Հայաստանի շախմատի կանանց հավաքականը Եվրոպայի թիմային առաջնությունում, որն անցկացվում է սերբական Նովի Սադ քաղաքում, առաջին տուրում 2,5:1,5 հաշվով պարտության մատնեց Իտալիայի թիմին: Օլգա Զիմինայի նկատմամբ Լիլիթ Մկրտչյանի տարած հաղթանակն այս պայքարում վճռորոշ եղավ: Մյուս երեք շախմատիստուհիները` Էլինա Դանիելյանը, Լիլիթ Գալոյանը և Նելլի Աղինյանը, համապատասխանաբար ոչ-ոքի արձանագրեցին Ելենա Սեդինայի, Մարինա Բրունելլոյի և Էլեոնորա Ամբրոսիի հետ պարտիաներում: Այսպիսով` մեր թիմը 1-ին տուրից հետո իր ակտիվում 2 միավոր ունի և 12 այլ թիմերի հետ միասին ընթանում է առաջատարների խմբում:
Հաջորդ տուրում, որը կկայանա այսօր, մեր շախմատիստուհիները կմրցակցեն Սլովենիայի ընտրանու հետ:
Օլգա Զիմինա-Լիլիթ Մկրտչյան 0:1
Էլինա Դանիելյան-Ելենա Սեդինա 0,5:0,5
Լիլիթ Գալոյան-Մարինա Բրունելլո 0,5:0,5
Էլեոնորա Ամբրոսի-Նելլի Աղինյան 0,5:0,5
-----------------------------------------------------------------------------------------------
Սերբական Նովի Սադ քաղաքում կայացել է Եվրոպայի շախմատի 17-րդ թիմային առաջնությունը: Հայաստանի տղամարդկանց հավաքականը մեկնարկային տուրում 3:1 հաշվով պարտության մատնեց Դանիայի թիմին: Արման Փաշիկյանն ու Տիգրան Լ. Պետրոսյանն առավելության հասան համապատասխանաբար Լաս Սչանդորֆի և Վանգ Յակոբ Գլուդի նկատմամբ: Վլադիմիր Հակոբյանն ու Գաբրիել Սարգսյանը ոչ-ոքի խաղացին Բո Լարս Հանսենի և Բերգ Սունե Հանսենի հետ:
Այսպիսով` մեկնարկային տուրից հետո 17 հավաքականներ 2-ական միավորով գլխավորում են մրցաշարային աղյուսակը: Նրանց թվում է նաև մրցաշարի ֆավորիտներից մեկը` Ադրբեջանի հավաքականը: Հաղթողի կոչման մյուս հավակնորդը` Ռուսաստանի թիմը, 2:2 հաշվով ոչ-ոքի արձանագրեց Խորվաթիայի ընտրանու հետ մրցակցությունում: Ֆավորիտների թվում, ինչպես միշտ, նաև Հայաստանի հավաքականն է:
Ավելացնենք, որ այսօր տեղի ունենալիք 2-րդ տուրում մեր ազգային թիմի մրցակիցն է Ռումինիայի հավաքականը:
1-ին տուր. Դանիա-Հայաստան 1:3
Բո Լարս Հանսեն-Վլադիմիր Հակոբյան 0,5:0,5
Գաբրիել Սարգսյան-Բերգ Սունե Հանսեն 0,5:0,5
Լարս Սչանդորֆ-Արման Փաշիկյան 0:1
Տիգրան Լ. Պետրոսյան- Վանգ Յակոբ Գլուդ 1:0
Էջանիշներ