Պարզվում է՝ էս Windows 7–ը, որով վերջերս փոխարինել եմ իմ Vista–ին, մի բավական հետաքրքիր հնարավորություն ունի, որով, ասում են, օժտված չէին նրա նախնիները։ Ճիշտ է, ես դեռ չեմ հասցրել հասկանալ, թե ինչի համար կարող է պետք գալ նման տարօրինակ հնարավորությունը, բայց դե ամեն դեպքում հետաքրքիր հնարավորություն է։
Ուրեմն Ակումբում մեկին նամակ էի գրում, հանկարծ ձեռքս պատահաբար կպավ ինչ–որ ստեղնի (ես էլ չիմացա, թե որին), էկրանը մթնեց, մեկ էլ բացվեց, ու ի՞նչ տեսնեմ. դիսփլեյը, այսինքն՝ էկրանին երևացող ամեն ինչ, 90 աստիճանով շուռ է եկել ձախի վրա...Այսինքն՝ որևէ բան նայելու կամ կարդալու համար պիտի ես էլ վիզս 90 աստիճանով ծռեի դեպի ձախ... Բնավորությանս հավատարիմ մնալով, իհարկե, անմիջապես պանիկայի մեջ ընկա, ամուսնուս կանչեցի, ու որոշ ժամանակ երկուսս էլ էդպես 90 աստիճանով ծռած վզերով փորձում էինք գլուխ հանել, թե ինչից կլինի, ու ոնց կարելի է հետ բերել իմ դիսփլեյի կուսական՝ ուղղահայաց դիրքը։ Նույնիսկ մկնիկն էր համապատասխանաբար խեղաթյուրվել.ինչ–որ տարօրինակ ձևով էր շարժվում, հազիվ էինք կառավարում, որ մեր ուզած ուղղությամբ տանենք։ Լավ էր, վերջը գտանք, թե որտեղից կարելի է կարգավորել էդ հարցը, ու դիսփլեյը portrait դիրքից փոխեցինք landscape–ի, թե չէ ես, աչքիս, անխուսափելիորեն ծուռվիզ էի դառնալու։
Մեջբերել
Էջանիշներ