ՕԳՈՍՏՈՍԻ 1-ԻՑ ՇԱՐԺՄԱՆ ԿԱՐԳԱԽՈՍԸ ԿՓՈԽՎԻ
Համաժողովրդական շարժման առաջնորդ Լեւոն Տեր-Պետրոսյանն այսօր հայտարարեց շարժման առաջիկա պահանջների մասին, որոնք բնութագրեց`«կտրուկ» եւ թվարկեց. «Անհապաղ ազատ արձակել բոլոր քաղբանտարկյալներին եւ դադարեցնել ընդդիմության եւ հասարակության դեմ ուղղված քաղաքական հաշվեհարդարը: Կտրուկ միջոցներ ձեռնարկել ՀՀ Հատուկ քննչական ծառայության պետ Միրզոյանի ապօրինի շրջաբերական-հրահանգով ողջ հանրապետությունով մեկ ծավալած քաղաքական հետապնդումները դադարեցնելու նպատակով»: Օգտվելով առիթից այսօր Տեր-Պետրոսյանը հանրահավաքի մասնակիցների անունից դիմեց ՀՀ մարդու իրավունքների պաշտպան Արմեն Հարությունյանին` խնդրելով մանրակրկիթ իրավաբանական գնահատական տալ Անդրանիկ Միրզոյանի փաստաթղթին: Համաժողովրդական շարժման պահանջներն այսքանով չավարտվեցին: «Շուտափույթ կերպով բացահայտել եւ դատական կարգով պատժի ենթարկել մարտի 1-ի ոճրագործության բուն պատասխանատուներին, առաջին հերթին` Ռոբերտ Քոչարյանին: Անմիջապես պաշտոնից հեռացնել նախագահական ընտրությունների եւ մարտի 1-ի իրադարձությունների ընթացքում չարաբաստիկ դեր խաղացած, ինչպես նաեւ իրենց գործունեության մեջ լիովին վարկաբեկված անձանց` Արմեն Գեւորգյանին, նախագահի աշխատակազմի ղեկավար Հովիկ Աբրահամյանին, Գլխավոր դատախազ Աղվան Հովսեփյանին, ԱԱԾ պետ Գորիկ Հակոբյանին եւ Հանրային հեռուստատեսության խորհրդի պետ Ալեքսան Հարությունյանին»: Նշված պահանջները չկատարելու եւ մանավանդ մարտի 1-ի ոճրագործության բացահայտումը խափանելու դեպքում` Տեր-Պետորսյանը խոստացավ. «Օգոստոսի 1-ից սկսած Շարժման կարգախոսը հայտարարել` Սերժ Սարգսյանի հրաժարականը եւ արտահերթ նախագահական ընտրությունների անցկացումը»: Տեր-Պետրոսյանը նշեց, որ օգոստոսի 1-ը պատահական չէ ընտրված, եւ հենց այդ օրն է նախատեսված Համաժողովրդական շարժման հաջորդ հանրահավաքը: ՀՀ առաջին նախագահի ելույթից հետո տեղի ունեցավ մարտի 1-ից հետո Համաժողովրդական շարժման աննախադեպ բազմամարդ երթը, որը սկսվեց Մատենադարանի մոտից եւ Մաշտոցի պողոտայով, Մյասնիկյանի արձանի մոտով, Հանրապետության հրապարակով ավարտվեց Հյուսիսային պողոտայում, որն այսօր Դավիթ Շահնազարյանն իր ելույթում անվանեց «Համաժողովրդական շարժման Անլռելի զանգակատուն»:
Մեջբերել
Էջանիշներ