Բեթղեհեմի Սուրբ Ծննդյան տաճարում կրկին ծեծկռտուք է տեղի ունեցել հայ եւ հույն հոգեւորականների միջեւ, որն ավարտվել է ոստիկանների միջամտությամբ։
Ինչպես հաղորդում է «Ազատություն» ռադիոկայանը, Երուսաղեմի Հայոց պատրիարքարանի Սրբոց թարգմանչաց վանքի տեսուչ հայր Ղեւոնդ աբեղա Հովհաննիսյանի վկայությամբ, հույն հոգեւորականները փորձել են հայերին դուրս բերել տաճարի հայկական հատվածից՝ այդ ընթացքում դիմելով ոստիկանների օգնությանը։
Հայ հոգեւորականի խոսքով, հայերի շրջանում կան վիրավորներ, հույների մասին տվյալներ առայժմ հայտնի չեն։
Հիշեցնենք, որ այս միջադեպը սպասելի էր, քանի որ Երուսաղեմում հայ եւ հույն հոգեւորականների միջեւ միջադեպերն արդեն «ավանդական» են դարձել: Նման դեպքերը Երուսաղեմում տեղի են ունենում հիմնականում Սուրբ Ծննդյան եւ Սուրբ Զատկի կամ Հարության եկեղեցական տոների կապակցությամբ: Պատճառն այն է, որ հույն հոգեւորականներին դուր չի գալիս, որ ավանդաբար հայ հոգեւորականները մեծ դերակատարում ունեն Երուսաղեմում տեղի ունեցող արարողությունների ժամանակ:
Մեջբերել
Էջանիշներ