Մանրապատումներ

[Երկնային]

էլի ընտանեկան արխիվից՝ տատիկներիս կյանքից

Ուրեմն մորական տատիս հայերեն լավ չի իմանում, գալիս ա Հայաստան, փողոցում մի զույգ ա իրան մոտենում, ցածր ձայնով հարցնում են.
- Տիկին, չե՞ք ասի, թե այստեղ մոտակայքում զուգարան որտեղ կա:
Տատիկս, մտածելով, որ զուգարանը պետք է որ ռեստորանատիպ ինչ-որ բան լինի, բարձր-բարձր ասում ա.
- Այ էնտեղ մեեեեեծ շենք կա, վրան տենց էլ գրած ա՝ զու-գաաա-րան
Իրականում այդ շենքի վրա գրված էր «ճաշարան»…

………
Հիշում ա, որ մեկի տանը ինչ-որ կոնֆետ ա կերել, մտնում ա խանութ ու հարցնում ա.
- Կոլյա-Նիկոլայ կանֆետ ունե՞ք
Վաճառողը զարմացած իրան ա նայում.
- Այդպիսի կոնֆետ չկա:
- Ո՞նց չկա, ինձ ասել են, որ հենց էս խանութից են առել…
Տենց կռվում ա, գնում ա տուն, նոր պարզում ա, որ էդ կոնֆետը ոչ թե Կոլյա-Նիկոլայ ա կոչվում, այլ Վասյա-Վասիլյոկ

………
էլի մի խանութային դեպք.
Տատիս գնում ա մածուն առնելու, վաճառողը հարցնում ա.
- Բա շի՞շ
Տատիս սկսում ա խրատել.
- Տղա ջան, ես քո մամայի տարիքին եմ, ի՞նչ բառեր ես քեզ թույլ տալիս
Վաճառողը բնականաբար անտեղյակ ասում ա.
- Հա բայց ի՞նչ եմ ասել, ասում եմ բա շի՞շ…
Տատիս ավելի ա ջղայնանում, սկսում ա խրատել, բան… Մեկ էլ կողքից մեկը ասում ա.
- Շիշ՝ бутылка
Նոր իրար հասկանում են: Դե շիշ բառը ռուսերեն ու հայերեն տարբեր իմաստներ ունի էլի

………
Հորական տատիս հոպարենցս հետ էր ապրում: Ուրեմն մի օր հեռուստացույց են նայում, էնտեղ մի զույգ համբուրվում ա, տատիս խառնվում ա իրար՝ էս ի՞նչ աննամուսություն եք նայում, փոխեք Հոպարս ասում ա.
- Մամ, ինչի ձեր ժամանակ տենց բան չկա՞ր:
- Չէ, չկար
- Բա էդ յոթ երեխեդ որտեղի՞ց
- Բալես, մենք միամիտ ենք եղել. քնել-արթնացել ենք, տեսել ենք երեխով ենք

[ivy]

Մատուցողը

Իտալիայում նստած էինք մի ռեստորանում: Սեղանի շուրջ վեց հոգով էինք` մի հայ, երկու հնդիկ, մի չինացի, մի թուրք ու մի գերմանացի: Մեր մատուցողը երիտասարդ սևահեր տղա էր` շատ հմուտ ու արագաշարժ: Հիմնական ճաշատեսակն ավարտելուց հետո կանչեցինք` դեսերտ պատվիրելու: Հարցրեցի.
- Տիրամիսու ունե՞ք:
Երևի հարցս շատ հիմար հնչեց. նույնն էր, թե ճապոնական ռեստորանում հարցնես, թե սուշի ունե՞ն:
Ու էս մատուցողը կատակով պատասխանեց.
- Չէ, ի՞նչ տիրամիսու, որտեղի՞ց մեզ տիրամիսու:
Սկզբում չհասկացա, որ կատակ է: Տեսնելով իմ շփոթված դեմքը` ժպտաց, ասաց, որ պատվերն ընդունված է ու գնաց:
Երկու րոպեից մեկ էլ շփոթված հայացքով եկավ:
- Գիտեք, տիրամիսուն վերջացել է...
Ծիծաղեցինք: Ամուսինս էլ թե.
- Բա ի՞նչ էիր քեզ կոտրտում, երբ պատվիրում էինք:
- Կներեք,-ասաց տղան,-այսօր շատ այցելուներ ունեինք, հիմա էլ օրվա վերջն է...
Գլուխը կախ հեռացավ... Ու աչքիս առաջ մոտեցավ պատվերները կատարող բաժնին, վերցրեց մեր տիրամիսուները, հետ եկավ մեզ մոտ:
- Տիրամիսու էիք պատվիրոլ,- հանգիստ ասաց նա` կարծես ոչինչ էլ չէր եղել,- խնդրեմ:
Ու դրեց մեր դիմաց:
Հասկացանք, որ մինչ էդ պահն ամբողջը կատակ էր: Ծիծաղեցինք: Մտածեցի, որ նման բաներ Գերմանիայում երբեք չես տեսնի... Բացառվում է, որ մատուցողը հաճախորդի հետ նման ձևով զվարճանա: Ինչ կատակ, ինչ բան... Դեռ չէի կտրվել էդ մտքիցս, երբ նկատեցի, որ մեր սեղանի շուրջ նստած գերմանացին միակն է, որ չի ծիծաղում, ոչ էլ անգամ ժպտում է:
Տիրամիսուական խաղերով մեր մատուցողի համարձակությունը չավարտվեց: Թուրք աղջիկը, տեսնելով, որ մեզ սպասարկող իտալացին խաղալ սիրող տղա է, սկսեց հետը ֆլիրտ անել: Բա թե` քանի՞ տարեկան ես, իսկ ե՞ս ինչքան կլինեմ, իսկ ինչքա՞ն կտայիր: Մատուցողն էլ օձի լեզու ուներ, էս աղջիկն էլ գնալով ավելի էր ոգևորվում: Հնդիկները կողքից տոն էին տալիս էդ ֆլիրտին, չինացին էլ իր ակնոցների տակից պլպլպստացնող աչքերով նայում էր` լայն ժպտալով և մեկ ու մեջ տարօրինակ հայացքներ գցելով. երևի որոշ արտահայտություներ դժվար էր հասկանում: Ու դարձավ էդ ամենը իսկական ներկայացում: Զվարճալի էր, ծիծաղում էինք: Իսկ մեր գերմանացին լուռ իր գարեջուրն էր խմում` աշխատելով ոչ մի էմոցիա ցույց չտալ: Բայց զգում էի, որ շատ տհաճ է իրեն կատարվողը:
Ասացի, որ ուզում եմ գնանք արդեն, բոլորը զարմացան, միայն գերմանացին երախտապարտ աչքերով վրաս նայեց ու գլխով համաձայնության նշան տվեց:
Ուտելիքը լավն էր այնտեղ, սպասարկումն էլ արագ, ու հենց մեր տան կողքին էր այդ ռեստորանը: Բայց մնացած օրերին գերմանացի տղան այլևս հրաժարվեց գնալ այնտեղ` առանց մեկնաբանելու, թե ինչու:

[ivy]

«Մաչոն»

Նվիրվում է իրենց մաչո երևակայող բոլոր տղաներին

Իտալական ճամփորդություններին, բացի ինձնից ու Սիդից, երկու տղա էլ էին մասնակցում: Մեկը չափած-ձևած, չխմող, չծխող, առավոտից իրիկուն սպոտրով զբաղվող մի ռուս տղա էր` մեր հազար տարվա ծանոթը: Իսկ մյուսը` ծխող, խմող, անգամ երեկոյան արևային ակնոցները չհանող, լոպազ քայլվածքով, իրեն բոլիվուդյան, գուցե նաև հոլիվուդյան աստղի տեղ դրած մի գրեթե անծանոթ հնդիկ: Ու էդ երկուսը իրար հետ առանձնապես չէին շփվում. ոչ մի ընդհանուր բան չունեին, բացի նրանից, որ երկուսն էլ կոնսուլտանտ էին գերմանական հայտնի ֆիրմաներում:
Ու մի երեկո էլ հնդիկը որոշեց իրենց չշփման բացը լրացնել: Վիսկիի հերթական բաժակը մի ձեռքին, սիգարետը` մյուսին, նստեց մեր ռուսի դիմաց, որն այդ ժամանակ գանտելներով (հետը քարշ էր տվել Իտալիա) բիցեպսներն էր դզմզում: Զգալով, որ հնդիկը ինչ-որ շատ մոտ է իրեն նստած` ռուսն իր մարզված բոլոր մկաններով հետ ձգվեց` փորձելով խուսափել ալկոհոլի թունդ հոտից ու սիգարետի ծխից: Մոտ նստածի կատարն էլ արդեն լաաավ տաքացել էր ու հնդկական մուղամներ էր շվշվացնում` ինքն իրեն ծիծաղելով չգիտես թե ինչի վրա: Մեկ էլ ոչ ավել, ոչ պակաս հայտարարեց.
- Ռուս աղջիկներից լավը չկա:
Ռուսը հայացքը բարձրացրեց ու ուշադիր նայեց հնդիկին:
- Ու ինչո՞վ են էդքան լավը,- հետաքրքրվեցինք մենք:
- Ամեն ինչով, լուրջ եմ ասում, նրանցից լավը չկա:
Ռուսի դեմքին ոչ մի մկան չէր շարժվում, միայն հայացքը ողջ ուշադրությամբ հառված էր ոգևորված հնդիկին:
- Իրիկունը գործից հետո գնում ես մի տեղ նստում, խմիչք վերցնում, աղջիկների հետ ծանոթանում, ու եթե ռուս են, արդեն շահած ես: Գերմանացիները գլխացավանք են. պիտի ամեն ինչ իրենց ուզածով լինի, թուրքերը սիրտդ կկոտրեն. քո հաշվին կուտեն, կխմեն, աչքդ թեքեցիր, փախել են արդեն: Բայց այ ռուս աղջիկները... Հա, շատ են խմում, գրպաններդ դատարկում են, բայց ներդրածդ փողը էդ գիշեր լրիվ փոխհատուցվում է: Ասում եմ` ռուսներից լավը չկա:
Ֆռթացնելով վիսկին ու չնկատելով ռուս տղայի լարված հայացքը` հնդիկը շարունակեց իր «գովքը».
- Խմիչքի մեջ էլ մեծ կտոր լիմոն են գցում, հետո էլ էդ լիմոնը ոնց են քամում շուրթերով, գժվելու բան,- ու ջահելը երևակայական լիմոնով օդում իրականացրեց գժվեցնող գործողությունը և շարունակեց,- բա ո~նց են պարում... ախ... վայրի գազանների նման...
- Չորեքթա՞թ,- հարցրեց ռուսը:
Հնդիկը ձեռքերը ճոճեց օդում` էքստազի մեջ:
- Ու ռուսներին հանգիստ կարող ես տուն բերել: Թուրքերի պես չեն, որ լավագույն դեպքում կփախչեն, չեն գա, վատագույն դեպքում` հետո մի շաբաթ չես կարողանա պոկվել դրանցից: Ոչ էլ քմահաճ ու իրենց կամքը թելադրող գերմանուհիների նման: Ռուս աղջիկը գիտի իրեն ոնց պահել քո տանը: Իր վրա ամբողջ ծախսածդ գիշերը «կվերադարձնի», առավոտն էլ մինչև արթնանալդ կմաքրվի տնից` ոնց-որ սկի չի էլ եղել: Ռուսն ուրիշ է...
Էստեղ մարզվող տղայի համբերության բաժակը լցվեց, թափով վեր կացավ տեղից, ձեռքը կտրուկ շարժեց հնդիկի կողմն ու ասաց.
- Ամեն ինչ պարզ է:
Ուզում էր գնալ, բայց հնդիկը շարունակեց.
- Ռուս աղջիկնեն ինձ շատ են սիրում, ես իրենց հետ խնդիր չունեմ` երբ ուզեմ, ինչքան ուզեմ: Դու հետս արի, կգնանք լավ-լավ տեղեր, կխմենք, կուրախանանք, հետո թե կուզես, բնակարանիս բանալիները կարող եմ մի գիշերով քեզ տալ, ես շատ մեծ ու հարմար անկողին ունեմ:
- Ես տուն էլ ունեմ, մահճակալ էլ,- ասաց ռուս տղան ու դուրս եկավ սենյակից:
Հնդիկը շրջվեց իմ ու Սիդի կողմը, թե.
- Զարմանալի տղա է, հեչ հետաքրքրված չի ռուս աղջիկներով... Երևի իրեն գերմանուհիներն են դուր գալիս:
...
Բախտի բերմամբ, թե պատահմամբ, հաջորդ օրը Գերմանիայից մեզ միացան Սիդի ու ռուս տղայի ծանոթների մի այլ խումբ, որտեղ երկու ռուս աղջիկներ կային: Էն ինչ տիպեր էին, պա~հ, լիմոն էլ կքամեին, վայրի գազանների նման էլ կպարեին, դու ասա` պարացնող լիներ: Մեր քաջ հնդիկը, որ նախորդ գիշերը կտրիճ էր դարձել, էդ ռուս աղջիկների ներկայությամբ դարձավ կուռկուռի ձագ, կուչ եկավ, քաշվեց, սկի ծպտունը դուրս չէր գալիս:
Մոտեցա իրեն, թե.
- Բա ասում ես` ռուսների հետ լավ ես, հրեն, իրենց ոտքով եկել են քո սիրելի աղջիկները:
Հնդիկն ավելի կուչ եկավ ու կամաց ասաց.
- Լավն են ռուս աղջիկները... շատ ընկերական են:
Ու ինքն իր ասածին գլխով անելով` դուրս եկավ ծխելու:

[Rhayader]

Այվ, երկուսն էլ կայֆն էին: Առաջինը «Honeymoon»-ը հիշեցրեց, երկրորդն էլ լավ դիպուկ էր

[ministr]

Մատուցողը

ivy ջան ասում ես 6 հոգով էինք, հետո էլ ասում ես ամուսինս... Ամուսնուդ չես հաշվում հա? Բա կարելի ա?

[ivy]

ivy ջան ասում ես 6 հոգով էինք, հետո էլ ասում ես ամուսինս... Ամուսնուդ չես հաշվում հա? Բա կարելի ա?

Ամուսնուս հաշվել եմ, հնդիկներից մեկը ինքն էր:

[ministr]

3:0 հօգուտ քեզ

[ivy]

Խլուրդը, որն ուզում էր իմանալ, թե ով է արել իր գլխին

Այ էսպիսի մի լավ գիրք կա մեր մանկապարտեզում: Ճստոների կես բոյին է` սիրուն նկարազարդած, հիմնականում` շագանակագույն երանգների: Պատկերազարդ գրքի վերնագիրը արդեն իսկ ահագին բան է ասում միջի պատմվածքի մասին: Բայց դե մի քիչ մանրամասնեմ:
Ուրեմն մի խլուրդ է լինում, մի օր իր համար ման է գալիս, մեկ էլ վերևից գլխին` հոպ, մի կլոնձ թարմ արտաթորանք: Էս խլուրդը խառնվում է իրար, թե ով արեց իր գլխին: Ու գլխի նոր զարդով սկսում է շրջել և հանդիպած կենդանիներին հարցուփորձ անել.
- Դո՞ւ ես արել իմ գլխին:
- Ե՞ս,- զարմանում է ծիտիկը,- հլը նայիր` ես ոնց եմ անում:
Ու հավեսով ծրտում է խլուրդի կողքին: Տուժածը հասկանում է, որ սա էն չի:
- Դո՞ւ ես արել իմ գլխին,- հարցնում է կովին:
- Ե՞ս, ի~նչ ես ասում, հլը նայիր` ես ոնց եմ անում:
Ու մի գունդ թրիք է շպրտում հաստլիկ հետույքից:
Հերթը հասնում է խոզին.
- Դո՞ւ ես արել իմ գլխին:
Խոզն էլ իր հոտավետ զանգվածն է հրամցնում` չլմփոցով ու մնացած երաժշտական ձայնակցությամբ:
Էդպես գրքում հանդիպում ենք նաև այծի, ձիու և այլ կենդանիների հետույքների, որոնցից տարբեր տեսակի կակաշկաներ են թափվում, ու համեմատության կարգով հասկանալի է դառնում, որ դրանցից ոչ մեկը խլուրդի գլխինի ընկերը չի:
Խեղճ տուժածը իր կակաշկայով էնքան է շրջում մինչև հանդիպում է թարմ արտաթորանք խժռող երկու տռուզ ճանճի, ու հասկանում է, որ սրանք հաստատ գործի վարպետ են, կիմանան թե իր գլխի վրայինը ում շնորհքն է: Էդպես էլ լինում է, ճանճերն ասում են.
- Շունն է արել, պարզ բան:
Խլուրդը գնում, գտնում է շանը: Տեսնում է սա կերած-խմած քնած է: Վրեժի ծարավը համակում է մեր հերոսին: Բարձրանում է շան վրա ու նրա ճակատի մեջտեղում անում իր գորշ անելիքը: Առը քեզ, շան լակոտ:
Ու իր գլխի զանգվածով հեռանում է տխուր խլուրդը:
Այ էսպիսի գերմանական պատմվածք երեխաների համար:
Միշտ ուրիշներն էին կարդում էրեխեքի համար, ես էլ կողքից ականջ էի դնում: Էնքան լսեցի էդ ք.-ոտ պատմությունը, վերջն իմ հավեսն էլ տվեց: Էսօր էլ ես կարդացի, ճտերս էլ ոգևորությամբ լսում էին ու երևի փորձում պարզել` կարո՞ղ է իրենք են արել խլուրդի գլխին: Հոտը աշխարհ էր կապել...

[Վարպետ]

Էնքան լսեցի էդ ք.-ոտ պատմությունը, վերջն իմ հավեսն էլ տվեց:

Րիպ, մի բան անկեղծանամ? Էս տողիցդ հետո մի պահ լրիվ ուրիշ բան պատկերացրեցի` հավեսդ տալու պահով Ների~ր էլի~ Ընդամենը մի պա~հ