Փչված բրենդի փուչիկը. Ի՞նչ է սպասում HSBC-ին
Համաշխարհային ֆինանսատնտեսական ճգնաժամը պայթեցրեց այն փուչիկները, որ հասարակությունների աչքին փչվում են որպես «հեղինակավոր բրենդ», գրում է «Կապիտալ» օրաթերթը։ Պարզվում է` ոչ բոլոր բրենդներն են այնքան հուսալի, որ արժե կույր աչքերով դրանց հավատալ, կամ որ ավելի վատ է` վստահել խնայողությունները։
HSBC-ն համաշխարհային ճանաչում ունեցող այն բրենդներից է, որին ճգնաժամը նույնպես չխնայեց։ Ամերիկյան հիպոթեկային շուկայի անկման արդյունքում դեռ անցյալ տարվա գարնանը բանկը հայտարարեց մոտ $17,2 մլրդ կորուստների մասին։ Սակայն 2008-ը, ի տարբերություն այլ բանկերի, HSBC-ն փակեց շահույթով, քանի որ շահույթի մեծ մասը (մոտ երկու երրորդը) ստացվում է զարգացող ասիական տնտեսություններից։ Այս տարվա երրորդ եռամսյակը ևս բանկը փակեց շահույթով, իսկ բանկի ղեկավարները շտապեցին հայտարարել սպասվածից ավելի մեծ արդյունքների մասին` առանց նշելու կոնկրետ թվեր։ Այնուամենայնիվ, հոնգկոնկգյան ծագումով անգլիական բանկն անհուսալիորեն զիջում է մրցակցությունը չինական բանկերին, որոնք և՛ շահութաբերության, և՛ ակտիվների ծավալներով ներկայում գլխավորում են համաշխարհային բանկերի բոլոր վարկանիշերը։
Բացի այդ` HSBC-ի գլխին նոր փորձանք է հասունանում` կասկածի տակ են առնվել Արաբական Միացալ Էմիրություններում նրանց ներդրումները, որ կազմում են $17 մլրդ։ Եթե Դուբայը դեֆոլտ հայտարարի, ինչը փորձագետները բնավ չեն բացառում, ապա HSBC-ն կհամալրի վնասով աշխատող բանկերի շարքը։ Միայն անցյալ շաբաթավերջի երկու օրերի ընթացքում բանկի բաժնետոմսերը, ըստ Bloomberg-ի, արժեզրկվեցին 9,3%-ով։
HSBC-ն Հայաստանում հայտնվել է 1995 թ., ներկայում նրան է պատկանում «Էյչ-Էս-Բի-Սի Բանկ Հայաստանի» բաժնետոմսերի 70%-ը։ Ինչպես նշում է «Կապիտալը», միջազգային շուկայում HSBC-ի դիրքերի թուլացումը անդրադարձել է նաև բանկի հայաստանյան ներկայացուցչության հեղինակության վրա։ Ինքը, բանկը, չի խուսափել մի շարք կտրուկ քայլերից, օրինակ` ֆիզիկական անձանց վարկավորման դադարեցումից կամ աշխատակիցների զանգվածային կրճատումից։ Սրանք միջոցներն են, որ բանկերը սովորաբար կիրառում են ծայրահեղ, հետճգնաժամային իրավիճակներում։ Հատկանշական է, որ հայաստանյան բանկերի մեծ մասը վերականգնել է ֆիզիկական անձանց վարկավորումը` խստացնելով միայն վարկավորման պայմանները, իսկ «Էյչ-Էս-Բի-Սի Բանկ Հայաստանը» պաշտոնապես հայտարարել է մինչև դեկտեմբերի 1-ը ֆիզիկական անձանց վարկավորման դադարեցման մասին։ Աբսուրդն այն է, որ բանկը վարկեր չի տրամադրում նույնիսկ իր մշտական ու վստահելի հաճախորդներին, որի պատճառով բանկի ավանդատուներից շատերը լուծարել են իրենց բանկային հաշիվները։
Հայաստանում բանկը շեշտը դրել է իր բրենդի անխոցելիության վրա, ինչը, ռազմավարական առումով, արդարացված չէ։ Հայաստանում ներկայում մեկ տասնյակից ավելի բանկեր կան, որ շատ ավելի որակյալ և բազմապիսի բանկային ծառայություններ են մատուցում, քան «Էյչ-Էս-Բի-Սի Բանկ Հայաստանը»։ ՀՀ քաղաքացիները, կարծում ենք, լավ են հասկանում, որ բրենդը, որքան էլ հնչեղ լինի, չի երաշխավորի իրենց գումարների վերադարձը դեֆոլտների դեպքում, եզրակացնում է հոդվածագիրը։
Էջանիշներ