ԱՐԱԲԿԻՐԻ ԹԱՂԱՊԵՏԻ ԹԵԿՆԱԾՈՒՆ ԸՆՏՐԱԿԱՇԱՌՔ Է ԲԱԺԱՆՈՒՄ, ԱՀԱԶԱՆԳՈՒՄ ԵՆ ՔԱՂԱՔԱՑԻՆԵՐԸ
Այսօր Կենտրոնական Ընտրական հանձնաժողովի Ժառանգության նորանշանակ անդամ Հովսեփ Խուրշուդյանը բաց նամակով դիմել է ՀՀ Ոստիկանության պետ Ալիկ Սարգսյանին, ՀՀ Ազգային անվտանգության ծառայության պետ Գորիկ Հակոբյանին, իսկ նամակի պատճեներն ուղարկել ՀՀ վարչապետ Տիգրան Սարգսյանին եւ ՀՀ նախագահի վերահսկողության ծառայության ղեկավար Հովհաննես Հովսեփյանին: Նամակում, մասնավորապես ասված է. «Վերջին շրջանում Ժառանգություն կուսակցության գրասենյակ այցելող մի շարք քաղաքացիներ ահազանգ են հնչեցրել Արաբկիրի համայնքի ղեկավարի հավանական թեկնածու Ալբերտ Երիցյանի կողմից սկսված զանգվածային ընտրակաշառքների տարածման կապակցությամբ` քաղաքացիների անձնագրային տվյալների հավաքագրման հիման վրա:
Բացի դրանից, Ժառանգություն կուսակցության գրասենյակ այցելած տարբեր քաղաքացիներ հայտնել են մեզ, որ համայնքի` Երեւանի քաղաքապետարանի ենթակայության տակ գտնվող մի շարք հիվանդանոցների եւ պոլիկլինիկաների ղեկավարությունը` աշխատանքից ազատելու սպառնալիքով հրահանգել է այդ հիմնարկներում աշխատող արաբկիրցիներին ապահովել Ալբերտ Երիցյանի օգտին ընտրողների որոշակի քանակություն, որի վերաբերյալ ներկայացնել համապատասխան ցուցակներ` անձնագրային տվյալներով:
Հաշվի առնելով այն, որ վերը նշված երկու դեպքերն էլ ընտրական օրենսգրքի քրեորեն պատժելի կոպիտ խախտումներ են, ինչպես նաեւ այն, որ ընտրակաշառքներով եւ վարչական ճնշումների միջոցով ձեւավավորված իշխանությունը ուղղակի սպառնալիք է` ուղղված Հայաստանի Հանրապետության ազգային անվտանգության եւ մեր երկրում հասարակական կարգի դեմ,
- խնդրում ենք կիրառել Ձեր իրավասության տակ գտնվող անհրաժեշտ բոլոր միջոցները` կանխելու համար նախընտրական փուլում, ինչպեսեւ դրան նախորդող ժամանակաշրջանում ընտրողների վրա վարչական ճնշման դեպքերը, ընտրակաշառքների տարածումը, այլ ընտրախախտումները, բացահայտել եւ պատժել դրանք իրականացնող անձանց»:
http://www.lragir.am/
Մեջբերել
Էջանիշներ