Հայ Ազգային Կոնգրես. աստիճանական ձևավորում իբրև ալտերնատիվ կառավարություն

[Chuk]

Ս.թ. օգոստոսի 1-ին, Մատենադարանին հարող տարածքում տեղի ունեցած հուժկու հանրավաքի ժամանակ ստորագրվեց «Հայ Ազգային Կոնգրեսի» ստեղծման հռչակագիրը:

Կոնգրեսը դարձավ քննարկման առարկա շատերի համար, հնչեցին ամենատարբեր կարծիքներ: Իսկ այդ ընթացքում կոնգրեսն աստիճանաբար սկսեց իր գործունեությունը, արդեն սկսվել է նրան անդամագրման պրոցեսը, ունի կենտրոնական գրասենյակ, աստիճանաբար կբացվեն տարածքային գրասենյակները, հստակ կկանոնակարգվի գործունեությունը, կհստակեցվի կառուցվածքը, վստահ եմ, որ նոր ուժեր կմիանան հռչակագրին:

Սակայն առավել հետաքրքիր է նայել կոնգրեսի գործունեությանն այլ տեսակետից: Մեր աչքի առջև կոնգրեսը սկսվում է ձևավորվել որպես ալտերնատիվ կառավարություն: Երկրի համար բոլոր հրատապ հարցերի շուրջ հնչեցնում իր տեսակետը, առաջարկում իր լուծումները: Իմ խորին համոզմամբ, թեև օրինակներ չեմ բերի, բայց որոշ հարցերում իշխանությունները անգամ ստիպված են լինում կատարել այն, ինչ ասել է կոնգրեսը: Մասնավորապես նման բան եղավ կապված վրացական իրադարձությունների հետ:

Այս թեմայում կդրվեն նյութեր, որոնք հստակ ցույց են տալիս, որ կոնգրեսն ունի խիստ պետական մտածողություն և որ կոնգրեսի մաս կազմող ուժերը պատրաստ են իրենց ձեռքը վերցնել երկրի կառավարումը, նրանք ունեն պետության շահերից բխող լուծումներ՝ յուրատիպ և խիստ հետաքրքիր լուծումներ:

Թեման կսկսեմ, Հայ Ազգային կոնգրեսի հռչակագրի հրապարակմամբ.


ՀԱՅ ԱԶԳԱՅԻՆ ԿՈՆԳՐԵՍԻ ՍՏԵՂԾՄԱՆ ՀՌՉԱԿԱԳԻՐԸ

Նկատի ունենալով, որ Հայաստանի Համաժողովրդական շարժումը, ձեւավորված լինելով որպես նախընտրական միավորում, ավարտել է իր անմիջական դերակա­տարությունը,

Մեկնելով այն իրողությունից, որ իշխանությունը Հայաստանում վերստին բռնազավթված է հանցավոր վարչախմբի կողմից, եւ որ ընտրակեղծիքներն այս անգամ ուղեկցվել են ժողովրդի դեմ իրագործված բիրտ ոճրագործությամբ,

Հաշվի առնելով, որ ետընտրական շրջանում Հայաստանի Հանրապետությունը հայտնվել է մտահոգիչ մարտահրավերների առջեւ,

Գիտակցելով, որ հրատապ անհրաժեշտություն է առաջացել կազմակերպական նոր ձեւի միջոցով Շարժումը հարմարեցնելու այդ մարտահրավերների դիմագրավմանը,

Մենք՝ Շարժման կորիզը կազմող քաղաքական կուսակցությունների ներկայացու­ցիչներս, հռչակում ենք Հայ Ազգային Կոնգրեսի ստեղծումը:

Մեզ միավորում է սահմանադրական կարգի հաստատման՝ ազատ, ժողովրդա­վարական, իրավական, բարգավաճ պետության կերտման եւ լիարժեք քաղաքացիական հասարակության ձեւավորման գաղափարը:

Կոնգրեսի մաս կազմող քաղաքական կուսակցություններն ու հասարակական կազմակերպությունները պահպանում են իրենց լիակատար ինքնուրույնությունը եւ անկախ գործունեություն ծավալելու, այդ թվում` ընտրություններին առանձին մասնակցելու իրավունքը: Կոնգրեսը բաց է Հայաստանի եւ Սփյուռքի բոլոր կուսակցությունների եւ հասարակական կազմակերպությունների անդամագրման համար:

Կոնգրեսի գործունեության ընդարձակ ծրագիրը նախատեսվում է ընդունել եւ հրապարակել նրա առաջիկա համաժողովում: Մինչ այդ, սակայն, հարկ ենք համարում Հայաստանի հասարակությանը ներկայացնել երկրի բարդ ներքաղաքական իրավիճակից թելադրված մեր ընթացիկ խնդիրները.

Անխտիր բոլոր քաղբանտարկյալների անհապաղ ազատ արձակում.

Խոսքի, մամուլի, հավաքների ազատության ապահովում.

Միջազգային փորձագետների նշանակալի մասնակցությամբ մարտի 1-ի ոճրագործության իրապես անկախ հետաքննության իրականացում.

Առվազն առաջին պայմանի կատարման դեպքում` երկրի ժողովրդավարական զարգացմանն ուղղված բարեփոխումների շուրջ իշխանությունների հետ երկխոսության ծավալում.

Արտահերթ նախագահական եւ խորհրդարանական ընտրությունների անցկացում:

Հայրենիքի ճակատագրով մտահոգված բոլոր ուժերին, կազմակերպություններին եւ քաղաքացիներին կոչ ենք անում ստվար շարքերով անդամագրվել Հայ Ազգային Կոնգրեսին:

Ավելացվել է 7 րոպե անց
Ջավախքի խնդրի վերաբերյալ սույն հայտարարությունը տարածվել ս.թ. հուլիսի 26-ին, մինչև ՀԱԿ հռչակագրի ստորագրումը ու այնուամենայնիվ սա տեղավորվում է նույն քաղաքականության մեջ, այնպես որ տեղադրում այստեղ.


ՀԱՄԱԺՈՂՈՎՐԴԱԿԱՆ ՇԱՐԺՄԱՆ ԿԵՆՏՐՈՆԻ ՀԱՅՏԱՐԱՐՈՒԹՅՈՒՆԸ
Ջավախքում ստեղծված իրավիճակի կապակցությամբ

Համաժողովրդական շարժման կենտրոնն իր անհանգստությունն է հայտնում Ջավախքում ստեղծված իրավիճակի կապակցությամբ: Խորը մտահոգություն են առաջացնում օրերս տեղի ունեցած պայթյուններն ու կրակոցները, որոնց հետեւանքով կա երկու զոհ:

Մենք դատապարտում ենք Հայաստանի իշխանությունների վարած քաղաքականությունը տարածաշրջանի նկատմամբ, որը աչքի է ընկնում Ջավախքում առկա խնդիրների շարունակական անտեսմամբ եւ Վրաստանի իշխանությունների հետ համագործակցաբար դրանք լուծելու անկարողությամբ: Դրա փոխարեն Հայաստանի իշխանությունները մշտապես օգտագործել են Ջավախքի բնակչությանը իրենց նպատակների համար, մասնավորապես ապորինաբար ներգրավվելով վերջիններիս հայաստանյան ընտրական միջոցառումներում:

Այսօր էլ, փոխանակ հանդես բերվեր հստակ մոտեցում կատարվածի վերաբերյալ, իշխանությունները սահմանափակվում են անհեթեթ հայտարարություններով, հիասթափություն եւ անտարբերություն առաջացնելով մեր հայրենակիցների շրջանում:

Բարեկամական Վրաստանի հետ ռազմավարական համագործակցության կողմնակիցը լինելով, Համաժողովրդական շարժումը մշտապես կարեւորել է Ջավախքում ժողովրդավարական գործընթացների խորացման, հասարակական կազմակերպությունների կայացման, մարդու իրավունքների պաշտպանության աստիճանի բարձրացման, հայ բնակչության ինքնակառավարման եւ լեզվամշակութային իրավունքներին առնչվող խնդիրները: Կոչ ենք անում Վրաստանի իշխանություններին այնպիսի անհրաժեշտ եւ համարժեք միջոցներ ձեռնարկել իրավիճակի կարգավորման նպատակով, որ որեւէ կերպ չտուժեն ջավախցիների հիմնարար իրավունքները, ազատությունները եւ արժանապատվությունը:

Ավելացվել է 11 րոպե անց
Սույն հայտարարությունը տարածվել է օգոստոսի 9-ին:

ՀԱՅՏԱՐԱՐՈՒԹՅՈՒՆԸ ՎՐԱՑ-ՀԱՐԱՎՕՍԵԹԱԿԱՆ ՀԱԿԱՄԱՐՏՈՒԹՅԱՆ ՎԵՐԱԲԵՐՅԱԼ

Արդեն երրորդ օրն է, ինչ վրաց-հարավօսեթական հակամարտության գոտում տեղի են ունենում ըստ էության պատերազմական գործողություններ։ Ռազմական կոնֆլիկտը շարունակվում է, զոհերի թիվը, մեծագույն մասը քաղաքացիական բնակչութունից, տարբեր տվյալներով անցնում է 2000-ի սահմանը։

Հայաստանի Համաժողովրդական շարժումն իր խորը անհանգստությունն ու ցավակցությունն է հայտնում ծավալված ողբերգական դեպքերի ու մարդկային զոհերի առիթով՝ համարելով որ այդօրինակ հակամարտությունները պետք է կարգավորվեն միմիայն խաղաղ բանակցությունների ճանապարհով։

Պատերազմական գործողությունները դուրս են եկել հակամարտության գոտու սահմաններից։ Վտանգի տակ են Հայաստանի Հանրապետություն մտնող կարեւոր ճանապարհները եւ կոմունիկացիաները, որոնք կենսական նշանակություն ունեն երկրի անվտանգության համար։ Անապահով վիճակում են հայտնվել վրացական հանգստավայրերում եւ այլ վայրերում գտնվող Հայաստանի 10.000-ից ավելի քաղաքացիներ, ինչպես նաեւ ողջ վրացահայությունը։

Այս պայմաններում, երբ յուրաքանչյուրը ժամը կարող է ճակատագրական լինել, ՀՀ դե ֆակտո նախագահ Սերժ Սարգսյանը իր շքախմբով անվրդով շարունակում է օլիմպիական հանգիստը եւ զվարճանքները Չինաստանում։ Սերժ Սարգսյանի՝ երկրի ղեկավարի համար արտառոց այս պահվածքը, ցավոք, բնական ու բնութագրական է նրա համար։ ՄԵնք դատապարտում ենք Սերժ Սարգսյանի՝ ազգային անվտանգության եւ երկրի քաղաքացիների ճակատագրի նկատմամբ դրսեւորած հանցավոր անտարբերությունը։ Երկրի իշխանություններից պահանջում ենք իրավիճակից թելադրված համարժեք միջոցներ ձեռնարկել՝ համապատասխան օգնություն ցուցաբերելու մեր քաղաքացիներին, ինչպես նաեւ ռուսական եւ վրացական իշխանությունների հետ անհրաժեշտ կոնսուլտացիաներ անցկացնել՝ Հայաստանի անխափան մատակարարումն ապահովող կոմունիկացիաների գործունեությունը չվտանգելու նպատակով։

Ավելացվել է 13 րոպե անց
Նույն օրվա հայտարարությունը ծեծի ենթարկված լրագրողի մասին.

ՀԱՅՏԱՐԱՐՈՒԹՅՈՒՆԸ ԼՈՒՍԻՆԵ ԲԱՐՍԵՂՅԱՆԻ ՄԱՍԻՆ

Երեկ առավոտյան ժամը 10-ի մոտ տնից դուրս գալու եւ աշխատանքի գնալու ճանապարհին «Հայկական ժամանակ» թերթի թղթակից, լրագրող Լուսինե Բարսեղյանի վրա ավազակային հարձակում է տեղի ունեցել։ Երկու անհայտ անձինք, նախապես նրան սպասելով, թիկունքից հարձակվել եւ դաժան ծեծի են ենթարկել նրան։ Լուսինե Բարսեղյանը վերջերս հոդվածներ էր տպագրել մի քանի օլիգարխների եւ պաշտոնյաների՝ Հովիկ Աբրահամյանի, Սամվել Ալեքսանյանի եւ Էրեբունու թաղապետ Թոխմախի Մհերի մասին։

Լրագրողի, անպաշտպան կնոջ վրա հաստավիզ սափրագլուխների փոքրոգի այս հարձակումը բնութագրում է Հայաստանում տիրող ավազակապետության դեմքը, ազատ խոսքի նկատմամբ տածած սարսափը, ինչպես նաեւ ցուցադրում երկրում խորացող անիշխանությունն ու ամենաթողությունը։ Համոզված ենք, որ ինչպես բազմաթիվ այսօրինակ, այնպես էլ այս դեպքը չի բացահայտվի։ Իրավապահ մարմիններն այսօր Հայաստանում միայն մեկ գոծառույթ ունեն՝ քաղաքական հետապնդումներ իրականացնել բնակչության ընդդիմադիր մասին նկատմամբ, ուստիեւ, կատարելով իրենց տրված հրահանգները, հենց իրենք են նմանօրինակ հանցանքների պարտակողն ու կազմակերպիչը։ Մենք դատապարտում ենք նողկալի այս արարքը եւ հայտարարում, որ դրա պատասխանատվությունն ամբողջությամբ ընկնում է վարչախմբի պարագլուխների վրա։

[Chuk]

Հայտարարություն օսեթական ճգնաժամի մասին, տարածված օգոստոսի 13-ին: Ուշադրություն դարձրեք թավ տառերով ընդգծածս հատվածին:

ՀԱՅ ԱԶԳԱՅԻՆ ԿՈՆԳՐԵՍԻ ՀԱՅՏԱՐԱՐՈՒԹՅՈՒՆԸ ՕՍԵԹԱԿԱՆ ՃԳՆԱԺԱՄԻ ՄԱՍԻՆ

«Հայ Ազգային Կոնգրես» համաժողովրդական շարժումը խորապես անհանգստացած է հարեւան Վրաստանում ստեղծված ճգնաժամի պայմաններում մեր երկրի համար արդեն իսկ առաջացած, ինչպես նաեւ իրադարձությունների հնարավոր ոչ ցանկալի զարգացման պարագայում քաղաքական, սոցիալական եւ հումանիտար նոր բացասական հետեւանքներով։ Երբ երկիրն ակնհայտ մարտահրավերի ու դրանց հաղթահարման խնդիրների առջեւ է, տարօրինակ է գործող իշխանության մարմինների ոչ համարժեք, տարակուսելի պահվածքը, ինչի ամենացայտուն արտահայտությունը Սերժ Սարգսյանի տեւական բացակայությունն է, անվրդով հանգիստը Չինաստանում։ Դատապարտելով վտանգաշատ այս անգործությունը, Հայ Ազգային Կոնգրեսը Հայաստանի դե ֆակտո իշխանությունից պահաջում է անհապաղ ձեռնարկել հետեւյալ միջոցառումները.

- Պետական մակարդակով ցավակցություն հայտնել հակամարտության հետեւանքով առկա զոհերի կապակցությամբ;

- Հանդես գալ միջազգային հանրության կողմից նախաձեռնած միջնորդական ջանքերին սատարելու հայտարարությամբ: Դրանում հարկ է նաեւ ընդգծել ուժի կիրառման միջոցով ազգամիջյան վեճերը կարգավորելու անթույլատրելիությունը;

- Հայտարարել հակամարտության հետեւանքով տուժածներին մարդասիրական օգնություն տրամադրելու պատրստակամության մասին;

- Անհապաղ պատրաստակամություն հայտնել երկու կողմերի տուժած, բժշկական օգնության կարիք ունեցողներին Հայաստանում ընդունելու` համապատասխան բժշկական եւ այլ օժանդակութուն տրամադրելու նպատակով: Պատրաստակամություն հայտնել տեղերում կազմակերպելու մասնագիտական փրկարար եւ բժշկական օգնություն;

- Անհապաղ նախաձեռնել ՀՀ համապատասխան գերատեսչությունների ներկայացուցիչների այց Ռուսաստան եւ Վրաստան` Հայաստանի արտաքին մատակարարումների անխափան ընթացքի ապահովման նպատակով համապատասխան կառույցների հետ աշխատելու համար:

- Ապահովել Վրաստանում գտնվող ՀՀ քաղաքացիների վերադարձը պետության հաշվին (մինչ այժմ դա արվել է քաղաքացիների հաշվին, երբեմն 3-4 անգամ ավելի թանկ գնով);

- Սահմանային կետերում անհարկի կուտակումներից եւ քաղաքացիներին անհարմարություններ պատճառելուց խուսափելու նպատակով ժամանակավորապես մտցնել սահմանի հատման առավել ինտենսիվ եւ պարզեցված ընթացակարգ;

- Մինչեւ խաթարված ենթակառույցների ամբողջական վերականգնումը, հանդես գալ Կարս-Գյումրի երկաթուղու ժամանակավոր ապաշրջափակման կոչով:

Հարավային Կովկասում ստեղծված իրավիճակում անհրաժեշտ է համարժեք գնահատականների հիման վրա համալիր նախաձեռնողական գործողությունների մշակում եւ իրագործում: Հակառակ դեպքում Հայաստանում սոցիալ-տնտեսական իրավիճակի, ինչպես նաեւ հակամարտության մեջ ներգրավված երկրների հետ մեր հարաբերությունների վատթարացման ողջ պատասխանատվությունը կընկնի իշխող վարչախմբի վրա։

[Chuk]

Օգոստոսի 18-ին տարածված հայտարարություն Սևանա լճին վերաբերվող օրինագծի վերաբերյալ:

ՀԱՅՏԱՐԱՐՈՒԹՅՈՒՆ ՍԵՎԱՆԱ ԼՃԻ ԲՆԱՊԱՀՊԱՆՄԱՆ ՎԵՐԱԲԵՐՅԱԼ
ՀԱՅ ԱԶԳԱՅԻՆ ԿՈՆԳՐԵՍԻ ԿԵՆՏՐՈՆԱԿԱՆ ԳՐԱՍԵՆՅԱԿ

Ազգային ժողովի օգոստոսի 19-ի արտահերթ նստաշրջանում ընդգրկված է «Սևանա լճի էկոհամակարգի վերականգման, պահպանման, վերարտադրության և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ և փոփոխություններ կատարելու մասին մի օրինագիծ։

Այն նախատեսում է լճից տարեկան բաց թողնվող ջրի ծավալի շեշտակի ավելացում. 240 մլն խորանարդ մետրի փոխարեն 360 մլն խորանարդ մետր: Հիշեցնենք, որ այս տարվա ընթացքում սա երկրորդ հարձակումն է Սեւանի վրա. հունիսի 10-ին արդեն իսկ նմանօրինակ մի որոշմամբ լճից տարեկան բաց թողնվող ջրի ծավալը 170 միլիոն խ.մ-ից ավելացվել է՝ հասցնելով 240 միլիոնի։ Օրինագիծը լուրջ անհանգստություն է առաջացրել հասարակության, Սեւանի բնապահպանական խնդիրներով մտահոգված կազմակերպությունների շրջանում: Խնդիրն իրականում շատ ավելի կարեւոր է։ Հայ Ազգային Կոնգրեսը հայտարարում է.


• Սեւանա լիճը, հայ ժողովրդի ամենամեծ հարստություններից մեկն է։ Նրա մակարդակի իջեցումը հանցագործություն է։ Անգամ Խորհրդային Միությունը գիտակցեց ժամանակին կատարած իր սխալը եւ բազմածախս թունելներ կառուցեց լճի մակարդակը բարձրացնելու համար։ Քաղցրահամ ջրի համաշխարհային մասշտաբով անգամ աննախադեպ մեծ այս պաշարը ռազմավարական կարեւոր նշանակություն ունի, մանավանդ, երբ աշխարհում աստիճանաբար հիմնական խնդիրներից մեկն է դառնում խմելու ջրի հիմնահարցը։ Այսինքն՝ Սեւանին առանչվող ցանկացած հարց կամ նախագիծ պետք է ստորադասվի նրա մակարդակի պահպանման եւ բարձրացման հիմնական խնդրին՝ բացառությամբ էքստրեմալ պայմաններում դրանից օգտվելու անհրաժեշտության։

• ԱԺ ներկայացված օրինագծում հիմնավորումները մտացածին են։ Իսպառ բացակայում են բնապահպանական խնդիրներին վերաբերող փորձագիտական գնահատականները: Անընդունելի է ազգային ռազմավարական կարևորության նման հարցի լուծումը առանց լուրջ մասնագիտական և հասարակական բաց քննարկումների: Սեւանի մակարդակի բարձրացման ծրագրից փաստացի հրաժարումը, բազմաթիվ մասնագետների գնահատականներով, կործանարար հետեանքներ կունենա բնապահպանական խնդիրների առումով:

• Ընդհանուր առմամբ մութ են մնում հսկայածավալ ջրի բացթողմամբ Սեւանի մակարդակը մոտ 40 սմ-ով իջեցնելու այս ծրագիրը։ Հիդրոկայաններում էժան էլեկտրաէներգիա ստանալով բյուջեի պակասը լրացնելու առումով այն չնչին արդյունք կարող է տալ։ Գյուղատնտեսության մեջ ոռոգման ջրի օգտագործման պիկը վաղուց անցել է։ Մնում է ենթադրել, որ հանցավոր այս քայլը կատարվում է ինչ-որ մարդկանց կամ մարդկանց խմբերի անհատական շահերից ելնելով։

• Սևանի նախագծային մակարդակով բարձրացմանը չեն կարող խոչընդոտել առափնյա կառույցների գոյությունը, որոնք կարող են հայտնվել ջրի տակ։ Եթե դրանց համար ժամանակին կատարվել են ապօրինի հողահատկացումներ, ապա պատասխան պետք է տան մեղավորները, իսկ օրինական շինությունների դիմաց դրանց տերերը պետք է համարժեք փոխհատուցում ստանան։ Ոչ մեկի անձնական շահը կամ բիզնեսը չի կարող գերադասվել համաժողովրդական հարստությանը՝ Սեւանա լճին ու նրա հետ կապված բնապահպանական խնդիրներին։

Ելնելով վերոշարադրյալից` Հայ Ազգային Կոնգրեսը իշխանություններից պահանջում է դադարեցնել նշված օրինագծի քննարկումը խորհրդարանում, Սեւանա լճին վերաբերող որեւէ օրինագիծ շրջանառության մեջ դնել միմիայն լուրջ բնապահպանակն փորձագիտության հիման վրա եւ հասարակական շահագրգիռ ու բաց քննարկումից հետո:

Ավելացվել է 57 վայրկյան անց
Նույն օրը տարածված հայտարարություն ՀԴՄ-ների նոր օրինագծի վերաբերյալ:

ՀԱՅՏԱՐԱՐՈՒԹՅՈՒՆ ՀԴՄ-ՆԵՐԻ ՆԵՐԴՐՄԱՆ ՄԱՍԻՆ
ՀԱՅ ԱԶԳԱՅԻՆ ԿՈՆԳՐԵՍԻ ԿԵՆՏՐՈՆԱԿԱՆ ԳՐԱՍԵՆՅԱԿ

Ինչպես եւ սպասվում էր եւ բազմիցս զգուշացվել է Համաժողովրդական շարժման փաստաթղթերում, այսպես կոչված «ստվերային տնտեսության» դեմ վարչախմբի պայքարը այլ բան չէր լինելու, քան հարձակում միջին ու մանր գործարարների եւ, անուղղակիորեն, ամբողջ բնակչության վրա։ Ավազակապետության պարագլուխները ոչ մի կերպ չեն կարող դիպչել ապօրինի մենաշնորհների վրա հենված իրենց պատվանդան հանդիսացող օլիգարխների, առավել եւս՝ սեփական բիզնեսին։ Դրա ապացույցն է վարչախմբի հերթական հակաժողովրդական քայլը, որով փոփոխություններ են կատարվում «Հսկիչ-դրամարկղային մեքենաների կիրառման մասին» ՀՀ օրենքում։

Օրենքի նախագծի համաձայն 2009թ. հունվարի 1-ից հսկիչ-դրամարկղային մեքենաների կիրառումը պարտադիր է դառնում նաեւ առեւտրի կենտրոններում (տոնավաճառներում) վաճառատեղերի միջոցով վաճառք իրականացնելիս։ Միեւնույն ժամանակ նախատեսվում են խստացնել պատժամիջոցները։

Հայ Ազգային Կոնգրեսն այս կապակցությամբ հայտարարում է.

ա) Հայաստանը կանգնած է լայնածավալ համապարփակ հարկային բարեփոխումներ իրականացնելու անհրաժեշտության առաջ, որոնց հիմքում սակայն պետք է ընկած լինի առաջնահերթությունների ճիշտ ընտրությունը ու տրամաբանական հերթագայությունը։ Այդ բարեփոխումները պետք է սկսել նախ եւ առաջ երկրի տնտեսությունն ու զարգացումը խեղդող տնտեսական մենաշնորհներից ազատվելով, ապա միայն անցնել միջին ու մանր բիզնեսի կարգավորմանը։

բ) Տնտեսական քաղաքականության ձախողման հետեւանքով հարկային եկամուտների կրճատման պամաններում վարչախումբը որդեգրել է փոքր բիզնեսի դեմ հարկային աննախադեպ տեռորի իրականացման ուղին։

գ) Հարկային բարեփոխումներն առաջին հերթին պետք է ուղղվեն իշխանությունը զավթած վարչախմբի մաս կազմող կամ նրանց հետ սերտաճած օլիգարխների բիզնեսը հարկային դաշտ տեղափոխելուն, մի բան, որ ներկա վարչախումբը ոչ մի կերպ չի կարող անել, քանզի նաեւ այս ճանապարհով է գոյանում հանցավոր վարչախմբի պահպանման համար անհրաժեշտ ստվերային բյուջեն։ Դրանով նա կկտրի այն ճյուղը, որի վրա նստած է։ Եւ իրոք, այս ոլորտում ճիշտ հակառակ միտումն է նկատվում. կառավարության «բարեշրջումների» արդյունքում 2008 թ. երկրորդ եռամսյակում 20 խոշոր հարկատուների կողմից վճարված ուղղակի հարկերը 1-ին եռամսյակի համեմատ նվազել են 541 միլիոն դրամով։

դ) Մանր բիզնեսի այն ոլորտում, որտեղ նախատեսվում են ՀԴՄ-ի ներդրում, այսօր աշխատում է ավելի քան 30.000 փոքր ձեռնարկատեր, որոնց ընտանիքների կենսապահովման միակ աղբյուրը այդ գործունեությունն է։ Քանի դեռ հարկային բնագավառում չեն արվել առավել առաջնահերթ բարեփոխումներ, նրանք կարող են աշխատել միայն հաստատագրված հարկի սկզբունքով։ Առանձին այս օղակում ՀԴՄ-ների ներդրումը մի կողմից կխափանի նրանց գործունեությունը, մյուս կողմից՝ կառաջացնի գների աճ։

Հայ Ազգային Կոնգրեսը կառավարության այս նախաձեռնությունը համարում է ոչ թե բարեփոխում, այլ բարեփոխման հերթական մի իմիտացիա, ինչը ճակատագրական նշանակություն կունենա հազարավոր ընտանիքների համար եւ հղի է սոցիալական ծանր հետեւանքներով։ Կոնգրեսը պահանջում է անհապաղ ետ վերցնել նշված օրենքի նախագիծը։ Հակառակ դեպքում կառավարությունը հերթական անգամ կապացուցի, որ ինքը Հայաստանի ու հայ ժողովրդի շահերի հետ ոչ մի կապ չունեցող հանցավոր օլիգարխիայի շահերի սպասարկուն է։

Ավելացվել է 3 րոպե անց
Հայտարարություն տարածված օգոստոսի 19-ին հերթական լրագրողի ծեծի վերաբերյալ.

ՀԱՅՏԱՐԱՐՈՒԹՅՈՒՆ ՀՐԱՉ ՄԵԼՔՈՒՄՅԱՆԻՆ ԾԵԾԻ ԵՆԹԱՐԿԵԼՈՒ ՄԱՍԻՆ

Օգոստոսի 18-ի ուշ երեկոյան հարձակման և ծեծի է ենթարկվել «Ազատություն» ռադիոկայանի լրագրող, խմբագրի ժամանակավոր պաշտոնակատար Հրաչ Մելքումյանը: Լրագրողի նկատմամբ հաշվեհարդարը տեղի է ունեցել ակնհայտ քաղաքական բովանդակություն ունեցող սպառնալիքների ներքո:

Բնական է, որ «Ազատություն» ռադիոկայանը, լինելով անկախ լրատվության կղզյակ ամբողջությամբ վերահսկվող էլեկտրոնային լրատվամիջոցների մեր այսօրվա միջավայրում, սարսափեցնում է իշխող վարչախմբին իր անաչառ տեղեկատվությամբ: Հատկապես հետմարտիմեկյան լրատվական շրջափակման մեջ «Ազատությունը» հասարակության լայն շերտերի համար դարձավ ճշմարիտ տեղեկատվություն ստանալու եթե ոչ միակ, ապա հազվագյուտ աղբյուրներից մեկը:

Հայ Ազգային Կոնգրեսի կենտրոնական գրասենյակը, դատապարտելով այսօրինակ ոտնձգությունը լրատվամիջոցի և լրագրողի հանդեպ և համարելով այն քաղաքական պատվեր, ինչպես նաև լրագրողների նկատմամբ ահաբեկումների շղթայի մեկ մաս, հայտարարում է, որ.

- ռեժիմը, սարսափած լինելով անաչառ և ճշմարիտ խոսքի տարածումից, փորձում է ահագնացնել ճնշումներն ու ահաբեկումները լրատվական աշխարհի վրա,
- հանցագործության բոլոր պատասխանատուները, կազմակերպիչներից մինչև իրականացնողներ, վաղ թե ուշ կանգնելու են դատարանի առաջ:

[Chuk]

Լևոն Տեր-Պետրոսյանը խոսում է, ինչպես պետք է խոսի հանրապետության նախագահը:

ՌՈՒՍԱՍՏԱՆԸ ՀԱՐԱՎ-ՕՍԵԹԱԿԱՆ ԺՈՂՈՎՐԴԻՆ ՓՐԿԵՑ ՑԵՂԱՍՊԱՆՈՒԹՅՈՒՆԻՑ

ՀՀ առաջին Նախագահ Լեւոն Տեր-Պետրոսյանը պատասխանում է «Ա1+»-ի հարցերին

Պարոն նախագահ, կարծես թե, ռուս-վրացական վերջին պատերազմը լրջորեն չգնահատվեց ո՛չ Հայաստանի իշխանությունների, ո՛չ էլ քաղաքական կուսակցությունների եւ նույնիսկ քաղաքագետների կողմից, մինչդեռ ակնհայտ է, որ այդ պատերազմն անուղղակիորեն շոշափում է նաեւ մեր երկրի կենսական շահերը:

Չեմ կարող չհամաձայնել Ձեր դիտարկմանը, բայց կուզեի այդ առթիվ կատարել մեկ հստակեցում՝ պատերազմը վրաց-օսեթական էր, եւ միայն հետո էր, որ այն վերած­վեց ռուս-վրացականի:

Այսինքն, Դուք ուզում եք ասել, որ նախահարձակը Վրաստանն էր, եւ Ռուսաստանը հարկադրաբա՞ր ներքաշվեց պատերազմի մեջ:

Ես ոչինչ չեմ ուզում ասել, այլ ընդամենը արձանագրում եմ ակնհայտ փաս­տերը: Ոչ ոք չի կարող վիճարկել, որ պատերազմը սանձազերծել էր Վրաստանը՝ նպա­տակ հետապնդելով զենքի ուժով վերացնել Հարավային Օսեթիայի հանրապետու­թյունը: Ոչ ոք չի կարող վիճարկել նաեւ, որ Ռուսաստանն, իր վճռական միջամտու­թյամբ, հարավ-օսեթական ժողովրդին փրկեց ցեղասպանությունից: Եթե ռուսական օգնությունն ուշանար թեկուզ վեց ժամով, այսօր Հարավային Օսեթիա գոյություն չէր ունենա:

Շատերն, ընդունելով հանդերձ Ռուսաստանի միջամտության հիմնավորվա­ծությունը, միաժամանակ պնդում են, որ նրա պատասխանը համարժեք չէր:

Պատմության մեջ ես չգիտեմ դեպք, երբ հզորների պատասխանը համարժեք է եղել իրենց դեմ կատարված որեւէ ոտնձգության: Կարեւորն, ինչպես ասացի, այն է, որ Ռուսաստանը, անկախ նրա պատասխանի համարժեք լինելու կամ չլինելու պարագայից, կանխեց հարավ-օսեթական ժողովրդին սպառնացող ցեղասպանությունը:

Ինչպե՞ս եք վերաբերվում այն պնդումներին, թե իբր Սահակաշվիլին չէր կարող նախաձեռնել պատերազմը՝ առանց ստանալու Ամերիկայի Միացյալ Նահանգների հավանությունը:

Այդ պնդումները ես համարում եմ անհիմն եւ անհավատալի, քանի որ բացառված է, որ Ամերիկայի Միացյալ Նահանգների նման լուրջ պետությունը որեւէ մեկին դրդեր այդպիսի արկածախնդրության: Այլ բան է, որ նախագահ Սահակաշվիլին կարող էր սխալ ընկալել կամ մեկնաբանել Արեւմուտքից ստացած որոշ բարեկամական ժեստեր:

Այդ դեպքում ինչի՞ վրա էր հիմնված Սահակաշվիլու հաշվարկը: Մի՞թե նա չէր կարող կանխատեսել իր քայլի հետեւանքները, մասնավորապես, Ռուսաստանի հակազդեցությունը:

Վրաստանի կառավարության հաշվարկն, իմ կարծիքով, հիմնված էր նախեւառաջ հանկարծակիության գործոնի, եւ երկրորդ՝ բարեկամ երկրներին փաստի առջեւ կանգնեցնելու միջոցով հնարավոր միջազգային աջակցություն ստանալու չերաշխավորված ակնկալիքի վրա: Ըստ այդմ, մենք գործ ունենք «ցանկալին իրականություն ընկալելու» (wishful thinking) տիպական եւ ուսանելի օրինակի հետ:

Եթե, ինչպես Դուք նշեցիք, Վրաստանը հույսը դրել էր հանկարծակիության գործոնի վրա, ապա ինչո՞ւ նա չփորձեց, դեսանտ իջեցնելով, փակել Ռոքի թունելը եւ դրանով խափանել ռուսական ուժերի առաջխաղացումը:

Վրաստանի մտադրությունը ոչ թե հարավ-օսեթական ժողովրդի բնաջնջումն էր, այլ նրա տեղահանումը, ինչն անհնար էր իրականացնել առանց այդ թունելը բաց պահելու: Սահակաշվիլին չէր կարող չգիտակցել, որ բնաջնջումը չէր ներվի համաշխարհային հանրության կողմից, մինչդեռ տեղահանումը կարող էր այս կամ այն կերպ հանդուրժվել, ինչպես 1995 թվականին հանդուրժվեց Կրաինայի սերբերի պարագայում:

Կարո՞ղ եք համառոտակի ամփոփել պատերազմի հիմնական արդյունքները:

Վրաստանի կողմից սանձազերծված պատերազմը ծանր կորուստներ պատճառեց հարավ-օսեթական ժողովրդին եւ ռուս խաղաղարարներին, բայց այդ պատերազմի գլխավոր զոհը դարձավ ինքը Վրաստանը, որը բացի իր վճարած բազմահազար մարդկային կյանքերից, կորցրեց Հարավային Օսեթիայի ու Աբխազիայի վրացաբնակ կղզյակները (անկլավները) եւ ստացավ տասնյակ հազարավոր նոր գաղթականներ: Չեմ կասկածում, որ մոտ ապագայում ոչ այլ ոք, քան վրաց ժողովուրդն է, որ այդ ամենի համար հաշիվ է պահանջելու սեփական կառավարությունից: Ես անկեղծ ցավով եմ արձանագրում եղբայրական վրաց ժողովրդին բաժին ընկած ազգային աղետը եւ նրան մաղթում հնարավորինս արագ վերագտնել իր արժանապատվությունն ու ինքնավստահությունը: Այդ մաղթանքը որքան անկեղծ է մարդկային առումով, նույնքան աներկբա է քաղաքական տեսակետից, քանի որ Վրաստանի կայունությունը, հզորությունը եւ բարգավաճումը միանգամայն համապատասխանում են Հայաստանի շահերին:

Ինչպե՞ս կգնահատեք Ֆրանսիայի նախագահ Սարկոզիի միջնորդական առաքելությունը ռուս-վրացական հակամարտության կարգավորման գործում:

Դա միանգամայն ժամանակին նախաձեռնված եւ արդյունավետ առաքելություն էր, ինչն, անշուշտ, հեշտացվեց ռուսական կողմի պատրաստակամության եւ վրացական կողմի այլընտրանք չունենալու պատճառով: Սարկոզիի դերակատարությունը կարեւորվում է մանավանդ այն առումով, որ նա ներկայացնում էր ոչ միայն Ֆրանսիայի, այլեւ Եւրոպական Միության դիրքորոշումը:

Իսկ ինչպե՞ս այդ համատեքստում կմեկնաբանեք Եվրամիության որոշ երկրների՝ Լեհաստանի, Բալթյան հանրապետությունների, ինչպես նաեւ Ուկրաինայի ղեկավարների միանշանակ աջակցությունը Վրաստանին:

Թբիլիսիում տեղի ունեցած համերաշխության այդ ցույցն, իհարկե, հուզիչ արարողություն էր, բայց դրան պետք է վերագրել ավելի շուտ բարոյական, քան քաղաքական նշանակություն:

Ինչպիսի՞ հետեւանքներ կարող է ունենալ ռուս-վրացական զինված հակամարտությունը գլոբալ քաղաքականության տեսակետից:

Հակառակ ռուս-վրացական պատերազմի առաջացրած լայն միջազգային արձագանքին, ակնհայտ է, որ այն ունենալու է զուտ տեղական կամ տարածաշրջանային նշանակություն եւ, ըստ էության, չի ազդելու գերտերությունների ռազմավարական բնույթի ներկա հարաբերությունների վրա: Ամերիկայի Միացյալ Նահանգներում ծավալվող կոշտ հակառուսական ռիտորիկան բացատրվում է նախընտրական կոնյունկտուրայով, ուստի հիմքեր չկան դա երկարաժամկետ գործոն դիտելու: Հարավային Օսեթիան այն կիզակետը չէ, որ սառը պատերազմի վերակենդանացման ազդակ ծառայի:

Վրաց-օսեթական պատերազմը կարո՞ղ է ինչ-որ կերպ անդրադառնալ մյուս չլուծված էթնիկական հակամարտությունների վրա:

Անտարակույս: Սակայն, ցավոք սրտի, ոչ թե այդ խնդիրների կարգավորման հեշտացման, այլ բարդացման ու երկարաձգման առումով: Պատերազմը մեկ անգամ եւս վերհանեց միջազգային իրավունքի երկու հիմնարար սկզբունքների՝ տարածքային ամբողջականության եւ ազգերի ինքնորոշման նկատմամբ գերտերությունների դրսեւորած հակասական մոտեցումը: Մինչեւ աշխարհը չհրաժարվի այս հարցում երկակի ստանդարտների կիրառման պրակտիկայից կամ չգտնի նշված սկզբունքների ներդաշնակեցման բանալին, անհնար է պատկերացնել ազգամիջյան հակամարտությունների արագ լուծումը:

Իսկ ի՞նչ ազդեցություն ունեցավ պատերազմը Հայաստանի վրա:

Պատերազմը ամենայն ակնհայտությամբ ցույց տվեց, թե որքա՛ն փխրուն եւ խոցելի է Հայաստանի տնտեսությունը: Հարեւան երկրում ընդամենը մի քանի օր տեւած ռազմական գործողություններն անմիջապես խախտեցին Հայաստանի բեռնափոխադրումների կանոնավորությունը եւ որոշակի խուճապ առաջացրին ներքին շուկայում, մասնավորապես գազի եւ նավթամթերքների մատակարարման բնագավառում: Փոթիի նավահանգստի գործունեության թեկուզ ժամանակավոր խափանումն ու Անդրկովկասյան երկաթուղու կամուրջներից մեկի պայթեցումն սպառնում են ավելի եւս բարդացնել իրավիճակը: Սա պետք է Հայաստանի իշխանություններին ստիպի լրջորեն գնահատել այս դառն իրողությունը եւ համապատասխան եզրակացություններ անել նրանից:

Ձեր կարծիքով, Հայաստանի կառավարությունն ինչպե՞ս պետք է արձագանքեր պատերազմին եւ ի՞նչ քայլեր ձեռնարկեր ստեղծված իրավիճակում:

Եթե Դուք նկատի ունեք պաշտոնական կամ դիվանագիտական արձագանքը, ապա դրական չեզոքությունը, թերեւս, այն առավելագույնն էր, որ Հայաստանի կառավարությունը կարող էր դրսեւորել երկու բարեկամ պետությունների միջեւ ծագած ռազմական հակամարտության նկատմամբ: Այս առումով Հայաստանի իշխանությունների դիրքորոշումից դժգոհելու հիմքեր չկան: Իսկ գործնականում Հայաստանի կառավարության կողմից պետք է արվեն եւ մասամբ արվում են իրավիճակից բխող որոշ քայլեր՝ մարդասիրական օգնության ցուցաբերում թե՛ օսեթական, թե՛ վրացական կողմերին, կանոնավոր բեռնափոխադրումների իրականացում ավտոշարասյուների միջոցով, մասնակցություն Փոթիի նավահանգստի վերագործարկման եւ Կասպիի երկաթուղային կամրջի վերականգնման աշխատանքներին եւ այլն: Սակայն «համապատասխան եզրակացություններ» ասելով, նույնիսկ այս ամենը չէ, որ ես նկատի ունեի, այլ շատ ավելի էական պահեր, մասնավորապես՝ պատերազմից քաղելիք մեր դասերը:

Ի՞նչ դասերի մասին է խոսքը:

Առաջին, Հայաստանի իշխանությունները վերջապես պետք է հասկանան, թե ինչպիսի չարիք է մեր երկրի շրջափակումը եւ նրա միակողմանի կախվածությունը միայն մեկ հարեւանից: Դա պետք է նրանց ստիպի իրական քայլեր ձեռնարկել Ղարաբաղի հարցի լուծման եւ հայ-թուրքական հարաբերությունների կարգավորման ուղղությամբ: Երկրորդ, արկածախնդրությունը մեծագույն վտանգ է փոքր պետությունների համար, որովհետեւ դրա ամենահավանական հետեւանքը ազգային աղետն է: Փոքր պետություններն այդպիսի սխալներ գործելու իրավունք չունեն: Նման շռայլություն թույլատրված է միայն աշխարհի հզորներին, քանի որ նրանց սխալներից սովորաբար տուժում են ոչ թե իրենք, այլ միեւնույն է՝ փոքրերը: Եւ երրորդ, փոքր պետությունները պետք է մեկանգամընդմիշտ հրաժարվեն երրորդ ուժի ապավինելու կործանարար քաղաքականությունից եւ փորձեն իրենց հարցերը լուծել սեփական միջոցներով ու կարողություններով՝ չխախտելով միջազգային իրավունքի ընդունված կանոնները եւ ժողովուրդների համակեցության նորմերը:

[Վարպետ]

Հիմա ըստ թեմայի: Հասարակ քաղաքացիների ներգրավումը Հայ Ազգային Կոնգրեսում, արդյոք չի հանգեցնի այս կառույցի փոխակերպմանը` սովորական կուսակցության: Կամ ասենք` ինչպիսին են լինելու սովորական մեկ քաղաքացու եւ մի ամբողջ կուսակցության իրավունքների ռեալիզացիայի մեթոդները, ասենք, համագումարի պատվիրակ ընտրելիս: Եթե կուսակցության կամ ՀԿ-ի լիազորությունները ավելին են լինելու, ես կարող եմ վաղը մի ՀԿ գրանցել ու ընդգրկվել ոչ թե որպես քաղաքացի, այլ ՀԿ?

[Chuk]

Հիմա ըստ թեմայի: Հասարակ քաղաքացիների ներգրավումը Հայ Ազգային Կոնգրեսում, արդյոք չի հանգեցնի այս կառույցի փոխակերպմանը` սովորական կուսակցության: Կամ ասենք` ինչպիսին են լինելու սովորական մեկ քաղաքացու եւ մի ամբողջ կուսակցության իրավունքների ռեալիզացիայի մեթոդները, ասենք, համագումարի պատվիրակ ընտրելիս: Եթե կուսակցության կամ ՀԿ-ի լիազորությունները ավելին են լինելու, ես կարող եմ վաղը մի ՀԿ գրանցել ու ընդգրկվել ոչ թե որպես քաղաքացի, այլ ՀԿ?

Ոչ, չեմ կարծում թե կնմանվի կուսակցության:
Հիմնական նպատակները, անդամագրման, ըստ իս իհարկե, համախոհների քանակի ցուցադրությունն է, միաժամանակ պայքարին մասնակցել ցանկացողներին «օգտագործելու» ձևերի պարզումը՝ պայքարն ավելի արդյունավետ դարձնելու համար: Ես չգիտեմ, թե արդյոք ցանկացած ՀԿ-ի կընդունեն իրենց շարքերը, բայց կարծում եմ, որ տեսականորեն այո: Ուղղակի միաժամանակ թե ես կհասկանամ դրա անհեթեթությունը, թե իրենք, թե դու

[Վարպետ]

Ոչ, չեմ կարծում թե կնմանվի կուսակցության:
Հիմնական նպատակները, անդամագրման, ըստ իս իհարկե, համախոհների քանակի ցուցադրությունն է, միաժամանակ պայքարին մասնակցել ցանկացողներին «օգտագործելու» ձևերի պարզումը՝ պայքարն ավելի արդյունավետ դարձնելու համար: Ես չգիտեմ, թե արդյոք ցանկացած ՀԿ-ի կընդունեն իրենց շարքերը, բայց կարծում եմ, որ տեսականորեն այո: Ուղղակի միաժամանակ թե ես կհասկանամ դրա անհեթեթությունը, թե իրենք, թե դու

Էդ հասկանում եմ, որ ես ու դու կհասկանանք Բայց կգտնվեն մարդիկ, որոնք կուզենան օգտագործել բացը: Հիմա էլ ամբիոնում Պապիի կողքը մարդիկ կան կանգնած, որոնց ես անձամբ ճանաչում եմ շա~տ մոտիկից ու մի կիլոմետրի վրա մոտ չեմ թողնի ինձ: Փաստորեն էդ մի անհեթեթությունը` ի դեմս էդ մարդու, չի նկատվել չէ?

[Chuk]

Էդ հասկանում եմ, որ ես ու դու կհասկանանք Բայց կգտնվեն մարդիկ, որոնք կուզենան օգտագործել բացը: Հիմա էլ ամբիոնում Պապիի կողքը մարդիկ կան կանգնած, որոնց ես անձամբ ճանաչում եմ շա~տ մոտիկից ու մի կիլոմետրի վրա մոտ չեմ թողնի ինձ: Փաստորեն էդ մի անհեթեթությունը` ի դեմս էդ մարդու, չի նկատվել չէ?

Ճգնաժամային պահերին միավորվում են բոլորը՝ մեկի դեմ պայքարելու համար: Կարևորը, որ հետո զտման պրոցեսը ճիշտ գնա, ըստ իս:

[Chuk]

Մոդերատորական: Թեմայից դուրս և/կամ ագրեսիվ և/կամ վիրավորական ենթատեքստով և/կամ իմաստ չպարունակող, կամ էլ դրանց արձագանք հանդիսացող 7 գրառումները ջնջվել են:

[Chuk]

Հայ Ազգային Կոնգրեսի կենտրոնական գրասենյակը հաղորդագրություն է տարածել, որում, մասնավորապես, արծարծվում է Հայաստանում սկսված վառելիքի ճգնաժամի խնդիրը:
ՀԱԿ-ի հայտարարության մեջ ասված է.

«Վրաց-հարավօսեթական կարճատև ռազմական հակամարտությունը հերթական անգամ ի ցույց դրեց ապօրինի վարչախմբի որակները՝ անգործությունը, անճարակությունն ու անտարբերությունը երկրի ու ժողովրդի նկատմամբ։ Հակամարտության սկզբից քսան օր անց էլ դրա հետևանքները շարունակում են ծանր ազդեցություն ունենալ Հայաստանի տնտեսության վրա։ Վրաստանի տարածքով Հայաստան տեղափոխվող բեռները, գրեթե ամբողջությամբ, դեռևս գտնվում են ճանապարհին և որևէ երաշխիք՝ դրանց տեղ հասնելու ժամկետների վերաբերյալ գոյություն չունի։ Այլ կերպ չէր էլ կարող լինել, երբ երկրի դե-ֆակտո նախագահն այդ ընթացքում, փոխանակ երկրում գտնվելու, ամբողջ տաս օր իր հանգիստն էր անցկացնում Չինաստանում։ Վարչախումբն, այսօր էլ շարունակում է իր անգործությունը, դեռ ավելին, խաբելով սեփական ժողովրդին, շարունակում է հայտարարել, որ բեռների տեղափոխման հետ կապված Հայաստանը որևէ խնդիր չունի։
Մինչդեռ, հանրապետությունում վերջին օրերին առկա է տնտեսական լուրջ ճգնաժամ։ Ռազմավարական նշանակության ապրանք համարվող հեղուկ վառելիքի պաշարները հանրապետությունում գրեթե սպառված են, բենզալցակայանների մի մասը չի աշխատում, որոշները բենզինը վաճառում են խիստ սահմանափակ չափերով։ Հանրապետությունում 1 լիտր բենզինի ստվերային գինը արդեն հասնում է 1000 դրամի։

Ստեղծված իրավիճակի կապակցությամբ Հայ Ազգային Կոնգրեսը հայտարարում է.
• Հանրապետության կառավարությունն այսօր ի վիճակի չէ իրականացնել ճգնաժամային կառավարում, մինչդեռ անգամ Ղարաբաղյան պատերազմի և շրջափակման ծանր տարիներին պետությունը կարողանում էր կարգավորել նմանօրինակ վիճակները։
• Ճգնաժամը նաև անխուսափելի հետևանքն է այն թեթևամիտ որոշման, որով ժամանակին, երբ տարիներ շարունակ անխափան գործում էր Հայաստանը սնող կոմունիկացիոն համակարգը, վերացվեցին պետական ռեզերվները։ Այսօր, ըստ էության, Հայաստանում գոյություն չունեն նման ճգնաժամերից խուսափելու համար անհրաժեշտ պահուստային ֆոնդեր։
• Կառավարության կողմից նախօրոք մշակված և Իրանի Իսլամական հանրապետության հետ մշակված չեն նման դեպքերում նրա տարածքով վառելիքի անհրաժեշտ ծավալների ներկրման սխեմաներ։ Մշակված չեն նաև առաջին անհրաժեշտության նման ապրանքների ներկրման այլընտրանքային այլ սխեմաներ։
• Ոլորտի ծայրահեղ մոնոպոլիզացիան իր հերթին էլ ավելի է խորացնում ճգնաժամի սրությունը։

Հաշվի առնելով վերոշարադրյալը, Հայ Ազգային Կոնգրեսը պահանջում է անհապաղ իրականացնել հետևյալ միջոցառումները.
• Վերացնել հեղուկ վառելիքի ներկրման մենաշնորհը և հնարավորություն տալ բոլոր ցանկացողներին զբաղվել այդ գործով.
• ստեղծել մեխանիզմներ, որոնք կկանխեն հեղուկ վառելիքի սակավության պայմաններում ապօրինի գնով դրա վաճառքը և գերշահույթների ստացումը, իսկ մինչեւ ճգնաժամի հաղթահարումը մտցնել բենզինի վաճառքի նորմավորում.
• հանձնարարել պատկան մարմիններին՝ ճգնաժամի ավարտից հետո ապահովել առաջին անհրաժեշտության ապրանքների առնվազն մի քանի ամսվա համար անհրաժեշտ պահուստներ` ապագայում հնարավոր ճգնաժամերից խուսափելու համար։

Վերոնշյալ բոլոր պահանջներն անհապաղ չկատարելու դեպքում` երկրում խորացող տնտեսական ճգնաժամի ու դրա հետեւանքների ողջ պատասխանատվությունը կընկնի անմեղսունակ իշխանությունների վրա` փաստելով, որ վերջիններիս համար սեփական շահը գերակա է հայ ժողովրդի անվտանգության և բարեկեցության ապահովումից»։


Աղբուրը՝ tert.am

[Chuk]

ՀԱՅՏԱՐԱՐՈՒԹՅՈՒՆ ՀՅՈՒՍԻՍԱՅԻՆ ՊՈՂՈՏԱՅԻ ԴԵՊՔԵՐԻ ՄԱՍԻՆ
25.08.2008

Օգոստոսի 25-ին ժամը 10:30-ի սահմաններում Հյուսիսային պողոտա են ներխուժել ոստիկանության եւ քաղաքացիական հագուստով մարդկանց մի մեծ խումբ՝ միասին մոտ 100 հոգի, և այնտեղից առևանգել են պողոտայում տեղադրված բոլոր ստենդները եւ պաստառները` ջարդելով և պատառոտելով դրանք: Այս ամենն ուղեկցվել է լկտի պահվածքով և փողոցային հայհոյանքներով:

Գտնվելով ներքին բզկտոցների ու ճգնաժամի մեջ, վարչախումբը սարսափած է Հյուսիսային պողոտայում տեղի ունեցող նստացույցի աճող հեղինակությունից և արդյունավետությունից: Պատանդ պահելով 76 քաղբանտարկյալների` այժմ իշխանությունները վախկոտաբար կռվի են բռնվել նրանց նկարների եւ հանրությանը ներկայացվող ճշմարիտ տեղեկատվության հետ:

Սեպտեմբերի 5-ի հանրահավաքին ընդառաջ, Հյուսիսային պողոտայում լայն թափով շարունակվում է նաեւ Հայ Ազգային Կոնգրեսի անդամագրումը և Ռոբերտ Քոչարյանին Հաագայի միջազգային քրեական դատարան հանձնելու ստորագրահավաքը: Իշխանությունները հասկանում են, որ հասարակության ակտիվացումը, քաղաքական դատավարությունների փլուզումները, երկրում ահագնացող տնտեսական ճգնաժամը, գործարարության դեմ սանձազերծված աննախադեպ տեռորը անխուսափելի են դարձնում Հայ Ազգային Կոնգրեսի` սեպտեմբերի 5-ին նշանակված հանրահավաքի հուժկու բնույթը, ուստիև ստիպված են դիմել ճարահատ բռնությունների և ապօրինությունների:

Օգտնվելով այն հանգամանքից, որ միջազգային հանրության ուշադրությունը շեղված է Վրաստանի վրա, վարչախումբը փորձ է անում վերացնել մարդու ազատությունների եւ ժողովրդավարության արտահայտման վերջին հնարավորությունը։ Հայ Ազգային Կոնգրեսն իր տարակուսնքն է հայտնում այս եւ նմանօրինակ դեպքերում միջազգային պատկան կառույցների լռության առթիվ։

Մենք բոլորին զսպվածության ու համբերության կոչ ենք անում, դա մեր ամենահզոր զենքն է։ Նաեւ հայտարարում ենք, որ վարչախմբի այս անհավասարակշիռ քայլերը, ըստ էության՝ մանր խուլիգանությունները, չեն կարող կոտրել ՀԱԿ-ի և նրան սատարող հարյուր հազարավոր քաղաքացիների կամքը` պայքարը հասցնելու վերջնական հանգրվանին և ազատվելու այս հակաժողովրդական ռեժիմից:


Հաղորդում հանցագործության մասին
Սույն թվականի օգոստոսի 25-ին խաղաղ ցույցերին մասնակցելու իրավունքի խախտման վերաբերյալ «Ժառանգություն» խմբակցությունը ահազանգեր է ստացել ՀՀ քաղաքացիներից և ԶԼՄ-ներից:

ՀՀ Գլխավոր Դատախազ
Աղվան Հովսեփյանին
Երևան, Հայաստանի Հանրապետություն

ՀՀ Մարդու իրավունքների պաշտպան
Արմեն Հարությունյանին

Եվրոպայի Խորհրդի Մարդու իրավունքների հանձնակատար
Թոմաս Համերբերգին

Սույն թվականի օգոստոսի 25-ին խաղաղ ցույցերին մասնակցելու իրավունքի խախտման վերաբերյալ «Ժառանգություն» խմբակցությունը ահազանգեր է ստացել ՀՀ քաղաքացիներից և ԶԼՄ-ներից:

Օգոստոսի 25-ին` առավոտյան ժամը 10:30-ից 12:00-ի միջակայքում Երևանի Հյուսիսային պողոտայում խաղաղ նստացույցի հավաքված ցուցարարների վրա հարձակվել են մոտ 100 մարդ, որոնցից մի մասը եղել են քաղաքացիական հանդերձանքով, իսկ մյուս մասը` ոստիկանական համազգեստով: Նրանք պոկել և պատռել են բողոքի ակցիայի մասնակիցներին պատկանող բոլոր ստենդները, պաստառները` փչացրած պաստառների և ստենդների մնացորդները տանելով իրենց հետ:

Հարձակման թիրախ է դարձել նաև բողոքի ակցիայի ստորագրահավաքի սեղանը և այդ պահին ստորագրահավաքի պատասխանատու` տիկին Ռուզան Կարապետյանը: Հարձակում գործող ոստիկանները և նրանց հետ համատեղ գործող քաղաքացիական հագուստով անձինք կոպտել և սպառնացել են տիկին Ռուզաննա Կարապետյանին և, նրա կամքին հակառակ, տարել նաև ստորագրահավաքի նյութերը:

Երևանի Հյուսիսային պողոտայում գտնվող ոստիկանները ոչ խաղաղ ցուցարաների խնդրանքով, ոչ էլ իմ խնդրանքով չեն տրամադրել իրենց կողմից իրականացվող միջոցառումների վերաբերյալ որևէ իրավական հիմք` որոշում: Խաղաղ նստացույցի մասնակիցները իրավապահ մարմինների աշխատակիցների կողմից իրենց և իրենց պատկանող գույքի նկատմամբ իրականացվող վարչական կամ քրեա-դատավարակա գործառույթների իրականացման մասին չեն նախազգուշացվել և չեն իրազեկվել:

Հայաստանի Հանրապետության բազմահազար քաղաքացիներ 2008 թվականի մարտի 1 և 2-ի ողբերգական իրադարձություններից հետո իրացնելով իրենց սահմանադրական իրավունքը նախաձեռնել են ստորագրահավաք` ՀՀ նախկին Նախագահ Քոչարյան Ռոբերտի նկատմամբ Հաագայի Միջազգային քրեական դատարանում գործընթաց սկսելու վերաբերյալ:


Երևանի Հյուսիսային պողոտայում խաղաղ ցուցարարների ակցիան ամենայն հավանականությամբ մտահոգել և զայրացրել է ՀՀ նախկին Նախագահին` և ապօրինաբար օգտագործելով Հայստանի իրավապահ մարմինների նկատմամբ իր ազդեցությունը այսօր հրահանգ է տվել մաքրել Երևանի Հյուսիսային պողոտան: Չի բացառվում, որ տեղի ունենա դեպքերի կրկնություն ճիշտ այնպես ինչպես 2008 թվականի փետրվարի 29-ից հետո:

Հայաստանի Հանրապետության Նախագահական ընտրություներից հետո` մասնավորապես, 2008 թվականի մարտի 1-ի և 2-ի անմարդկային ոճրագործության գնահատականներ տալու և մեղավոր անձանց պատասխանատվության ենթարկելու համազգային գործընթացը սկսել և տեղի է ունենում Երևանի Հյուսիսային պողոտայում: Այս ստորագրահավաքը ՀՀ նախկին Նախագահ Քոչարյան Ռոբերտի նկատմամբ Հաագայի Միջազգային քրեական դատարանում գործընթաց սկսելու վերաբերյալ ՀՀ քաղաքացիների կարծիքը արտահայտելու, տեղեկություններ և գաղափարներ փնտրելու, ստանալու, տարածելու համար առկա միակ հնարավորությունն է:


ՀՀ քաղաքացիները քաջ գիտակցելով, որ ՀՀ նախկին Նախագահ Քոչարյան Ռոբերտը կատարել է մարդկության դեմ ուղղված հանցագործություն` անձամբ հրահանգել է համայն հայության մայրաքաղաքի փողոցներում սպանել անզեն քաղաքացիներին և խաղաղ ցուցարարներին, Երևանի Հյուսիսային պողոտայում են մեկտեղում իրենց հավաքական բողոքի առտահայտությունը` ստորագրությամբ վավերացնելով իրենց կարծիքը:


ՀՀ Սահմանադրության 29-րդ հոդվածը սահմանում է` «քաղաքացիներն ունեն խաղաղ, առանց զենքի հավաքներ, երթեր և ցույցեր անցկացնելու իրավունք», իսկ 27 հոդվածը սահմանում է. «յուրաքանչյուր ոք ունի խոսքի ազատության իրավունք, ներառյալ տեղեկություններ և գաղափարներ փնտրելու, ստանալու, տարածելու ազատությունը, տեղեկատվության ցանկացած միջոցով անկախ պետական սահմաններից»:
Մարդու իրավունքների և հիմնարար ազատությունների պաշտպանության մասին Եվրոպական կոնվենցիայի 10 և 11 հոդվածներով պաշտպանվում են յուրաքանչյուր անձի արտահայտվելու ազատությունը, հավաքների և միավորումների ազատությունը:

2008թ. օգոստոսի 25-ի ահազանգերը փաստում են, որ խախտվել է ՀՀ Սահմանադրությամբ և Եվրոպական կոնվենցիայով պաշտպանվող խաղաղ ցույցերին մասնակցելու, տեղեկատվություն ստանալու, տարածելու մարդու իրավունքը:

Հիմք ընդունելով վերոգրյալը` խնդրում եմ համապատասխան ընթացք տալ սույն հաղորդմանը և անհրաժեշտ քրեադատավարական միջոցառումներ ձեռնարկել մեղավորներին պատժելու համար:

Հարգանոք`

Զարուհի Փոստանջյան

Պետական-իրավական մշտական հանձնաժողովի անդամ
ԱԺ պատգամավոր

25 օգոստոսի 2008
ԺԽ-0312/08




ՀԱՅՏԱՐԱՐՈՒԹՅՈՒՆ ՔՐԵԱԿԱՏԱՐՈՂԱԿԱՆ ՀԻՄՆԱՐԿՆԵՐՈՒՄ ԳՈՐԾՈՂ ԻՐԱՎԻՃԱԿԻ ՎԵՐԱԲԵՐՅԱԼ
28.08.2008

ՀՀ արդարադատության նախարարության քրեակատարողական հիմնարկներում պարբերաբար կոպտորեն խախտվում են մարդու տարրական իրավունքները, մասնավորապես, շարունակական են դարձել քաղբանտարկյալների հանդեպ տարբեր սադրանքները: Կոչ ենք անում և պահանջում արդարադատության նախարար Գ. Դանիելյանից խստորեն պահպանել և հետամուտ լինել քրեակատարողական հիմնարկներում մարդու իրավունքների պահպանմանը: Ցանկացած սադրանք, որը կկազմակերպվի և կիրականացվի քրեակատարողական հիմնարկներում, տարբեր հանցագործ խամաճիկների ձեռքով, մեր կողմից հետամուտ է լինելու:

Քրեակատարողական հիմնարկներում ՀՀ օրենքների չիրագործման, մարդու իրավունքների ոտնահարման պատասխանատուն նախարար Գ. Դանիելյանն է:

Այս ամենն ապացուցվում է վերջերս հանրության մեջ շրջանառվող տեսաերիզով, որտեղ պարզ երևում է քրեակատարողական հիմնարկներում տիրող մթնոլորտը և բարքերը: Պահանջում ենք նախարար Գ. Դանիելյանից, որպեսզի վերջինս իր իրավասության տակ գտնվող կալանավայրերում շտապ միջոցներ ձեռնարկի՚ կարգուկանոն հաստատելու և ՀՀ օրենքները պատշաճ կիրառելու համար:

ՀՀՇ վարչության նախագահ, 300 և 225-րդ հոդվածներով ցայսօր մեղադրվող Արարատ Զուրաբյան

ՍԴՀԿ ատենապետ Լյուդմիլա Սարգսյան

ԱԺ նախկին պատգամավոր, 300 և 225-րդ հոդվածներով ցայսօր մեղադրվող Գուրգեն Եղիազարյան

ԱԺ նախկին փոխնախագահ, 300 և 225-րդ հոդվածներով ցայսօր մեղադրվող Կարապետ Ռուբինյան

ՀՀՇ վարչության անդամ, նախկին քաղբանտարկյալ Երջանիկ Աբգարյան

Իրավապաշտպան Վարդան Հարությունյան

Հանրապետություն կուսակցության անդամ, նախկին քաղբանտարկյալ Խաչիկ Սիմոնյան

[haik]

Կոնգրեսի անվանումը միանգամից դնեիք GODF պրծնեիք… Այդ ժամանակ գոնե ինքը իր անվանմամբ կկոչվեր… Թե չե հերիք չի հայ, դեռ մի հատ էլ ազգային…

[Chuk]

ՀԱՅՏԱՐԱՐՈՒԹՅՈՒՆ ՍԵՊՏԵՄԲԵՐԻ 6-Ի ՀԱՆՐԱՀԱՎԱՔԸ ԱՄՍԻ 12 ՀԵՏԱՁԳԵԼՈՒ ՄԱՍԻՆ
29.08.2008 թ.

Սեպտեմբերի 6-ին նշանակված ֆուտբոլի աշխարհի առաջնության որակավորման փուլի Հայաստան-Թուրքիա խաղի եւ պաշտոնապես հայտարարված՝ Հայաստան 20-25 հազար թուրք ֆուտբոլասերների ժամանման առիթով կառավարությունը կայացրել է մի ինչ-որ որոշում, որով մարդու իրավունքների եւ ազատությունների հակասահմանադրական սահմանափակումներ է մտցրել, ինչպիսիք Սահմանադրությամբ նախատեսվում են միայն արտակարգ դրության պայմաններում։

Միեւնույն ժամանակ մենք հասկանում ենք առանձնահատուկ այս դեպքում հասարակական կարգի ու անվտանգության պահպանման լրացուցիչ միջոցառումների անհրաժեշտությունը։ Նման դեպքերում ժողովրդի վստահությունը վայելող լեգիտիմ իշխանությունը դա կարող էր անել բոլորովին այլ կերպ, առանց Սահմանադրությունը եւ իր քաղաքացիների իրավունքները ոտնահարելու, մասնավորապես` խնդրանքով դիմելով հասարակական ու քաղաքական կազմակերպություններին՝ ձեռնպահ մնալ այդ օրերին զանգվածային միջոցառումների կազմակերպումից։

Հայ Ազգային Կոնգրեսը հաստատակամ պայքարելով հանդերձ այս ապօրինի վարչախմբի դեմ, միայն քաղաքական դիվիդենտներ քաղելու համար երբեք չի ձեռնարկել ու արել գործողություններ, որոնք ինչ-որ կերպ, թեկուզ միջնորդավորված, կարող են վնասել Հայաստանի պետականության ու ժողովրդի շահերին։ Ուստիեւ, նկատի ունենալով՝

- վերջին շրջանում մեր տարածաշրջանում ծավալված բուռն իրադարձությունների ու դրանց հետ կապված աշխարհաքաղաքական հայտնի զարգացումների հետեւանքով ստեղծված լարված ու նուրբ իրավիճակը,

- այն հանգամանքը, որ առաջին անգամ մեր երկիր են ժամանելու Թուրքիայի հազարավոր քաղաքացիներ (գուցե նաեւ այդ երկրի նախագահը), որոնց անվտանգության հետ կապված՝ բազմաթիվ օբյեկտիվ խնդիրներ կարող են առաջանալ կեղծ ազգայնական ուժերի ու տարրերի անխոհեմ կոչերի ու գործողությունների հետեւանքով, ինչի կանխումը իրավապահ մարմինների պարտքն է, եւ այս դեպքում պետք է ոչ թե խանգարել, այլ օգնել նրանց,

- մտահոգված լինելով մեր երկրի միջազգային վարկով,

- ինչպես նաեւ կողմնակիցը լինելով Հայ-թուրքական հարաբերությունների կարգավորմանը եւ չցանկանալով որեւէ կերպ ստվերել դրանց զարգացման հեռանկարներին նպաստող որեւէ միջոցառում,


Հայ Ազգային Կոնգրեսը հայտարարում է.

ա) Ս.թ. օգոստոսի 31-ից, ժամը 23-ից դադարեցնում է Հյուսիսային պողոտայում հուլիսի 4-ից շարունակվող շուրջօրյա նստացույցը։

բ) Սեպտեմբերի 5-ին նշանակված համահանրապետական հանրահավաքը տեղափոխում է հաջորդ ուրբաթ՝ սեպտեմբերի 12-ին։

գ) Մինչեւ սեպտեմբերի 12-ը Հյուսիսային պողոտայում կանցկացվեն միայն «քաղաքական զբոսանքներ» երեկոյան ժամը 19-ից մինչեւ 22-ը։
Նստացույցի մասնակիցներին եւ մեր բոլոր կողմնակիցներին կոչ ենք անում կազդուրվել եւ պատրաստվել պայքարի վճռական փուլին։


Մեր ժողովրդին կոչ ենք անում այս ընթացքում չենթարկվել որեւէ կեղծ ազգայնական սադրանքի, ընդհակառակը՝ օգնել կանխել այդպիսիք։

Բոլորին կոչ ենք անում ակտիվորեն աջակցել ֆուտբոլի Հայաստանի հավաքականին, հաջողություն ենք մաղթում մեր թիմին, ցանկանում ՄԻՆՉԵՒ ՎԵՐՋ ՊԱՅՔԱՐ եւ խոշոր հաշվով ՀԱՂԹԱՆԱԿ։

ՀԱՂԹԵԼՈ՛Ւ ԵՆՔ։

ՀԱՅ ԱԶԳԱՅԻՆ ԿՈՆԳՐԵՍ

[Chuk]

Ի դեպ մոռացել էի այս թեմայում նշել:
Բոլոր նրանք, ովքեր ցանկանում են անդամակցել Հայ Ազգային Կոնգրեսին կարող են դիմել հետևյալ գրասենյակները՝ այցելելով ժամը 10:00 - 18:00 սահմանում (շաբաթ և կիրակի օրերի աշխատանքի մասին տեղյակ չեմ, կարող եք ճշտել՝ զանգահարելով համապատասխան գրասենյակ).

ՀԱԿ Գրասենյակներ.
- ՀԱԿ կենտրոնական գրասենյակ - Կորյունի 19Ա, հեռ. 520974
- Կենտրոն-Նորք-Մարաշ - Սարյան 38, հեռ. 535235
- Արաբկիր - Օրբելի 8, հեռ. 227842
- Էրեբունի-Նուբարաշեն - Դավիթ-Բեկի 15, հեռ. 433535
- Աջափնյակ-Դավթաշեն - Հալաբյան 29, հեռ. 398897
- Քանաքեռ Զեյթուն - Ադոնցի 3, հեռ. 297512

[Chuk]

ՀԱՅՏԱՐԱՐՈՒԹՅՈՒՆ ՍԵՊՏԵՄԲԵՐԻ 1-Ի ԿԱՊԱԿՑՈՒԹՅԱՄԲ
01.09.2008 թ.

Գիտելիքի օրվա՝ սեպտեմբերի 1-ի կապակցությամբ Հայ Ազգային Կոնգրեսը շնորհավորում է Հայաստանի բոլոր ուսանողներին։

Նոր ուսումնական տարին սկսվում է վերջին մեկ տարվա համաժողովրդական ժողովրդավարական պայքարի շնորհիվ մեր երկրում որակապես նոր՝ քաղաքացիական հասարակության ձեւավորման պայմաններում, ինչին իր մեծ նպաստն է բերել ուսանողությունը։ Բարձրագույն կրթական հաստատություններում ազատամտության ցանկացած դրսևորում արմատախիլ անելու, վախի ու անտարբերության մթնոլորտ ձևավորելու, «գրպանային» ուսանողական կազմակերպությունների ստեղծմամբ ուսանողական շարժումը կասեցնելու կամ վերահսկելու բոլոր ջանքերը, որ վարչախմբի պատվերը կատարելով գործադրեցին բուհերի ռեկտորները, անցան ապարդյուն։ Համաժողովրդական շարժումն իր հիմնական նվաճումներից մեկն է համարում այդ պայքարում ուսանող երիտասարդության քաղաքացիական հսկայական ներուժի բացահայտումը, նրա ակտիվ մասնակցությունը հասարակության ժողովրդավարացման և քաղաքացիական հասարակության ինստիտուտների կայացմանը։

Այսօր Հայաստանում բարձրագույն կրթական հաստատությունների հասարակական վարկը և հեղինակությունը վերականգնման խիստ կարիքն ունեն։ Ուսանողությունը նշանակալի դերակատարություն կարող է ունենալ բուհերում տիրող իրավիճակի (կրթության որակի անկում, կոռուպցիա, ուսանողների իրավունքների անտեսում, բուհի իրական ինքնավարության բացակայություն եւ այլն) առողջացման, ակադեմիական ազատությունների վերականգնման, բուհերում ընթացող դեկորատիվ բնույթի մակերեսային վերաձևումները իրական բարեփոխումների վերածելու գործում։ Գիտելիքի հասարակություն ձևավորելու խնդիրը պահանջում է երկրի մարդկային և ինտելեկտուալ ներուժի որակական աճ՝ դրանով իսկ առաջ մղելով կրթության ոլորտը հասարակական զարգացման առաջնային գիծ։ Դա իր հերթին հնարավոր է միմիայն սահմանադրական կարգի վերակնգնման, օրինական իշխանության, օրենքի գերակայության պայմաններում, համընդհանուր մի խնդիր, որ լուծումն այսօր մեծապես կախված է նաեւ առաջիկայում ուսանողների ակտիվ քաղաքացիական դիրքորոշումից, ինչին մենք չենք կասկածում։

ՀԱՅ ԱԶԳԱՅԻՆ ԿՈՆԳՐԵՍԻ ԿԵՆՏՐՈՆԱԿԱՆ ԳՐԱՍԵՆՅԱԿ