուշացումներն ու ահաբեկումները, իրազեկող խմբերի դեմ գործվող մշտական սադրանքներն ու բռնությունները, հանրահավաքների օրերին երկրի գլխավոր ճանապարհների շրջափակումները, և վերացնել Ազատության հրապարակում հանրահավաքների անցկացման վրա դրված անօրինական արգելքը.

5. Ի կատարումն Եվրադատարանի կողմից կայացված անբեկանելի վճռի՝ վերջապես վերականգնել «Ա1+» հեռուստաընկերության գործունեությունը, խիստ պատասխանատվության ենթարկել այդ վճիռը ոտնահարող բոլոր պաշտոնատար անձանց, և ընդհանրապես վերացնել պետության լիակատար վերահսկողությունը տեղեկատվության էլեկտրոնային միջոցների վրա.

6. Դադարեցնել իշխանությունների որդեգրած ռազմաշունչ ու հոխորտալից հռետորաբանությունը, և Ղարաբաղյան կարգավորման գործընթացը բնականոն հուն տեղափոխելու նպատակով անհապաղ վերականգնել բանակցությունների նախկին ձևաչափը, որում, ԵԱՀԿ Բուդապեշտյան գագաթնաժողովի որոշմամբ, Լեռնային Ղարաբաղի Հանրապետությունը հանդես էր գալիս որպես հակամարտության լիիրավ կողմ.

7. Չեղյալ հայտարարել բացօթյա փողոցային առևտրի արգելման, երեկոյան ժամը 8-ից հետո փոքր խանութների աշխատանքի դադարեցման և ավտոմեքենաների պարտադիր ապահովագրման վերաբերյալ ընդունված չարաբաստիկ որոշումները, ինչպես նաև վերականգնել ներմուծվող ապրանքների փոխադրավարձ-մաքսավճարների նախկին չափը.

8. Վերացնել անձնական օգտագործման (այլ ոչ թե վաճառքի) նպատակով ներմուծվող ավտոմեքենաների համար Ավելացված արժեքի հարկի անօրինական գանձումը, ինչը, գումարվելով մաքսավճարին ու բնապահպանական հարկին, սպառողի համար դառնում է անտանելի բեռ և հազարավոր մարդկանց ստիպում մեքենաները մաքսազերծել հարևան Վրաստանում.

9. Հայաստանի Հանրապետության նվազագույն աշխատավարձը դարձնել 200 դոլար, գործազրկության նպաստը՝ դրա 50 տոկոսը (100 դոլար), իսկ միջին կենսաթոշակը՝ միջին աշխատավարձի 40 տոկոսը (112 դոլար). խոշոր ձեռնարկատերերի սիստեմատիկաբար չվճարվող հարկերը և բարձրագույն պետական պաշտոնյաների գրպաններում յուրաքանչյուր ամիս հայտնվող հսկայական գումարները լիուլի բավարար են այդ խնդիրները լուծելու համար.

10. Ազգային Ժողովի օրակարգից հանել ՀՀ Աշխատանքային օրենսգրքի 142-րդ հոդվածի վերաձևակերպման առաջարկով քննարկման դրված օրինագիծը, որի համաձայն 6-օրյա աշխատանքային շաբաթ սահմանելու հարցը վերապահվում է գործատուի հայեցողությանը, ինչպես նաև համապատասխան փոփոխություն կատարել այդ օրենսգրքում, գործատուին պարտավորեցնելով մարդկանց աշխատանքից ազատելու պարագայում վճարել փոխհատուցում 3-ամսյա աշխատավարձի չափով.

11. Սահմանել կարևորագույն գյուղմթերքների արտադրության պետական սուբսիդիաներ՝ նկատի ունենալով տվյալ տարում ձևավորված մթերման շուկայական գինը, մշակման պայմանների գոտիականությունը և սահմանամերձ շրջանների հողերի ռազմավարական նշանակությունը. Կենտրոնական բանկի կողմից հաստատել փոխօգնության կարգով գյուղացիներին տրվող վարկերի մեղմացված տնտեսական նորմատիվներ՝ դրանց հիման վրա երկարաձգելով, վերակնքելով կամ դուրս գրելով առևտրային բանկերի հանդեպ գոյացած ժամկետանց վարկային պարտավորությունները, իսկ նոր վարկեր տրամադրել ցածրացրած տոկոսադրույքով.

12. Հայտարարագրել և մամուլում հրապարակել Հայաստանի անկախության շրջանի բոլոր նախկին թե ներկա բարձրագույն պետական պաշտոնյաների ու նրանց ընտանիքների անդամների ունեցվածքն ու եկամուտները՝ սկսած նախագահներից, վարչապետներից, նախարարներից, փոխնախարարներից, մարզպետներից, քաղաքապետերից, ավարտած՝ դատավորներով, դատախազներով, գեներալներով և Ազգային Ժողովի (նախկինում՝ Գերագույն Խորհրդի) պատգամավորներով.

13. Տնտեսության կառավարման և օրինականության ապահովման բնագավառներում ցուցաբերած խայտառակ թերացումների, կամայականությունների կամ պարզապես մասնագիտական ապաշնորհության համար անմիջապես զբաղեցրած պաշտոններից հեռացնել՝ Հայաստանի Հանրապետության վարչապետ Տիգրան Սարգսյանին, փոխվարչապետ Արմեն Գևորգյանին, Կենտրոնական բանկի նախագահ Արթուր Ջավադյանին, Պետեկամուտների կոմիտեի նախագահ Գագիկ Խաչատրյանին, Երևանի քաղաքապետ Կարեն Կարապետյանին, ՀՀ գլխավոր դատախազ Աղվան Հովսեփյանին, Ազգային անվտանգության ծառայության տնօրեն Գորիկ Հակոբյանին, ՀՀ Ոստիկանության պետ Ալիկ Սարգսյանին, ՀՀ Հատուկ քննչական ծառայության պետ Անդրանիկ Միրզոյանին, Արդարադատության նախարարության քրեակատարողական վարչության պետ Հայկ Հարությունյանին.

14. Հանրահավաքը նաև անհրաժեշտ է համարում կոչ անել միջազգային կազմակերպություններին, Ամերիկայի Միացյալ Նահանգների և ևրոմիության երկրների կառավարություններին՝ դադարեցնելու աշխարհաքաղաքական նկատառումներով Հայաստանի բռնապետական վարչախմբին ցուցաբերվող անվերապահ աջակցությունը, որը ոչ միայն ոչնչով չի նպաստում ժողովրդավարական բարեփոխումների իրականացմանը, այլև ավելի ևս ամրապնդելով ռեժիմի դիրքերը, վերջին հաշվով ուղղվում է ժողովրդի դեմ, ինչը միանգամայն ակնհայտ է դառնում արաբական երկրներում ներկայումս ընթացող իրադարձությունների լույսի ներքո, և ինչը խոստովանում են անգամ արևմտյան քաղաքական գործիչներն ու անկախ վերլուծաբանները.

15. Նշված պահանջների կամ նրանց զգալի մասի կատարման պարագայում հանրահավաքը լիազորում է Հայ ազգային կոնգրեսին՝ գործնական երկխոսություն սկսել իշխանությունների հետ, օրակարգում ունենալով առաջիկա ամիսներին արտահերթ նախագահական և խորհրդարանական ընտրություններ անցկացնելու միակ հարցը»։

ՀԱՎԵԼՎԱԾ 2

Համաձայն Հայ ազգային Կոնգրեսի՝ 31.05.2011թ հանրահավաքում հնչած, նախկին քաղբանտարկյալ Սարգիս Հացպանյանին Հայաստանում կացության կարգավիճակ կամ քաղաքացիություն շնորհելու պահանջի, առաջարկում ենք առաջնահերթ քննարկել և լուծել այս հարցը։


Աղբյուր՝ tert.am

[Mephistopheles]

Օրակարգ մտավ արտահերթ ընտրությունների հարցը

14:17 | Այսօր | ՔԱՂԱՔԱԿԱՆՈՒԹՅՈՒՆ







Քիչ առաջ ավարտվեց Հայ ազգային կոնգրես- Կոալիցիա պատվիրակությունների երկրորդ հանդիպումը:

Հաջորդ հանդիպումը կկայանա օգոստոսի 4-ին, ժամը 12-ին: Օրակարգ է մտել Նախագահի եւ ԱԺ արտահերթ ընտրությունների հարցը

Ա1+

[Chuk]

Կոնգրես-կոալիցիա հանդիպումն ավարտվեց. օրակարգը ձևավորված է
14:31 • 26.07.11


«Կարող եմ շնորհավորել Ձեզ և ասել, որ այսօրվա հանդիպմանը օրակարգը ձևավորվեց»,- Հայ ազգային կոնգրեսի և կոլիցիայի պատվիրակությունների հանդիպման ավարտից հետո լրագրողների հետ զրույցում հայտարարեց Կոնգրեսի պատվիրակության ղեկավար Լևոն Զուրաբյանը։ Նա նշեց, որ եթե իշխանության հետ առաջին հանդիպման ժամանակ ճշտվեցին պատվիրակությունների լիազորություններն ու երկխոսության ձևաչափը, ապա այս հանդիպմանը կողմերը կարողացան ձևավորել երկխոսության օրակարգը։

Զուրաբյանի խոսքով՝ Կոնգրեսն առաջարկել է Հայաստանում լեգիտիմ իշխանության շուտափույթ ձևավորման համար անցկացնել արտահերթ նախագահական և խորհրդարանական ընտրություններ: Ըստ նրա՝ կոալիցիայի պատվիրակությունը որպես օրակարգային հարց առաջարկել է քննարկել պատշաճ ընտրությունների կազմակերպման հարցը:

Զուրաբյանը տղեկացրեց, որ հաջորդ հանդիպումը կկայանա օգոստոսի 4-ին, ժամը 12-ին: Կքննարկվի օրակարգի բովանդակությունը: Ըստ նրա՝ իշխանության պատվիրակությունը մերժել է ուղիղ հեռարձակման կամ յուրաքանչյուր հանդիպումից հետո կես ժամ հանրային եթեր տրամադրելու Կոնգրեսի պահանջը:

Աղբյուր՝ tert.am

Պարզապես ֆիքսում ենք, որ ԱՌՆՎԱԶՆ հռետորաբանության մակարդակով ՀԱԿ-ն ասում է, որ ժողովորդից ոչինչ թաքցնելու չունի այս երկխոսության ընթացքում, իսկ իշխանությունը ՓԱՍՏԱՑԻ ապացուցում է, որ ունի թաքցնելու:

[Chuk]

Հայ Ազգային կոնգրեսի եւ կոալիցիայի այսօրվա հանդիպումից հետո ՀԱԿ համակարգող Լեւոն Զուրաբյանը հայտարարել է, որ մինչեւ սեպտեմբեր արտահերթ ընտրության հարցում կողմնորոշման համար վերջնաժամկետը պահպանվում է:

Զուրաբյանը հայտարարել է, որ ժամկետը չպահպանվելու դեպքում Կոնգրեսը կգնա արդեն առճակատման ճանապարհով:

Իր հերթին, կոալիցիայի պատվիրակության ղեկավար Դավիթ Հարությունյանը նշել է, թե Կոնգրեսին պետք է հարցնել, թե ինչ է նշանակում առճակատում: 'Չեմ կարծում, որ դա իրական մտադրություն է, որովհետեւ իմ կարծիքը հակառակ կողմի մասին բարձր է եւ եթե նման բան հայտարարվել է, ապա կարծում եմ հայտարարվել է մարտավարական նկատառումներով', ասում է Դավիթ Հարությունյանը:

Նա նշել է, որ ստեղծվել է քաղաքակիթր երկխոսությամբ առաջ գնալու հնարավորություն եւ սխալ կլինի դա բաց թողնել: Նա կրկնել է, որ չեն տեսնում արտահերթ ընտրության հիմքեր, բայց եթե նստում են երկխոսության, ապա սխալ կլինի, եթե մերժեն առաջադրվող հարցերի քննարկումը:

Դավիթ Հարությունյանը նշել է, թե բանակցության ընթացքում կարող է իհարկե չլինել համաձայնություն, եւ մի կողմը գնա սրացման, բայց դա չի նշանակում,որ դրա համար մյուս կողմը պետք է ընդունի բոլոր պայմանները: Նրա խոսքով, երկխոսության ճանապարհի դեպքում հաղթող է դուրս գալիս ամբողջ հանրությունը

Աղբյուր՝ Լրագիր

[Mephistopheles]

[Chuk]

ՀԱԿ-ի ակտիվիստների վրա հարձակվել են ոստիկանական համազգեստով մարդիկ


Երեկ ուշ երեկոյան Հայ Ազգային Կոնգրեսի օգոստոսի 2-ին կայանալիք հանրահավաքի իրազեկման ընթացքում ՀԱԿ-ի վեց ակտիվիստների վրա են հարձակվել 6-7 անհայտ անձինք, որոնց մի մասը եղել է քաղաքացիական հագուստով, մյուս մասը` ոստիկանական համազգեստով: Նրանք առանց ներկայանալու և որևէ պահանջ ներկայացնելու սկսել են հարվածել երիտասարդներին: Epress.am-ի հետ զրույցում այս մասին պատմել է Կոնգրեսի ակտիվիստ Արեգ Գևորգյանը, ով եղել է հարձակման ենթարկվածների թվում:
«Կինո «Նաիրիի» դիմաց թռուցիկներ փակցնելու ընթացքում մեզ մոտեցան և սկսեցին հայհոյել ու հարվածել: Մեզնից մի քանիսի վրա կան բռնության հետքեր:
Պատրաստվում ենք դիմել համապատասխան մարմիններին, որպեսզի համազգեստավոր հանցագործները պատժի ենթարկվեն: Այժմ պատրաստում ենք հաղորդագրություն հանցագործության մասին, որպեսզի ուղարկենք ՀՀ դատախազություն», – ասել է Գևորգյանը:



Նշենք, որ Կոնգրեսի երիտասարդները օգոստոսի 2-ին կայանալիք հանրահավաքի իրազեկումը Երևանում սկսել են հուլիսի 26-ից: Երեկ իրազեկմանը մասնակցել է նաև «Հայկական ժամանակ» օրաթերթի գլխավոր խմբագիր, ՀԱԿ ներկայացուցիչ Նիկոլ Փաշինյանը:
ՀԱԿ ներկայացուցիչները այցելել են Երևանի տարբեր համայնքների բակեր, որտեղ Փաշինյանը զրուցել է քաղաքացիների հետ, իսկ երիտասարդները բարձրախոսով իրազեկել են հանրահավաքի մասին:

Աղբյուր՝ epress.am

[Chuk]

Դ.Հարությունյան. «Հաջորդ հանդիպումը սկսելու ենք Հայ ազգային կոնգրեսի ներկայացրած հարցից»

Այսօր կառավարության ընդունելությունների տանն ավարտվեց Հայ ազգային կոնգրես-իշխանություն երրորդ հանդիպումը:

Հանդիպման ավարտին կոալիցիայի պատվիրակության ղեկավար Դավիթ Հարությունյանը լրագրողներին հայտնեց, որ այսօր հանդիպմանը քննարկել են հետագա հանդիպումների պարբերականությունը և, հիմնականում, աշխատակարգային հարցեր. «Թեև փորձեցինք այնպես անել, որ ունենանք ճկունություն, այնուամենայնիվ պրոցեսը կարևորելով համարեցինք, որ որոշակի ռեժիմ պետք է սահմանենք: Մեր նախնական ծրագիրը հետևյալն է, որ այսուհետ ունենալու ենք շաբաթական երկու հանդիպում՝ սկսած մյուս շաբաթվանից՝ երեքշաբթի և ուրբաթ օրերը ժամը 12-ին՝ չնայած հնարավորություն ենք ընձեռել ունենալու որոշակի ճկունություն, այսինքն՝ անհրաժեշտության դեպքում հետաձգելու հանդիպումները կամ նշանակել մեկ այլ հանդիպում»:

Այնուհետև Դավիթ Հարությունյանը տեղեկացրեց, որ քննարկել են, թե ինչպես են սկսելու հաջորդ հանդիպումը. «Այն սկսելու ենք օրակարգային առաջին հարցի քննարկումից և Կոնգրեսի ներկայացուցիչները կներկայացնեն իրենց թե՛ հիմնավորումները, թե՛ փաստարկները, թե՛ լուծումները»:

Դավիթ Հարությունյանը հայտնեց, որ քննարկել են ևս երկու հարց. «Մեկը վերաբերում է ոստիկանության հետ միջադեպին, և այդ առումով մենք դեռևս վերջնական պատասխան չունենք, սակայն ընթանում է ծառայողական քննություն, ինչպես նաև քննարկեցինք տրանսպորտի հետ կապված հարցերը: Ինչպես նշել էինք նախկինում՝ մենք պատրաստ ենք հետամուտ լինել այդ հարցի ուսումնասիրմանը և հասկանալու, թե ինչն է խնդիրը։ Մեզ այսօր տրամադրվեցին նյութեր, մենք դրանք կդարձնենք ուսումնասիրության առարկա»:

Լրագրողների հարցին, թե ինչո՞վ է պայմանավորված արագացված հանդիպումների ընթացակարգը և հնարավո՞ր է, որ վերջին հանրահավաքում ՀՀ առաջին նախագահ Լևոն Տեր-Պետրոսյանի ներկայացրած վերջնաժամկետն է պատճառ հանդիսացել, Դ.Հարությունյանը պատասխանեց. «Ճիշտն ասած երկխոսությունն այն հարթակն է, որը որևէ զգուշացումներով, վերջնագրերով կամ պայմաններով չի կարող առաջնորդվել: Երկխոսությունը փոխադարձ ցանկություն է՝ պրոցեսը ինտենսիվ տանելու առաջ, որովհետև բոլորս մի նպատակ ենք հետապնդում՝ անել ամեն ինչ, որպեսզի երկրում իրավիճակը բարելավվի, երկիրը դրանից շահի, և թերևս այդ գիտակցումն է, որ երկուսիս էլ դրդում է գնալու ավելի ինտենսիվ քննարկումների: Իսկ վերջնաժամկետներ և այլն, եթե մի կողմը ունի նման վերջնաժամկետ իր համար, մենք որևէ վերջնաժամկետ չունենք, բայց մենք հակված ենք ինտենսիվ աշխատելու»:

«Բովանդակային անդրադարձ Կոնգրեսի և Կոալիցիայի օրակարգայնին հարցերի առնչությամբ չի եղել»,- ասաց Դ.Հարությունյանը՝ հավելելով, որ որպես առաջին հարց քննարկվելու է Կոնգրեսի պահանջը՝ արտահերթ ընտրությունների անցկացումը:

Աղբյուր՝ 1in.am

[Chuk]

Խորանում են ՀԱԿ-ի կասկածները, որ կոալիցիան զբաղված է երկխոսության իմիտացիայով

Խորանում են ընդդիմության կասկածները, որ կոալիցիան իրականում զբաղված է երկխոսության իմիտացիոյով։ Այս մասին այսօր լրագրողների հետ ճեպազրույցում հայտարարեց կոալիցիոն աշխատանքային խմբի հետ բանակցող Հայ ազգային կոնգրեսի պատվիրակության ղեկավար Լևոն Զուրաբյանը։

«Հայ ազգային կոնգրեսը հուլիսի 19-ին ներկայացրել էր պահանջներ, որոնց իրականացումը կստեղծեր բարենպաստ պայմաններ և մթնոլորտ երկխոսության համար։ Եթե ուղիղ եթերով երկխոսության հեռարձակման կամ ամեն ռաունդից հետո Կոնգրեսին կես ժամ ուղիղ եթեր տրամադրելու պահանջների կատարումը կլիներ ուղղակի բարի կամքի դրսևորում, ապա հանրային հեռուստատեսությամբ և մյուս հեռուստաալիքներով Կոնգրեսի հանրահավաքների մասին նյութերի հեռարձակման մասին արգելքի վերացումը, ինչպես նաև հանրահավաքներից առաջ իրավապահ մարմինների կողմից բնակչության ահաբեկումը, տարաբնույթ խոչնդոտների հարուցումը, հանրային և մյուս տրանսպորտային միջոցների աշխատանքի կազմալուծման դադարեցումը Սահմանադրության և օրենքից բխող պահանջ է, որը պետք է կատարվեր ցանկացած օրինապաշտ իշխանության կողմից»,- ՀԱԿ-կոալիցիա երրորդ հանդիպումից հետո ասաց Զուրաբյանը։

Ըստ նրա՝ նույնիսկ ընթացքող երկխոսության պայմաններում, իշխող կոալիցիան ոչ միայն պատշաճ չի պահպանել այս պայմանները, այլև շարունակում է հանրահավաքներից առաջ տրանսպորտային միջոցների բնականոն ընթացքը դադարեցնել, տեղեկատվության ստանալու իրավունքին խոչընդոտել և այլն։

«Իշխանության նման կեցվածքը խորացնում է կասկածները, որ կոալիցիան իրականում զբաղված է երկխոսության իմիտացիոյով և ընդունակ չէ հանուն երկրի ժողովրդավարացման և քաղաքական առճակատման լիցքաթափման իրականացնել ընդդիմության այն առաջարկները, որոնք ուղղակիորեն բխում են սահմանադրության և օրենքների պահանջներից»,- նշեց Զուրաբյանը։

Զուրաբյանը հայտարարեց, որ ՀԱԿ պատվիրակությունը պահանջում է անմիջապես ձեռնարկել քայլեր, որոնց հետևանքով կպատժվեն վերոհիշյալ ապօրինությունների համար մեղավորները, կվերականգնվի վստահությունը երկխոսության գործընթացի հանդեպ և կդրվեն հիմքեր դրա արդյունավետության համար։

Նա հաղորդեց, որ կոալիցիան խոստացել է ուսումնասիրել բարձրացված հարցերն ու ներկայացնել նախատեսվող գործողությունները։ «Մենք այս հարցին հետամուտ ենք լինելու»,- նշեց նա։

Աղբյուր՝ tert.am

[Chuk]

Երկխոսության չորրորդ փուլն ավարտվեց

Քիչ առաջ ավարտվեց ՀԱԿ-իշխանություն երկխոսության չորրորդ ռաունդը: Առաջինը լրագրողներին երկխոսության ընթացքը ներկայացրեց ՀԱԿ համակարգող Լևոն Զուրաբյանը:

Նա տեղեկացրեց, որ այսօր օրակարգի հիմնական հարցը եղել է Հայաստանում լեգիտիմ իշխանության ձևավորման նպատակով արտահերթ նախագահական և խորհրդանական ընտրությունների անցկացումը:

Զուրաբյանը նշեց, որ այսօր իրենք ներկայացրել են 85 էջանոց մի փաստաթուղթ, որտեղ ներառված են այն բոլոր փաստերը, որոնք ապացուցում են որ Հայաստանի ներկա իշխանական համակարգը բնորոշվում է և՛ իրավական, և՛ քաղաքական ոչ-լեգիտիմությամբ, լիովին հակաժողովրդական է և կոռումպացված:

Զուրաբյանը նշեց, որ իրենց ներկայացրած փաստարկների վերաբերյալ քննարկում չի եղել, իշխանական պատվիրակները միայն լսել են կոնգրեսին:

Նրա փոխանցմամբ՝ քննարկումը կլինի հաջորդ՝ հինգերորդ ռաունդին, երբ իշխանությունը կներկայացնի իր գնահատականը կոնգրեսի ներկայացրած փաստաթղթի վերաբերյալ:

Ի դեպ, հինգրերոդ ռաունդը տեղի կունենա ոչ թե ուրբաթ օրը, ինչպես նախատեսված էր, այլ երեքշաբթի և կսկվի առավոտյան ժամը 10:00-ին:

Աղբյուր՝ 1in.am

[Tig]

Վերջն են: Հալալա

4-15 տարեկան երեխաների նախարարությունը. «Մենք ենք այս գյուղի տերերը» (տեսանյութ)

Առաջին լրատվականի՚ տեսախցիկը Արագածոտնի մարզի Լեռնարոտ գյուղում արձանագրեց, որ երեխաները, հոգնելով իրենց միօրինակ առօրյայից՝ կովերի և այլ անասունների ընկերակցությամբ, ինչպես նաև չունենալով մանկապարտեզ և համապատասխան չափանիշներին համապատասխանող դպրոց, որոշել են իրենք իրենց գլխի ճարը տեսնել սեփական ուժերով ու նախաձեռնությամբ: Նրանք գյուղում կառավարություն են հիմնել՝ նախաձեռնությունն անվանելով «Մենք ենք այս գյուղի տերերը»:

Առաջարկում ենք գրագիտությամբ և բանավոր խոսքով մեր շատ պաշտոնյաների գերազանցող այս երեխաների գործունեությանը ծանոթանալ մեր տեսանյութի միջոցով:

Առաջին լրատվական

[Chuk]

Հայաստանում Արտահերթ նախագահական եւ խորհրդարանական ընտրությունների անցկացման եւ լեգիտիմ իշխանության ձեւավորման անհրաժեշտության հիմնավորում


Ինքս դեռ ուսումնասիրելու ժամանակ չեմ ունեցել:


Բաժնի մոդերատորների առաջարկում եմ նպատակահարմար գտնելու դեպքում առանձնացնել սա, կամ ընդհանրապես երկխոսությանը վերաբերող նորություններն ու նյութերը, առանձին թեմա ստեղծելու համար:

[Chuk]

Գրառման միջի հղումը սխալ էի դրել, շտկել եմ, ներողություն եմ խնդրում:

[Chuk]

Քիչ առաջ Օպերայի մոտ՝ Կարապի լճի հարևանությամբ Հայ ազգային կոնգրեսի 7 երիտասարդ ակտիվիստների ու ոստիկանության միջև միջադեպ է տեղի ունեցել, որի հետևանքով ակտիվիստները տեղափոխվել են Կենտրոնի ոստիկանություն:

Tert.am-ի հետ զրույցում Կոնգրեսի մամլո խոսնակ Արման Մուսինյանը հայտնեց, որ երիտասարդները ոստիկանություն են բերվել ծեծված վիճակում:

Փաստաբան Վահե Հովսեփյանը մոտ 40 րոպե չի կարողացել մտնել ոստիկանության բաժանմունք, և միայն բաժանմունքի մոտ հավաքված քաղաքացիների ճնշման ներքո է կարողացել մտնել ներս:

Ոստիկանության աշխատակիցները, ըստ շրջանառվող լուրերի, տեղափոխվել են հիվանդանոց, իսկ վնասվածքներ ստացած Կոնգրեսի ակտիվիստներին երկրար ժամանակ բուժօգնություն չի տրամադրվել:

Ոստիկանական բաժանմունքի մոտ մի քանի տասնյակ քաղաքացի է հավաքված:

Աղբյուր՝ tert.am

[Chuk]

2011թ. օգոստոսի 9-ին, ժամը 22.00-ի սահմաններում, Երևան ք. Հյուսիսային պողոտայից բերման են ենթարկվել ընդդիմադիր ուժ Հայ ազգային կոնգրեսի ակտիվիստներ Տիգրան Առաքելյանը, Սահակ Մուրադյանը, Արեգ Գևորգյանը, Սարգիս Գևորգյանը, Դամիթ Քիրամիջյանը և Վահագն Գևորգյանը:

Ժամը 22.00-ի սահմաններում, ՀԱԿ ակտիվիստ երիտասարդները մոտեցել են Երևան ք. ՊՊԾ գնդի աշխատակիցներին, երբ վերջիններս ստուգելիս են եղել մի քանի քաղաքացիների: Երիտասարդները պահանջել են նրանցից հիմնավորել իրենց գործողությունները: Ի պատասխան` ՊՊԾ գնդի աշխատակիցները հարձակվել են նրանց վրա, ծեծել վերջիններիս, այնուհետև` բերման ենթարկել Երևան ք. Կենտրոնի ոստիկանության բաժին: Տիգրան Առաքելյանը,Վահագն Գևորգյանը և Դավիթ Քիրամիջյանը ծեծի հետևանքով ստացել են մարմնական վնասվածքներ:

Ժամը 22:30-ի դրությամբ երիտասարդները դեռևս գտնվում էին ոստիկանության բաժանմունքում. նրանց չի թույլատրվել տեսակցել իրենց փաստաբանների հետ:

Աղբյուր՝ hahr.am